七日六夜 觀禮帶團沖繩魷 --- 第二日 A&W + OUTLET MALL ASHIBINAA + 安里小店餃子

第二日行程, 新郎要打點吓啲野, 所以分頭行同,

因為小弟同行o既另外兩個麻甩佬都已經有家室&小朋友,

所以小弟車左佢地去沖繩某幾間local o既BB用品服裝店。

小弟毒拎一名, 膝下無兒女, 所以負責係架車上面瞓覺.......

到LUNCH時間, 小弟們黎到牧港o既A&W。

A&W係一間賣漢堡包o既快餐店。

小弟唔知香港啲旅遊書有冇介紹A&W,

但日本o既旅遊書就一定會介紹。

一來, 因為日本人一直都對美國有一種嚮往,

而A&W又係一間美式快餐店,

二來, A&W係日本第一間快餐店(註),

所以都有少少歷史意義。

(*A&W第一號店 屋宜原店 於1963開業,

因為當時沖繩仍然係歸美國管轄,

而沖繩於1972先歸還番俾日本,

所以如果唔計算1972年前o既沖繩A&W的話,

日本第一間o既快餐店會變成係另一間東京o既快餐廳)

小弟們黎到o既係牧港店, 因為呢間應該係比較最有規模嗰間。

上圖係設於泊車位旁o既點餐通話系統,
坐係車度, 透過系統o既通話器, 就連車都唔洗落,
就可以點外賣, 然後店員會拎埋黎俾你。
當然如果閣下係堂食的話, 就請將架車泊係冇系統o既泊位,
唔好阻礙有需要o既人。

小弟點左個A&W Burger (上圖左, 及下圖)
而朋友點左個牛堡(上圖右)



咁黎得人地o既店第一次試,
就梗係試下人地o既branded product啦。
淨係兩大舊cream cheese已經好吸引!!!

有樣野不得不讚o既, 係佢地o既出品,
但係同餐牌上面將相一模一樣,
唔會好似香港老麥咁, 影就大大份, 出品就縮晒水。
唔信大家上去A&W官網睇下網頁啲相, 同小弟張圖比較下。
https://www.awok.co.jp/menu-list/humberger/

另外, A&W出名o既係root beer (上圖黑色嗰杯)。
話就話Beer, 其實只係汽水。
小弟諗住黎得, 人一世物一世, 難飲都試下啦,
所以落單嗰時好決斷咁話要root beer。
個店員好貼心咁提醒,
話root beer啲味道有啲奇怪, 未必個個啱飲,
但小弟仍然係話要root beer。
唔知係因為見小弟係遊客, 定係店員一貫o既流程,
佢地好似都仲係擔心小弟們會唔啱飲,
特登拎左隻100ml左右o既細紙杯, 斟左一啖俾小弟試。
有時都唔想咁媚外, 但呢啲服務態度, 香港真係點都追唔上......

講番杯root beer汽水先.........其實陣味好似薑啤.........
所以唔洗擔心飲唔到。
最起碼, 一定好飲過Dr Pepper先.......

ANYWAY, 都講下啲負面野先,

炸雞塊係一個伏, 比柴皮還要鞋口.......

不過洋葱圈好正。點解香港唔係好食到洋葱圈?

食完LUNCH, 係時候去機場接機,

因為有兩位女士係下午到埗,

而因為加入左兩位女士o既關係,

下一個景點就係購物城ASHIBINAA。

好抱歉, 因為對於shopping, 小弟真係唔係太在行,
所以小弟都係留守係架車上面, 冇乜可以著墨o既野......
見到標提入黎o既朋友, 對唔住......orz

晚上, 新郎哥JOIN埋小弟們,
黎到一個叫安里o既地方食餃子。

如果有睇開小弟BLOG o既朋友,
都應該記得小弟上年已經帶朋友黎過一次。
無錯, 係同一個地方, 店o既名字叫べんり屋
因為一來, 食物平靚正,
二來, 環境比較地mou, 咁樣反而更有地道風味,
上次o既朋友都非常好評,
所以今次都將呢間店納入行程。
有關べんり屋店舖地點及介紹,
可以睇番之前o既文章
六日五夜 石垣沖繩中同魷 --- 第四日 浮潛睇鯨鯊&青の洞窟 + 首里城 + 安里窄巷夜店餃子

店舖最出名同搶手o既煎餃子,
一底10隻, 上圖係兩底。

酒逢知己千杯少, 有咩好得過同一班朋友又飲又食。