六日五夜 老套行程東京魷 --- 第三日 紫陽花in長谷寺 + 鎌倉大佛 + 八幡宮 + 江之島

第一第二日都冇話有啲好實在o既景點,

黎到第三日, 終於叫做真正去觀光喇。

揀得係藤沢住, 就係貪佢係江ノ島電鉄o既總站

江ノ島電鉄簡稱「江ノ電」,

係江ノ島、鎌倉一帶o既路面電車,

大部份o既景點, 都可以靠江ノ電去到。

日本重視旅遊, 所以好多公交都會有優惠pass,
今次小弟就選用江ノ電1日乘車券,
600yen就可以無限出入閘,
基本上係兩三個站出入閘就已經回本, 係非常抵用的車飛。

車站月台。

等車o既時候, 睇下有咩單張小冊子介紹時令o既景點。

江ノ電有一段路係沿海岸行駛。
今日真係天公造美。

第一個行程黎到長谷駅,
由長谷駅步行到長谷寺參觀。

相信好多睇過東京旅遊書o既朋友,
對上圖嗰幾隻石公仔並不陌生,
佢就係長谷寺o既代表物之一。

不過長谷寺除左出名呢幾隻咁可愛o既石像之外,
係梅雨季節, 長谷寺仲係觀賞紫陽花o既景點。

陣間先番黎講紫陽花,
循例, 都先帶屋企人行上去長谷寺本堂(下圖)。

同埋由本堂對出o既觀景台, 一覽鎌倉一帶(下兩圖)。

番番黎講紫陽花喇。
既然係被稱為紫陽花o既名勝,
當然係會有特別安排啦。

每到6月梅雨季節, 至到夏天正式來臨之前,
就係紫陽花o既花期。
屆時長谷寺境內2500株紫陽花就會盛開,
而寺院就會設立觀賞紫陽花o既遊覽徑。

買飛進場。

係遊覽徑入口處, 已經擺放左大量o既紫陽花盤栽。

遊覽徑係「一方通行」,
即係單方向行走, 不回頭。
當然你話行轉頭兩步影個相係冇問題,
但就唔好逆線行番出去入口。

影相睇落啲花好似好稀疏咁,
其實係因為開花o既範圍實在好大,
所以影出黎啲花好似相對好細。

事實上成個山坡都係紫陽花, 甚為壯觀。

其實紫陽花除左有唔同顏色之外, 仲有好多品種。
單係長谷寺境內o既品種就多達40種。

漫山片野都係紫陽花。
只係2500株已經係咁,
日本有啲景點有成10000株以上,
真係好難想像......

呢三個石像, 好似係啲花叢中避暑咁。

成個遊覽徑唔係話好長, 行得快的話,
其實十五分鐘都行得晒。
不過係咁多咁靚o既紫陽花當中,
就算唔係特別愛好大自然o既朋友,
都難免要花啲時間影下相。
搞成45分鐘至一個鐘少不了。

佛祖都拎番支白色紫陽花黎趁熱鬧。




係長谷寺門外, 有個小店賣手信
當中有一啲日本傳統o既玩兒。
例如係紙球、竹蜻蜓咁。

上圖o既紫陽花圖案圍巾、手帕, 都幾靚幾受觀迎,

小弟每親都買左黎送禮自用。

標題都話到明係「老套行程」, 又點少得鎌倉大佛呢。
所以下一個行程就黎到鎌倉大佛所在地o既高德院喇。
同樣都係係長谷駅附近, 不過高德院比較偏東北少少。

俾左買路錢, 一行入去就已經見到鎌倉大佛。

供品竟然有晒瓜。

最初大佛係有瓦遮頭的,
不過係唔知邊一次o既地震(史料有亂及不足),
寺院被震壞之後,
就索性由得佢日晒雨淋喇......

第一次黎o既時候, 小弟o既遊記都講過,
大佛背面有兩個窗口,
驟眼睇好似章魚咁...... 差幾隻觸手......

下一站黎到江ノ島另一邊o既總站, 鎌倉駅喇。
呢邊對小弟們黎講冇乜特別好睇, 只係行吓街而已。
不過首先要祭左五臟廟先。

小弟上網check過, 係大街過一條o既細街,
有一間食「釜飯」(かまめし; 音: Kama Meshi)好出名o既店,
於是小弟就過黎食喇。

果然, 睇黎真係幾出名,
因為一來間店位置唔太易搵, 店面又殘殘舊舊咁,
但仍然要排隊, 仲要等成大半個鐘先有得入席。
當然, 店面細係其中一個原因,
但正常俾著係小弟, 都唔會特登黎到內街等食囉。

雖然店面係細, 但食物配搭選擇豐富。

首先講吓咩係釜飯先。

日文o既「釜」, 其實同中國古文o既意思一樣,

解作「鍋」、「鑊」之類o既煮食金屬容器

對香港人黎講, 最簡單o既比喻, 係煲仔飯。

嗯......其實都有啲距離:

首先佢地唔係用瓦煲, 而係用金屬兜。

不過個金屬兜有一個較厚o既底, 可以保持熱力。

另外, 就係啲餸係係之後先放上去,

因為咁, 所以可以見到有三文魚子、海膽等做餸。

白飯魚+蝦

三色(三文魚子、海膽、白飯魚)

白飯魚+蟹肉

為左唔好燙親客人同張枱,

個金屬兜係放係個木盒度。

正常, 當然係就咁食飯食餸啦,

可以食到食材o既原汁原味,

但站家都有詳細介紹可以有咩其他食法。

例如上圖咁, 分裝一啲飯餸,
然後加入下圖店家提供o既紫呀、七味粉等食用。

店家亦都提供有清湯,

可以化身為粥水咁食。

另外, 因為個金屬兜好熱o既關係,

個兜底點都會有啲飯焦,

大家亦可以加入清湯浸軟飯焦黎食用。

小弟最鐘意食o既日式甜點之一---わらび餅(わらび もち; 音: Warabi Mochi)

小弟一家確係唔係啲好適合行街買野o既人,

食完飯, 係鎌倉一帶大街o既店舖望多兩眼,

就去鶴岡八幡宮行吓喇。

一大堆中學生, 似乎係學校旅行。

可能因為近日本o既七夕祭o既關係,
成個鶴岡八幡宮都掛有好多飄吓飄吓o既野。

要知道 日本自明治維新之後,
除左中秋賞月之後,
所以節日都改為跟隨新曆曆法,
所以七夕都跟住移動到新曆7月7日。

有關鶴岡八幡宮o既歷史,
要數番去鎌倉幕府o既開端源頼朝同佢既源事家族。
不過事實上又冇乜好興趣o既故事, 呢度就唔多講喇。



最後一站, 當然要去望吓江ノ島。
由江ノ電o既江ノ島駅, 行15至20分鐘就可以到達。

江ノ島本身係一個小島,
成個島都係一個小山,
所以如果要遊覽江ノ島同埋上面o既江島神社,
一般都會利用扶手電梯。

上圖係扶手電梯o既入口。
扶手電梯分左好幾段路, 有唔同o既收費,
不過一般正常遊客, 都係會買來回全包o既票架喇。
下圖可以見到收費表。

本身帶屋企人黎江ノ島, 並唔係話去參拜江島神社,
話晒今日都已經睇左唔少神社寺廟,
其實小弟係想帶屋企人上江ノ島山頂上面,
嗰個江ノ島view tower睇日落。
不過好遺憾, 雖然日間比較曬,
但黃昏時比較多雲, 應該都唔係睇到日落,
所以小弟們一家決定放棄上, 連扶手電梯o既錢都慳番。

上圖係走人嗰時係海邊影的。
如果想睇江ノ島view tower o既夜景,
可以參考小弟之前o既文章。
七日六夜 東京鎌倉 自魷行 第三日 --- 鎌倉 + 江ノ島



行左成日,
番酒店放低啲行里之後,
就去到酒店附近o既某間碳燒海產店食晚飯。

都係啦, 係日本o既食店介紹網「食べログ」搜尋番黎的。

去到日式碳燒海產店, 唔可以唔食燒蟹膏,
呢間店o既燒蟹膏, 仲會加入鵪鶉蛋, 好香!

明太子漬飯

呢餐全海產咁濟, 所以比較貴,
但講緊都只不過係人頭3000yen左右。
淨係手掌咁大o既帶子都每人食左兩隻, 價錢算公道啦下話。

就咁, 就完成左勁老土套o既江ノ島鎌倉一日遊。
其實鎌倉一帶都仲有唔少景點同購物的,
有與趣可以參考一吓小弟之前o既文章。

七日六夜 東京鎌倉 自魷行 第三日 --- 鎌倉 + 江ノ島

日本 Working Holiday 的350天 小田原城+江ノ島