魷日記: 七日六夜本州極西櫻花魷 --- 第一日廣島 + 錦帶橋夜櫻

期待已久o既本州西部旅行出現了。

小弟一直都好想可以征服山口県,

不過因為啲景點唔係話太多, 亦都比較分散,

所以一直都未探索呢一帶。

今次因為早見沙織o既巡迴演唱會頭兩站係広島同大阪,

仲要撞著係本州西部o既櫻花季節,

所以決定早幾日去到, 玩完山口県同広島県,

然後先去早見沙織o既演唱會。

今次o既行程大約如上圖所示,

先由広島空港著陸, 然後一路向西玩過去,

然後番黎広島、大阪聽演唱會,

再由大阪o既関西国際空港返港。

因為広島空港比較隔涉,
所以落左機之後,
要先駁巴士到下圖o既白市駅,
再轉JR到廣島。

其實広島空港本身有巴士直達広島市中心。
不過因為小弟今次旅行用o既係青春18車票,
可以五日無限任搭JR(普通車),
所以會選擇搭巴士到最近機場o既白市駅, 再轉JR到広島。

係月台等車, 對面全部都係開晒o既櫻花樹,
令小弟更進一步期待黎緊幾日o既行程!!!

搭45分鐘左右JR到達広島駅。
因為上機到而家都未食過正餐o既關係,
係去下一站之前, 先係広島駅附近搵野食。

有去過日本o既二三線城市o既朋友可能會發現,
日本啲食肆小店, 好多時淨係開午市同晚市,
中間下午茶好多時都唔開舖......
小時而家正正就係四點零五點呢個時間帶......

landing黎到広島, 第一餐一定要係食広島o既お好み焼き啦。
不過因為正如上面提到, 好多店都打左烊,
所以小弟o既選擇有限。
勁肚餓, 都唔理得咁多......

於是黎到車站旁商場一間叫徳川o既店食お好み焼き。

都唔難明白點下午茶時段多數都唔開,
成間店都真係冇人......
得小弟, 同埋隔黎枱o既兩位老外。

大阪又係お好み焼き, 広島又係お好み焼き, 兩者有咩分別呢。
當然, 餸菜就有好多配搭, 但主要o既分別,
在於広島o既お好み焼き係有麵底(下圖),
而大阪就冇。

啱晒,
小弟而家真係老虎都食到兩隻,
冇個麵底邊夠飽。

另外, 食お好み焼き, 店家有機會問你, 用碟食定用煎板食。
用碟的話, 店家就會食個整好左o既お好み焼き放上碟黎俾你食,
如果用煎板(上圖隻碟背後金屬板),
店家就會開火熱住塊鐵板, 然後放個用煎板上鐵板,
客人一邊熱住塊お好み焼き一邊熱辣辣咁食。

食飽飽, 距離下一班車仲有少少時間,
於是逛下車站前o既手信店集合。

広島有好多柑橘、檸檬類o既作物,
而另外一樣広島特產, 就係「もみじ饅頭」。
(直譯: 紅葉饅頭, 音: Mo-Mi-Ji Man-Juh)

其實只係紅葉形狀有餡o既蛋糕仔。
當然, 餡有好多種, 而小弟揀o既餡係紅豆粒,
貪佢有口感。

小弟今趟旅程oo既第一個景點,

係山口県o既錦帯橋,

要由広島搭車往西行, 到達岩国駅再轉巴士。

其實講直線距離的話,
西岩国駅應該係比岩国駅更近錦帯橋,
不過因為岩国駅先係正站 (唔係東南西北嗰啲副站),
所以岩国駅會比較多巴士路線到錦帯橋。

搭十零番鐘車就到達錦帯橋喇~
錦帯橋係一條由五個拱連合而成o既木橋,
橫跨錦川兩岸。

錦帯橋最初係1673年由岩国藩藩主吉川広嘉所建。
因為當年經常有洪水, 而河道又寬闊,
所以好難正正經經咁起一條橋。
靈機一觸, 加上知道杭州西湖有一條6連拱橋,
於是決定都起番一條5連拱橋, 成為左有名o既錦帯橋。

當然, 原本嗰條橋已經係1950年沖散左,
而家見到o既錦帯橋係重建品。

老實講, 就咁一條錦帯橋的話,
小弟係唔會特登走黎山卡啦睇的,
不過有櫻花的話, 件事就完全唔同晒。

小弟之前都講過,
就咁一大片櫻花的話, 其實都唔係話特別好睇 :
見到→哦→that's all。
最重要係要有相對o既景物襯托番。

京都o既古剎配櫻花如昰,
錦帯橋亦都要有櫻花, 小弟先覺得係黎得值得。
(當然, 你可以唔認同小弟)

ANYWAY, 時間係黃昏,
但可以見到對面岸啲屋台仍然營商,
因為係櫻花季節, 錦帯橋會有晚間light up,
所以沿岸o既屋台仍然會一直業到晚上。

岩国一帶除左有錦帯橋之外,
仲有鵜飼(上圖)同埋岩国城(下圖)。
不過而家唔係鵜飼o既季節。
至於岩国城, 本身小弟都諗住好唔好去睇吓的,
不過綜合網上o既資訊, 岩国城好似有啲流,
所以都係免了......

(有關咩係鵜飼, 可以參考吓小弟之前o既BLOG
宇治川鵜飼
六日五夜日本中部帶人魷第五日 --- 高山 + 白川鄉 + 岐阜長良川鵜飼
)