六日五夜 老套行程東京魷 --- 第二日 行街(上野、新宿、原宿) + 藤沢 牛たん 佐助

今日終於開始有內容喇,

不過一黎首先講明先,

唔好見到標題, 就期待小弟會介紹去邊度購物,

每個人都有擅長同唔擅長o既野,

而小弟最唔擅長就係shopping.......

由頭講起先,

住得係上野, 就梗係放啲行里係上野, 然後逛上野啦。

九點幾, 乜店都未開, 就行吓街市呢啲早開o既野先啦。

黎過上野咁多次, 都未黎過呢條地下食品街。

驚訝地, 入面都有幾多華人食材。
不過濕貨小弟們就唔會買架喇, 行個圈睇完,
磨夠時間就上番地面行アメ横町。

唔知點解小弟o既父母特別鍾情桃,
係上野行左幾轉, 都係睇下邊檔有靚o既桃賣。
當然, 六日o既行程先啱啱開始, 買桃梗係留番最後嗰日先買。
今日只係先睇定有邊檔買得過。

下一站係新宿。
都係不礙乎MUJI呀、大丸嗰啲囉。
小弟真係唔識行街SHOPPING的。
今日行街o既行程, 本身係家母話要多啲時間買野,
所以留左一整日俾佢地。
一早叫佢地自己check下有咩要買,
結果都係冇做功課, 唔知頭唔知路咁行左半日, 乜都冇買到.......

旁晚黎到原宿。
小弟都真係第一次行原宿大街(上一次係行裏原宿)

都真係有幾多潮野同有趣o既fashion。
其中最印像深刻o既, 係下圖o既T shirt。

無錯, 星球大戰嗰個, 應該係參照當年香港電影院o既海報。
本來小弟想買的, 不過冇小小弟個碼。



結果成家人都冇乜斬獲o既情況下行左一日.......

拎番啲行里之後, 下一站一跳,
就黎到神奈川縣o既藤沢。
因為聽日就會係主要行鎌倉一帶。
你會問點解唔聽日先黎呀,
原因有
1) 今晚下榻o既酒店平靚正, 所以早啲過黎瞓
2) 鎌倉一帶主要都係睇寺廟同自然環境, 開放時間較早,
一早黎到過夜, 第二日有多啲時間行。



Check in左之後, 去食晚飯喇。
係網上睇到呢間叫牛たん 佐助 o既店,
食牛脷好似好出名, 於是就黎光顧喇。

手繪o既menu, 好有親切感。
仲有掛到一個屋頂都係餸菜名。

黎得呢間野, 梗係食牛脷啦。
除左某啲小菜之外, main dish主要都係加有牛脷。

有焗啦、有火炙啦、有刺身啦,
真係有好多好多食法。
同埋仲會真係分牛脷o既唔同部份黎煮不同o既菜式。

另外, 鎌倉、江ノ島一帶都係盛產白飯魚的,

當然要黎個白飯魚湯泡飯啦。

食左好多牛, 埋單都唔洗$200一位, 價錢都OK。

食飽番去瞓, 準備聽日行萬里路。