魷日記: 七日六夜本州極西櫻花魷 --- 第四日嚴島神社

広島o既宮島厳島神社,

可以話係西日本其中一個最多人去o既景點,

而事實上, 小弟都係第二次黎,

(可參閱四日三夜廣島四國旅行團第一日 --- 厳島神社)

今次同上次唔同o既係, 今次有櫻花~

啱啱呢晚係新山口駅o既酒店,

非常之平靚正, 因為價錢抵之外,

仲包免費早餐。

平時唔食早餐o既小弟,

因為今日上午行程比較長o既關係,

點都要食少少野頂吓肚先。

食早餐o既地點, 係酒店o既頂層,

可以望住新山口駅呢個咁開掦o既景,

個人都開心啲。

到達宮島口駅, 望向海邊方向,
就可以見到接駁到宮島(厳島)o既乘船巷口。

又要係度介紹下JR青春18車飛,
JR青春18除左可以任搭JR鐵路之外,
仲包括乘搭一啲由JR營運o既公交,
而通向宮島o既船就係其中之一。

事實上除左JR之外,
仲有另一間公司營運接駁宮島o既船,
所以用青春18 o既朋友要清楚先好入閘上船。

小弟拎住青春18, 就當然係搭JR o既船啦。

十零分鐘o既船程,

半路已經可以見到厳島神社o既海中大鳥居。

不過小弟更加想睇o既係櫻花。

所以上圖個鳥居唔係正中間係有原因的,

因為小弟主要係想影粉紅色嗰堆櫻花。

出左碼頭, 站外對出。

通向厳島神社o既路, 右手邊係海。

閣下冇睇錯, 係鹿。
鹿唔一定係奈良先有,
成個宮島上面都有為數唔少o既鹿。

潮漲時會有船出航, 遊覽並穿過大鳥居,
成人800yen, 小朋友400yen。

宮島上面其實有唔少o既景點,
不過首先, 當然係黎左厳島神社先啦。

係度抄番自己個blog N年前寫o既介紹文先:

係日本歷史中, 有一個好傳奇o既人物叫平清盛 (1118 ~ 1181, 享年64),
平清盛係日本史首位由武士, 被破格升為公卿o既人。
(日本階級觀念極重, 傳統上武士一般被認為係為有錢人工作o既下人)
而厳島神社就係平清盛呢位仁兄最風光o既時期所建o既神社,
可惜神社係1168年受祝融所破壞,
而家o既厳島神社, 係係1207年所建。

逢親日本o既神社仕口都會有架喇,
用黎洗手o既出水口。

上圖係厳島神社o既通道,
木板下面就係潮間濕地,
潮漲時會邊淺攤, 潮退時會邊沙灘。
可以見到木板之間有比較大o既縫隙,
並唔係話啲工人手工馬虎,
而係因為避免大潮時水位過高, 將建築物沖爛,
所以特登加大啲道縫, 令到地板更疏水。

上下圖呢條橋, 好似話係只有天皇派黎o既專員先可以用。
不過條橋斜到咁, 其實係咪同天皇過喎去?

上下圖可以見到, 建築群大部份都係建係淺灘之上。

上圖就係打咭o既地點, 平舞台, 同埋舞台對出o既景喇。
個個都會係度排隊等影相。

事實上, 厳島神社小弟以前已經黎過,

今次主要係黎影相影櫻花,

入厳島神社都只係列行公事。

離開厳島神社主建築, 開始島上o既遊覽。

唔睇牌都認得佢, 九尾松。

厳島神社北面o既五重塔。

大家睇見影出黎o既相, 好似都有若干櫻花,
但呢啲其實都係攝影o既把戲,
事實上只係得嗰幾棵,
不過只要就吓角度, 就可以影到好似俾啲櫻花包住咁......

豊国神社, 又名千畳閣,
不過與其話係神社, 更加似一個大o既會堂

係咪? 根本係一個會堂。
而下圖o既神壇, 只係佔一個好小o既旮旯。

木紋, 見証左歲月。

下兩圖係由千畳閣望番落厳島神社。

宮島其實係一個有番咁上下面積o既島,
厳島神社同埋附近o既建築群只係佔好小o既地方,
事實上黎宮島除左可以睇厳島神社之外,
仲可以黎個小小o既郊遊, 遠足到宮島o既高崗上。

時間充裕, 腳骨力又好的話, 可以直接步行到弥山山頂上,
但正常的話, 都係搭纜車。
上圖o既門牌, 就係纜車o既入口。
話就話入口, 但就距離登車o既位置仲有段距離。
唔想行十分鐘到登山纜車站的話,
可以係下圖o既巴士站等接駁巴士。

係接駁巴士站附o既店舖, 都可以買到登山纜車o既票,
冇話特別平, 但好似買左先會安心啲,
所以小弟都係買定先。
但事實上, 可以唔洗咁早買住......陣間再講多啲......

小弟選擇唔搭接駁巴士, 行大約十分鐘到纜車站,
睇下有冇機會同更多o既櫻花邂逅。

不過冇乜......

沿路都有好清晰o既指示牌,
一定唔會盪失路。

黎到纜車站了。
好可惜, 因為話當刻太大風o既關係,
纜車暫停運作, 停到幾時冇人知......

小弟因為時間唔係話好多,
所以set左個deadline, 等45分鐘睇吓點,
點知......一直都冇重開o既跡象......
於是小弟決定放棄呢趟登山遠足之旅......

吓? 咁小弟買左o既纜車票點算?

呢啲野, 日本仔又好均真o既,
去番受付窗口, 可以辦理全額退票~

呢度講番, 點解唔好預先係頭先山腳接駁巴士附近買纜車票,
咁係因為山腳唔會知道纜車運行情況,
如果買左, 就好似小弟咁要搞退票。
當然, 唔會話唔退o既,
但如果上到黎纜車站發現根本唔運作,
咁直頭票都唔洗買, 退票手續都慳番。
反正纜車票又冇quota, 唔會話冇得買。

下圖係纜車站o既一啲介紹展版,
上面介紹o既就係宮島弥山山頂o既展望台,
且埋沿途o既一啲景點。

如果唔係大風的話......

因為冇上到弥山, 所以多左少少時間,
閒逛一下厳島神社同碼頭之間o既購物店食店。
而第一間遇到o既, 就係下圖呢間廣島燒蠔專門店。

小弟對呢間店有興趣, 唔係因為呢間店特別出名,
而係因為小弟2008年同大學同學畢業旅行,
就係呢間店一齊買燒蠔食......一見到呢間店就勾番起好多回憶。

當年呢間店規模未有咁大, 亦都冇咁多人幫襯。
而家閒閒地要排十零廿分鐘。
不過, 冇變o既係......

......唔係啲蠔, 而係價錢!!!!!!
同11年前一樣, 500yen一碟兩隻,
啲size同當年都差唔多。

好難想像, 一個地方可以零通漲到咁o既地步......

當然, 啲蠔o既味道都冇變。

比起其他蠔, 廣島蠔唔係好大隻好creamy嗰種,
而係比較細隻, 但肉地結實, 味道亦較濃。

等左一輸等唔到o既纜車, 同埋食左兩隻蠔,
行到出厳島神社, 遇著退潮。

退左潮, 大家可以直接行到海中大鳥居。

上圖可以見到, 碌木同人o既比例!

柱腳除左好多藤壺之外,
仲有好多日圓硬幣,
日本人好鐘意將啲硬幣係神社寺廟呢度攝嗰度攝......

仲有成地都係。
大家唔怕俾天收的話, 可以黎執啲盤川......

上次黎都冇留意到,
原來海中大鳥居o既前後牌扁寫o既野係唔同。

鳥居向海嗰邊係寫住大家都睇得明o既嚴嶋神社。

(「嶋」係「島」o既日文異體字)

而向陸地嗰邊係寫住伊都岐島神社。

點解係伊都岐島?

咁係因為日本採用漢字係比較後其o既事,

早期好多日本本土o既字詞, 都未有好統一o既漢字表記,

所以會出現同一個讀音, 有唔同o既對應漢字,

(情況就好似Sofa, 有啲人會寫「梳化」有啲人叫「沙發」)

而伊都岐島神社就係曾經用過一段時間o既漢字表記。

由鳥居望番向主建築群。

離開鳥居, 見到有好多日本人係遠離鳥居o既淺灘摸硯。

記得, 大家想摸埋一份都好, 唔好係鳥居附近!!!

神社係神o既地頭, 神社一帶o既花草鳥獸都唔可以搞,

入鄉隨俗, 你就算唔相信日本神道教都係咁話。

黎到商店街。

黎到廣鳥, 其中一樣出名o既食物,

就係炸紅葉......饅頭。

記唔記得小弟第一日係廣島駅買o既紅葉饅頭?

(詳見七日六夜本州極西櫻花魷 --- 第一日廣島 + 錦帶橋夜櫻)

而呎度, 更加會炸啲呢饅頭黎食。

其實都冇預過會好特別,

不過唔係貴, 又冇所事事, 買黎試下。

見到上圖呢一間咁多人排隊, 小弟又排埋一份。

而家乜都自動化, 排隊前先到自動售賣機購票,

要買幾多個, 自己撳。

買完票先好排隊, 如果唔係排到埋去都係得個吉......

有四種味道, 大家識英文架啦?

小弟揀左紅豆同檸檬。

日日做到冇停手......

炸出黎個樣又幾靚喎衰鬼。

上圖係檸檬, 下圖係紅豆。
本身小弟檸檬會酸, 因為小弟鐘意酸美美o既野。
不過日本人果然係嚐甜......
味道有啲似嘉頓好老套嗰隻檸檬夾心餅o既嗰層檸檬cream咁,
再甜少少。

而紅豆飴就相對冇乜特別,
只係因為炸熱左, 紅豆o既香味會再出啲。

時間係下午o既三點,
啱啱又食左兩個炸紅葉饅頭,
所以一啲都唔肚餓,
不過行過食蠔o既專門店,
總係會望多兩眼。

見到個餐牌好似好正咁, 已經心郁郁,
加上店員熱情o既拉客,
小弟就身不由己咁行左入店......

叫左上圖餐牌左上角第二排第一個o既蠔三景定食,
內容包括生蠔、燒蠔、炸蠔, 同埋蠔飯。
+800yen仲可以將蠔飯改為穴子飯(海鰻)
不過小弟一向對穴子冇乜興趣, 所以要番蠔飯算。

因為製作需時, 店家好貼心咁,
為每一個客人準備一部smartphone,
播放夏天時厳島神社o既花火大會片段。

小弟不得不讚呢個一石二鳥o既做法。
一來, 可以唔會令客人覺得悶,
二來, 又可以吸引遊客再黎宮島,
事關小弟以前都聽聞厳島神社o既花火大會,
係日本數一數二精彩o既花火大會,
咁樣睇一睇呢段片, 又真係好正似好正咁,
令小弟好有衝動夏天黎睇一次花火大會。

唔知係咪計好左時間,
段片播完左, 啲食物就差唔多上枱。