六日五夜 中獎免費機票魷 --- 第五日 再戰鳥取砂丘 + 姫路城

本身今日o既行程, 係輕輕鬆鬆瞓到10點check out,

然後慢慢搭車番去兵庫縣o既南面睇姫路城的,

不過小弟琴晚同同行o既友人講,

如果我地晨早爬起身的話,

都仲可以抽到啲時間再去一轉鳥取砂丘。

話晒都山長水遠一場黎到,

同行友人始終唔甘心,

所以決定今朝早啲起身, 睇下個天色再作決定。

6點幾爬起身, 打開窗簾,

天色唔可以話好靚, 但起碼見到部份藍天先,

於是二人決定起身梳洗, 再戰鳥取砂丘。

早上八點左右, 再次黎到鳥取砂丘。
皇天不負有心人總算叫做見到個似樣啲o既景色。

而且因為時間尚早,
所以鳥取砂丘基本上係冇乜人,
只有小貓三幾隻。
當然, 琴日打晒風, 都冇乜人o既......

因為仲未有太多人踏足o既關係,
一片片風力作用吹成, 波浪紋o既風紋清晰可見(上三圖)。

另外, 因為琴日落過雨黎,
所以見到一啲上次小弟都未見過o既景色(下兩圖),
應該係雨點之類造成的吧。

再次登上最高o既砂丘馬の背。

終於清楚見到個海。




全景

總算了左友人o既遺願, 可以安心起程去姫路城。

雖然之前兩日已經係城崎食左無數o既蟹,

但都係抵受唔住誘惑, 買左個蟹駅弁上車食。

(駅弁, 即係車站售賣o既便當, 通常會以當地特產入饌)

正呀喂。

搭兩個鐘左右o既車,
一下子由山陰o既鳥取(上圖左上)番番去山陽o既姫路(上圖左下)。

實在好抱歉, 小弟番黎寫BLOG,
先發覺, 除左手機打咭用o既兩張相之外,
冇用過個單反黎影姫路城......
原因係, 小弟幾年前都已經黎過, 今次純粹帶友人黎睇,
所以小弟只係伴讀書童一名。

想睇多啲有關姫路城o既相,
可以到小弟另一頁BLOG,
當時係同大學同學畢業旅行去的
四日三夜 廣島四國 旅行團 第三日 --- 明石海峽大橋 + 孫文紀念館 + 姬路城

睇完姫路城, 就番番去大阪, 住番原先嗰間酒店,
準備第二朝一早搭番飛機番香港。




因為第二日中午機, 都冇乜去邊, 冇野好講,
所以六日五夜中獎免費機票魷o既篇章黎到呢度就完結了,
多謝大家收看, 下一個章節再見。