七日六夜 觀禮帶團沖繩魷 --- 第四日 結婚行禮 + 沙灘煙花

行程黎到第四日, 亦都係今次黎沖繩o既主要目的,

就係見證一對新人o既誕生!

中午黎到位於読谷o既教堂, 真係天公造美,
因為成個行程都天陰陰,
唯獨今日全日都陽光普照,
想影靚人靚景, 要數好拍檔, 冇野好得過燦爛o既陽光!

見到個教堂, 都好難唔明白點解有咁多女生想黎行禮。
純白o既教堂, 透徹o既大玻璃, 無敵大海景, 陽光與海灘,
的確係令人趨之若鶩。

教堂內o既大玻璃幕場, 對住個大海景, 冇得輸。

完全係童話故事裏面o既一頁插畫。

禮成之後, 移師室外抛花球。

上圖係由教堂出面o既 沙灘望番去教堂,

而下圖就係個海岸。

難得黎到, 一對新人當然要補番輯相啦。

雖然成個婚禮只係短短個零兩個鐘,
但相信對一對新人, 同眾親友黎講,
都係一個永世難忘o既美好經歷。

中午係free time, 小弟帶住團員去美國村,
都係俾啲女士購物o既時間。
而小弟仍然係留係車上面補眠......

晚上, 一對新人請眾親友到酒店享受晚宴,

途中經過教堂, 黃昏剪影,

又係一幅美景。

食完晚宴, 小弟們去到酒店o既沙灘玩煙花,
都係團友們買黎玩的。
說來慚愧, 小弟係日本住左咁耐, 又黎過咁多次,
一次都未玩過日本o既煙花。



一對新人玩得不亦樂乎。

在此祝一對新人
永結同心 白頭偕老