六日五夜 中獎免費機票魷 --- 第二日 大阪HALL ANIMAX LIVE

今日o既話題比較宅, 冇興趣o既朋友可以跳過。

琴日嗰篇都提過,

今次係先有機票, 然後先搵演唱會睇。

睇o既係3/3於大阪HALL舉行o既ANIMAX MUSIX,

對小弟黎講, 重點當然係早見沙織啦。

第一次參加ANIMELO SUMMER LIVE (ASL)以外o既DD LIVE,
果然係各有特色。



ASL 會比較多唔同o既演出單位, 尤其是新人,
而ANIMAX MUSIX就比較精英制, 但會好多歌手o既collaboration,
同埋會唱好多カバー曲。

LIVE o既內容唔多講, 不過不得不提o既係,
小弟坐o既係上層走廊前一排,
咁啱仲要係正中間嗰個位, 正如上圖所見, 對正中線。

初初諗住, 上層都算啦, 都叫中間靚位。
點知中途, 村川梨衣同内田真礼坐住移動車,
係上層走廊兩端出現, 而且仲向住中間會合,
最後係小弟o既正後方唱左半手歌!!

小弟同 村川梨衣&内田真礼 o既距離, 可謂伸手可及,
雖然唔係一押し, 但都已經令小弟興奮不已。




睇完演唱會, 黎個小小o既回憶之旅。
有細心留意小弟個blog o既朋友都知,
呢個blog o既原點, 係基於小弟2011-2012年o既日本working holiday。
而當年小弟就主要以大阪為據點。

闊別6年, 再次探訪。
當年打工o既拉麵店雖然係點店, 而且已經一早倒閉,
但小弟好掛念當年係附近工作、遇到o既人,
所以想去探訪一下。

小弟主要係想探訪當年係附近開拉麵、飯店o既大門先生。
時間係晚上o既十點幾。
當然大部份o既店都已經關門,
但以夜店o既密度黎講, 好明顯比幾年前荒涼左好多......

上圖係當年小弟番工必定經過o既章魚燒小店,
係一對老夫婦經營。
章魚燒當然夜晚唔開啦。

好可惜, 除左章魚燒小店之外, 好多店都已經景物全非,
大門先生o既食肆亦都搵唔到......
當年大門先生仲話只要企得起身, 都會做落去.......

有一種感概......

下次有機會, 早少少黎探下章魚燒o既老夫婦啦。