快樂o既時光過得特別快,
加上食蟹用左唔少時間,
結果琴日只係浸左兩個外湯......
八點食早餐。
平時瞓到最後一秒先check out,
早餐都唔會食o既小弟,
晨早就爬左起身, 為o既咪又係浸溫泉~
浸都甩皮都要浸啦。
稍為有質素o既城崎温泉旅館, 其實都會有自己o既溫泉,
由大浴場方式, 到獨立個室, 由預約制到有空位就攝, 各色其色。
而小弟住嗰間, 有4個獨立個室溫泉, 只要冇人就可以入去浸,
冇限時間, 不過大家通常都唔會浸多過一個鐘。
浸完之後精神爽利, 食早餐。
嗱嗱食完早餐, 爭取時間, 點都浸多個溫泉,
如果唔係對唔係江東父老。
正如琴晚所講, 今日浸o既係一の湯
幾有風味的, 不過當然, 溫泉唔可以影相,
所以只有上圖o既外觀俾大家睇睇。
結果好失敗咁,
7個外湯入面, 今次只係浸左3個......
小弟總結一吓點解城崎温泉可以成為日本人最想"再"去o既溫泉,
1) 有蟹做招徠
2) 成條街都係到外湯浸溫泉o既人, 大家都著住浴衣躂住木屐, 好有氣氛
3)比起草津嗰啲好熙來攘往o既溫泉街, 城崎温泉整體好閑適, 好適合放鬆心情
4) 7 個外湯, 兩日一夜真係好難浸得晒,
其實你明知浸晒都唔會有啲咩發生,
但總係會想完成晒7個外湯, 咁唯有只好再黎多次......
唔會下次小弟可唔可以完成埋另外四個呢。
懷住憧憬, 小弟就離開城崎, 向住鳥取進發。
今日天氣唔太好, 除左落雨之外, 啲風都幾大吓,
溫度又低, 加上有啲肚餓, 去左酒店放低左行里,
第一時間係食啲暖野先。
首先係去鳥取砂丘砂の美術館。
小弟上次因為行程時間唔夠, 都冇黎過,
難得今次有時間黎睇吓。
故名思意, 美術館主要用沙黎造出唔同o既示品。
題材係日本近期上畫o既Walking Dead 3。
懷住期待進入展館
・
・
・
・
・
・
・
・
・
・
・
點知.......
頂, 好似係上一期o既展覽完結左,
要用幾個月時間準備下一期展覽......
咁人地唔開都冇辦法架喇,
巴士又未到, 唯有去手信店逛吓睇吓。
上兩圖, 係講緊原來之前美術館
同動畫《クジラの子らは砂上に歌う》有合作,
有相關o既展出。
以為美術館冇開已經夠失望?
仲有更失望。
去到鳥取砂丘, 已經落起好大雨, 仲要刮強風。
本來打算打道回府的,
不過一場黎到, 又有啲唔甘心。
小弟就話黎過啫, 同行友人連啲沙都未點望到過......
多番爭扎之後, 人一世物一世, 去就去啦!
買左把膠遮就上路喇。
睇圖就當然平靜啦, 但事實上係真係企唔隱的,
連拎住單反, 部單反都俾風吹到搖搖吓。
遮只可以向住風向方向, 稍為斜啲都會吹反。
放大下兩圖細心啲睇, 可以睇到地面上吹住一層沙。
正常程況梗冇乜野啦, 但而家係落住兩,
沙應該係濕晒黐埋一堆堆的, 但咁都可以吹得起, 可想而知。
全景圖
反正個身都濕晒, 唔差在上埋最高嗰個砂丘「馬の背」。
因為過左馬の背就係海岸, 所以越往上走, 風就越大。
啲沙, 定係叫佢泥好? 兜口兜面刮埋黎, 真係好很痛。
因為大風o既關係, 把遮已經遮唔到雨水,
但對泥沙都仲係有一定作用, 起碼保護住小弟部單反先......
即使係咁, 上到馬の背, 8條遮骨已經斷左4條......
因為實在太大風, 加上成口成鼻都係沙,
留左唔夠10分鐘就閃人喇。
想睇靚o既鳥取沙砂,
可以睇番小弟之前o既遊記
http://japsleevefish.blogspot.com/2012/07/blog-post_26.html
結果係,
遮骨斷左5條, 另外3條都變晒型,
友人把宿骨遮報廢。
二人全身濕晒滴晒水, 頭髮全部都係沙,
有袋o既地方全部都有沙(包括相機袋), 鞋入晒沙
口、耳、鼻都係沙
上巴士都唔敢座污糟人地啲凳。
一番到酒店第一件事入廁所清潔,
起碼每人都沖左1公升o既砂出黎......
鞋要用風筒吹乾, 衫要拎去洗衣機洗......
咁惡劣環境o既日本旅行都真係第一次......
你好叻啦!7個浸左3個~我地外湯只係浸到1個 ^0^
回覆刪除妳都有去過城崎?
刪除