琴晚早左番酒店休息都好,
今朝可以早啲出發去賞櫻,
同埋應付今日全日豐富o既行程。
七點幾八點爬起身,
首先係搭JR到上圖o既尾道駅。
就首唔係因為櫻花, 尾道本身都係一個略有明氣o既旅遊地點。
因為尾道出左名好多斜坡、梯級,
而民居依山而建, 加上岸邊o既碼頭同埋對面o既「向島」,
造就尾道獨特o既風格, 令到尾道成為好多電影同劇集o既取景地點。
而經典動畫《蒼穹のファフナー》同埋近期o既《ソラとウミのアイダ》,
都係以尾道為舞台。
不過小弟今次時間有限, 又以賞櫻為主,
所以冇做到動漫聖巡。
今日黎o既係千光寺公園,
香港人可能未必聽過,
但千光寺公園係広島數一數二o既賞櫻地點之一。
而家旅行方便之處, 就係打開手機,
只要有電有訊號就一定唔會盪失路。
跟住地圖, 好快就搵到上千光寺公園o既路標。
果然係尾道......一黎已經係無盡o既階級......
千光寺公園位處一個小山崗上面,
除左行路之外, 其實仲可以坐纜車,
不過纜車站o既位置距離尾道駅有少少遠,
加上小弟想慢慢欣賞風景,
所以都係慢慢步行上山。
果然不負所望, 沿路一直都有好多櫻花。
經過尾道城。
話就話尾道城, 但其實只係一個城樓外型o既建築,
冇任何文化歷史意義。
因為冇人打理加上日久失修,
有傳好快就會清拆。
係尾道城對出, 有一個小空地,
同埋一個簡單o既一層瞭望台,
係度望番落去尾道港, 都幾好view。
係瞭望台隔黎有一棵櫻花樹,
如果只可以用一個詞語黎形容呢棵櫻花樹的話,
小弟會講係「怒放」!
冇第二個字可以代替。
每一朵櫻花都係撐到最大, 開到最行,
而且每一個枝頭都堆滿花, 現場睇十分震撼!
其實唔係行好耐, 連影相,
都係廿分鐘左右就上到千光寺公園。
果然係広島賞櫻名所,
放眼過去, 全部都係櫻花, 求其影都一大堆。
小弟唔多講喇, 大家慢慢睇相。
熟識日本, 又式者有爬開小弟文章o既朋友都應該知道,
日本o既公園, 同香港非常唔同。
除左非常之大之外, 一般仲有好多其他文娛康樂設施,
上圖就係園區內o既尾道美術館,
而行過少少就係下圖o既瞭望塔。
瞭望塔除左頂層露天之外,
中間其實仲有一層係食肆,
食物都唔係話好特別, 都係一般日本常見o既烏冬嗰啲咁,
不過大家可以一邊食一邊欣賞尾道港o既景色。
上下二圖都係瞭望塔o既景色。
係千光寺公園逗留左大半個鐘,
係時候預番少少時間, 開始慢慢行落山。
其實除左櫻花之外, 千光寺公園都有另外一啲景點,
下圖o既鼓岩就係其中之一。
鼓岩係千光寺一帶第二大o既岩石,
可能因為岩石o既裂紋等因素,
係岩石o既特定地方用鎚仔敲打,
岩石會發出清脆o既PON PON聲。
係岩石上有鐵鏈綁住一個鎚仔,
大家都排住隊試下敲打。
尾道真係有好多斜坡梯級,
不過大部份都鋪砌得好好, 所以唔會話好難行。
正路的話, 出左車站沿住路軌行,
會見到上圖呢個路口仔, 係一條穿過火車軌o既小洞,
唔留心的話都真係好易會miss左。
由尾道駅望番向山頂方向。
好怱怱忙忙咁遊覽完千光寺公園,
係時候番番去広島市中心,
事關小弟本身就係為左黎睇早見沙織演唱會先會黎広島。
先係去會場排物販,
1300到達JMSアステールプラザ, 1500買完走人,
距離正式開場時間仲有兩個幾鐘, 見冇乜野做,
於是去附近o既広島平和記念公園行吓。
唔洗介紹, 大家對下面呢個建築應該都好熟識。
就係広島原発ドーム對面岸,
有好多人係河堤下o既櫻花園之間賞花。
二次大家, 美軍係日本o既広島同長崎投放左兩個原子彈,
促成左日軍投降。
大家要知道, 原子彈最大威力唔係掟落地等佢爆,
而係著地前係空中引爆。
広島原発ドーム, 被炸之時係広島県産業奨励館,
因為原子彈係係呢個建築物o既上方被引爆,
所以只有受到向下o既風壓所波及, 而唔係橫向o既風壓。
加上可能呢個建築物比較真材實料,
所以被原子彈炸過之外, 仍能保持大家而家見到o既狀態。
行左個圈, 打左個咭, 仲有好多時間淨,
唯冇再行埋平和記念資料館。
老老實實, 小弟一直都認為,
日本俾人用原子彈, 係國家層面, 係自己攞黎的,
因為始終佢係發動戰爭, 侵略其他國家o既始作俑者之一,
但入到平和記念資料館, 見到好多當年平民o既慘況,
又不禁令人惋惜。
總之啦, 戰爭唔係好事......
因為館入面唔可影相o既關係, 所以都冇相放上黎啦。
不過, 如果想了解下原子彈造成o既破壞,
同埋核幅射對人o既遺害, 大家不妨入去參觀一下。
睇完平和記念資料館, 時間都差唔多,
係時候睇早見沙織Concert Tour 2019 "JUNCTION"広島公演。
演唱會o既野唔係度多講喇,
完左演唱會, 番番去広島駅,
因為小弟下榻o既酒店係車站隔黎。
其實好多大車站都會有好多食肆, 広島駅都唔例外。
其中一間我呢兩日留意左好耐,
就係一間食もつ鍋o既專門店。
もつ鍋(MoTsu-NaBe), 其實係九州o既地道菜,
主要o既食材係牛小腸。
小弟其實一直都好想食一次もつ鍋,
今次終於如願以償。
初初小弟係配白飯食的,
但後來先發現, 原來多數食客都係放麵落個鍋度,
所以小弟再追加左個麵。
食左個飯, 再加個麵, 真係飽到反艇.......
老實講, 小弟對牛小腸冇乜興趣,
因為其實都幾靭, 好難趙開,
不過個湯底好正, 再加埋牛o既油份特有o既香氣,
真係想連個湯都飲埋。
不過如果飲埋就真係會爆血管.......
最後, 補番少少演唱會o既相,
不過當然唔會係場內o既相。
沒有留言:
張貼留言