魷日記: 七日六夜本州極西櫻花魷 --- 第二日錦帶橋 + 秋芳洞 + 下關

最初o既計劃, 係早少少起身,

然後上去山上面o既岩国城參觀的,

不過綜合網上資訊, 都係話岩国城一般般,

所以決定留多啲時間影錦帯橋。

晨早流流七點鐘就爬起身去影相,

真係番工都冇咁神心......

正正式式黎番個錦帯橋全貌先

河岸o既櫻花同埋山頂上o既岩国城

岩国城close up

琴日提過o既錦川鵜飼o既船隻。

不過都係嗰句啦, 而家唔係鵜飼o既季節,

一般要五六月先開始。

唔知係咪有啲咩活動定交流,

晨早流流就有啲小弟懷疑係美軍官兵o既人士係錦帯橋一帶遊覽。

琴晚擺夜店o既地方, 早上靜英英,

好難想像琴晚同一個地方係咁熱鬧。

琴日主要係影夜櫻,

今日影番多啲條橋先。

(有關錦帯橋o既介紹, 請睇番琴日編BLOG)

其實每一個拱o既基部, 斜率都幾大。

其中一個石基

由橋上望番過去河岸

以下o既都係橋同櫻花o既相。
成日都話, 陽光係攝影人士最好o既朋友。
天氣好, 就算係唔識影相o既小弟,
一樣可以影到靚相。

不過大家唔好見咁風和日麗,
其實溫度得6-9度,
仲要吹住風, 體感得4-5度......

最慘係, 本身日本天氣預報話有十零度,
所以今個trip小弟冇話帶咩厚衫,
小弟著到最厚, 都只係得短袖+長袖+風褸,
完全抵唔住家吓o既溫度......

ANYWAY睇相

影夠本(同埋頂唔順咁凍......),

番番旅館執埋行里, 然後去錦帯橋o既巴士站,

出發去下一個目的地。

時間只不過係八點半。

等巴士o既時候, 發現一部自動售賣機,

好有趣地, 佢係售賣巴士乘車優惠票......

咁就連票務員都慳番。

搭巴士番去岩国駅,
然後轉JR去到新山口駅。
講好似好輕鬆, 但其實都搭左兩個鐘。

成日都話, 個車站or地區, 就算係用番個黎命名,
都唔保證一定係好繁華。
山口就係一個好好o既例子。

下圖就係新山口駅前面最繁華嗰段路......
繁華到小弟想搵啲野食下都冇......
超市、商場、電器舖欠奉。

你可能會話, 新山口駅仲新丫嘛。
小弟可以話你知, 山口駅仲靜,
聽日你就知......

日本近代詩人(俳句): 種田山頭火 o既人像。
不過小弟不太認識佢,
大家有興趣可以wiki一下。

小弟下一個目的地係秋芳洞,
要由新山口駅o既巴士站搭巴士過去,
不過距離下一班車仲有一段時間,
於是去搵野食。

本身都冇諗住話特別要食啲咩,
不過用手機求其search山口県郷土料理,
發現一樣叫かわらそば (音:Kawara Soba)o既野,
直接套用漢字的話, 係「瓦蕎麦」。

唔知係乜架科,
不過咁啱車站底下有兩間食店都有提供,
於是求其入左其中一間黎食。

點左上圖呢個かわらそば天婦羅定食,
而主角瓦蕎麥, 就係下圖呢一堆野。

所謂o既瓦蕎麥, 係熱食o既蕎麥麵。

將煮熟左o既蕎麥麵放係燒熱左o既瓦製器皿,

然後伴以蛋絲、葱、紫菜, 等等。

最特別o既係, 大家一定會留意到, 放係麵上面,

嗰兩片檸檬同埋上面一啲橙色o既野。

嗰堆橙色o既野日本人叫もみじおろし(音: Momiji Orosi),

直譯係「紅葉蘿蔔泥」, 其實係混有辣椒o既生白蘿蔔泥。

瓦蕎麥o既出處, 據說係當年日本西南戰爭嗰時,

薩摩軍露宿時隨手燒熱啲瓦片黎煎野煮野食,

後來山口県川棚温泉o既其中一個旅館負責,

模枋呢個手法, 作為旅館膳食提供俾客人,

久而久之變左山口県o既本土料理。

ANYWAY, 歷史我唔太關心,

我比較關心o既, 係嗰兩片檸檬係點食......

上網search, 都唔係好覺啲人會講點處理嗰兩片檸檬。

以小弟有限o既腦筋, 得出三個可能性:

1) 連埋麵同蘿蔔泥, 成塊檸檬食

2) 啜啲檸檬汁黎食麵同蘿蔔泥

3) 其實得個睇字, 唔洗食

諗得太耐都冇用, 啲麵都就快凍,

二話不說, 先將麵放上塊檸檬, 連埋蘿蔔泥一齊放入口。

......

嗯

......

應該唔係咁食法orz......

再諗吓, 佢地將檸檬切成片狀,

應該都唔會預你會啜佢啲汁(如果唔係, 應該係切一楷楷),

所以(2)應該都唔係。

於是小弟最後決定放任第二片檸檬,

淨係用紅葉蘿蔔泥黎餸麵。

點解食個麵都要做咁多推理......

食完。

直接啲講句, 其實好唔好食,

小弟覺得係完全係靠啲配料o既味煮得好唔好,

同塊瓦片一啲關係都冇,

所以得罪講句, 瓦蕎麥, 其實只係食個賣相......

或者可能係小弟未食到真係好食o既瓦蕎麥啦......(即刻帶頭盔)

差唔多係時候上巴士。
係新山口駅o既另一邊,
有一個幾新淨o既巴士站連休息室。

係休息室有各巴士路線o既資訊,
同埋上圖右手邊呢個自動售票機。

小弟坐o既係直達秋芳洞o既巴士,
盛惠1170yen。

車頭大大隻字寫住秋芳洞,
一定唔會搭錯。

其實有唔同o既車站都有巴士駁去秋芳洞,
不過班次唔係好密, 尾班車亦都比較早,
所以大家去秋芳洞之前, 最好check清楚。

以下係官方o既交通資訊, 雖然右上角有提供外語選擇,
但有關巴士路線及班次的話, 只有日語先夠詳細。
不過漢字圈o既朋友應該都睇得明o既。
https://karusuto.com/access/
(小弟本編BLOG 2019年7月 update)

搭大半個鐘巴士左右就到達上圖o既秋芳洞巴士總站,
大部份來往秋芳洞, 及美祢一帶o既巴士都會停呢度。

雖然係咁, 要進入秋芳洞,
仍然要行大約3-5分鐘o既一段路。
不過只係一條直路, 唔好同小弟講咁都要唔識行。

又一次體現日本萬物皆可萌o既精神。

直路o既最尾就係秋芳洞喇。
講左咁耐, 咩係秋芳洞呢。

秋芳洞 (あきよしどう, 音: Aki Yoshi Doh)ki Yoshi Doh),
係日本最大規模o既鐘乳石洞,
被日本指定為「特別天然記念物」、「国定公園」、
「日本の地質百選」以及「日本GEO PARK」。

上圖係秋芳洞o既售票處,
而下圖係秋芳洞o既平面圖。

入場費要1200yen,
以日本景點黎講, 算係比較貴o既類別。
買左飛, 經過上面短短o既路之後,
好快會見到下圖o既洞口。

同大部份o既洞穴一樣,
洞入面都係比較凍同埋濕。
黑就唔洗講架啦。

係入口附近, 有一個叫冒險COURSE o既牌,
好似話自己放低300yen, 拎番個頭盔帶,
就可以自己爬一段約100米o既路桯。
日本人呢種佛系管理真係好正。

如果爬冒險COURSE,
就會係上圖呢個樓梯落番黎。

ANYWAY, 就小弟所見, 只係爬吓石頭,
好似冇乜特別, 加上小弟因為有少少趕路,
所以就免了。

洞入面有好多唔同形態o既鐘乳石同埋地貌,
小弟簡一啲比較特別o既or有睇頭o既放上黎。

百枚皿,
好似一個小型梯田咁

洞內富士......
其實冇乜野, 只係一舊比較白少少o既石,
同埋個形狀似富士山而矣......

由洞內高處望番過去千町田 (上圖中下部比較黑o既一片)
同時可以見到洞o既上方, 一支支o既鐘乳石 (上、下圖),
命名為「傘林」, 好似一把把遮吊住係度咁。
睇就好睇, 跌一條落黎真係插死人。

頭先提過o既千町田,
其實好似百枚皿咁, 不過係一個平面。
下圖係長時間曝光o既相片。

繼續向裏面行。

洞一面其中一個主打景點, 黃金柱。
係一條勁粗o既鐘乳石, 高5米。

相比之下, 上圖o既大黑柱就相形見拙。

下面仲有好多其大洞內o既地貌,
相片次序未必按實際遊步道次序,
請見諒。

「瑪利亞觀音」, 咁係瑪利亞定觀音???

成個遊步道大約1公里,
雖然兩邊同途中都有出口,
但如果遊人都係出番去頭先個巴士站搭巴士的話,
一般都係行到最尾之後沿路行番轉頭。

如果正正常常咁行的話,
30-45分鐘可以行完成個洞出番黎,
如果好似小弟咁細心啲睇、又影下相咁,
可以磨到一個至個半鐘。

至於講番成個洞,
面積的確唔細, 亦都幾多鐘乳石o既地貌,
不過唔知係咪因為小弟去過中國天子山嗰個黃龍洞,
相比之下秋芳洞就有少少遜色,
無論係大少、鐘乳石數量、地貌、特色等等......
其實唔係秋芳洞唔好, 只怪小弟去過黃龍洞在先。