八日七夜 昇龍豪食自駕魷 --- 第二日 熱田神宮 + 鰻魚飯名店うな富士 + 犬山城 + 犬山木曾川鵜飼

上面呢張吸睛圖係犬山木曾川鵜飼o既相,

要睇更多詳情的話, 看官要爬文爬到最後。

正如琴日所講, 今次呢個trip係小弟帶埋一班朋友玩日本中部,

由名屋企入, 上到去北陸然後番番落黎。

琴日大家陸陸續續到埗, 今日開始就係正式o既行程。

當朋友們食緊早餐o既時候, 小弟就去租車公司攞車喇。
成個行程六個人, 租一架七人車其實有少少冒險,
因為有可能唔夠位置放行里,
好在朋友們都合作, 盡量帶一啲唔太大o既行里箱。



第一站近近地, 先去熱田神宮。
小弟其實係第二次黎到熱田神宮,
早係2011, 小弟當年同屋企人跟團遊日本, 其中一站就係呢度。

熱田神宮點解咁出名一定要黎呢,
最主要係因為佢有悠長o既歷史, 係646年已經建成,
當年織田信長出軍之前, 都要黎呢度祈個福先。

另外, 熱田神宮本身祭祀日本三神器之一---草薙神剣(或 天叢雲剣),
所以更增添神秘色彩。

係停車場停低車, 經東門入, 到主參道, 就可以見到上圖o既大楠。

係一棵大約有上千年樹齡o既楠木。

授与所, 賣護身符o既建築物。

而下圖就係本宮, 要求神庇佑就係呢度喇。

初初以為大家都係一班玩友,
點知朋友們都幾有興趣俾錢入去宝物館睇下啲歷史文物,
不過因為入面唔可以影相, 所以只可以影宝物館o既外殼。

因為歷史上名古屋都算係日本比較繁盛o既城市,
熱田神宮又有比較長o既歷史,
所以一直以來都有好多皇室、武士、甚至庶民捐野俾熱田神宮。

另外, 因為熱田神宮祭祀神器草薙神剣o既關係,
所以特別多人捐贈刀刀劍劍俾熱田神宮,
當中不乏國寶級文物,
如果有時間的話, 大家都不妨入去睇下。




睇完熱田神宮, 都成12點左右, 係時候祭五臟廟。
今次個title, 講到明係豪食自駕魷,
一向只會食便利店or松屋o既小弟, 今次都豁出去。
看官亦都會少有地見到, 小弟會將飲飲食食o既介紹放上黎。

名古屋有幾樣食物出名,
有赤味噌、雞翼等等, 仲有o既就係燒鰻魚!

今次小弟黎到呢個, 被タベログ(類似香港openrice)選為,
2019年全日本最好食鰻魚排第6位o既うな富士。
地址: 愛知県名古屋市昭和区白金1-1-4 プレザアント白金

大家黎食, 真係要俾少少耐性同預多少少時間,
因為等1個鐘係閒閒地, 如果係週末的話, 等兩個鐘都唔奇。
上圖, 就係店家特登係門外起左個帳篷俾大家坐低慢慢等,
睇到店家有幾細心之餘, 亦都反映到, 真係要等番咁上下。
而下圖就係上圖帳篷遮住左o既門面。

菜牌, 一來中文字都易明,
二來, 其實睇價錢都知咩事, 一分錢一分貨嘛。


我地一行4人(係, 有兩位團員呢個時間仲未加入),
除左某一位富貴人家, 其餘三個都點左4700yen o既上鰻魚蓋飯(上うなぎ丼)。




先講下呢個上鰻魚蓋飯套餐先啦。

配有清湯, 個清湯係好飲, 但始終俾鰻魚搶晒風頭。

個鰻魚蓋飯, 都真係不是蓋的,
啲鰻魚多到冚住晒成個飯。

每一塊都燒到焦糖色, 一啖咬落去,
外面燒到有少少脆口, 好香碳火味,
而入面o既肉, 仍保持嫩滑,
隨住啲肉汁湧出黎, 啲鰻魚肉亦都入口即溶,
化為甘露, 滑入咽喉。

以前聽人講話咩啲肉入口即化, 以為係誇張吹水,
但今日一試, 實在真係只有呢個形容.....

對唔住.......小弟諗以後都唔會係香港食鰻魚飯.......

最驚喜o既係, 食食下發現, 原來中間仲有一層鰻魚!!!
完全覺得4700yen係抵到爛。

事實上一個set o既量, 已經夠小弟呢啲壯年男性食到飽,
所以女生叫之前要有心理準備。
不過可惜日本文化, 一定係最少一個人叫一個食物,
佢地又唔興打包, 更加唔會食剩。
所以最好有男生幫手食 (男生食完自己嗰個再執埋女生手尾)。





好喇, 講吓個富貴人家點o既6500yen上ひつまぶし

ひつまぶし呢個字有唔同理解, 不過係呢間店,
應該係指較大o既蓋飯容器, 就好似上圖見到o既闊口木盤。

淨係見到鰻魚o既量, 已經係唔講得笑, 個盤o既直徑仲長過雙筷子......
仲要同小弟食嗰個蓋飯一樣, 係啲飯中間仲有一層......
一個成年男性要食晒呢個蓋飯, 係會飽突的,
所以大家點之前要三思。

啲鰻魚點?
只可以講, 比小弟嗰個上うなぎ丼仲要好食!
但實在搵唔到文字形容喇,
因為頭先寫上うなぎ丼已經係文字形容o既極限......

只可以講多啲, 係ひつまぶし似乎主要俾鰻魚o既腩,
所以啲肉更加腍滑鮮甜。






大家都飽到反艇。

懷住滿足o既心情同肚皮,
先渣車到犬山城隔離o既酒店check in。

間野睇落好舊, 但勝在夠平,
而且眼前就係犬山城(下圖左方)同埋木曾川鵜飼。

放低左行里, 歇一歇腳, 就行過去犬山城喇。
由酒店行過去都只係十分鐘左右。

犬山城位於一個小山崗上,
而山腳有兩個神社(下圖)

本身另外有一條路專門for行上去犬山城的,
但事實上, 穿過兩個神社上犬山城其實仲快,
同埋, 一場黎度, 咪睇埋囉。

上圖右邊都見到寫住, 穿過鳥居係上犬山城o既近路。

再行經上圖條斜路, 就到達下圖犬山城城池範圍o既入口。
成人盛惠550yen。

又要講下, 點解要黎犬山城呢。

首先, 犬山城係日本十二天守之一。
天守, 係指主城樓,

而日本12天守, 就係日本現存12個, 保持原狀,

從來冇受炮火、祝融、地震等破壞o既天守。
當然, 間唔中修繕一下、換下啲部件, 總會有o既。
你唔好同小弟討論忒修斯之船呢啲哲學問題呀吓~

另外, 就係犬山城o既頂層瞭望台好有特色, 景觀又開掦,
陣間會再講。

下圖就係犬山城天守。

同其他城熡一樣, 啲樓梯斜到......
加上以前日本人比較矮, 所以空間好窄。

下面幾張圖就係天守頂層o既景觀。

因為犬山城起係山崗上, 加上旁邊有條木曾川,
所以景觀份外開揚。

另外, 小弟鐘意犬山城, 係因為可以行到出天守外面o既露台。

好多其他天守, 就算有得行出露台, 但都有好多繩綱、鐵網罩住,

但犬山城完全冇, 所以個view同感覺更加好。

同埋下圖可以見到, 個露台啲木板條隙有幾大,

而木板下面乜都冇, 所以行呢個露台, 都有幾分刺激。

今次小弟們黎到犬山城, 都已經係關門時間,
好難得地, 可以見到工作人員點樣關上天守頂層o既門戶。
小弟問准左工作人員可以影佢地工作,
佢地仲好親切咁特登慢動作俾小弟影。

首先將一條木橫放係中間(上、下圖)

然後關上門

再將門上o既鐵鈎勾住係橫木上。





頭先掛住講天守頂層,
其實中間幾層都有好多歷史文物等展出。

睇完犬山城之後, 時間差唔多,
行到過去下一個活地點, 時間啱啱好,
講緊o既就係本文劈頭第一張相o既木曾川鵜飼。
而下圖就係營業中心+集合地點。

有追開小弟呢個BLOG o既朋友,
應該對鵜飼呢個活動唔陌生,
因為小弟已經唔係第一次睇鵜飼。
之前先後去過睇
京都 宇治川 鵜飼
岐阜 長良川 鵜飼
而今次就係
犬山 木曾川 鵜飼

先簡單講俾啲新朋友知咩叫鵜飼。

鵜, 一種水鳥,會將捉到o既魚暫時存放係喉嚨,
(不過同鶶鵝唔同啦)
古代中國、日本人就睇中左呢點, 養鵜黎捉魚,
所以鵜飼, 唔單止指養鵜, 更加引伸為養鵜黎捕魚。
而到左現代, 鵜飼就變左傳統技藝o既一種,
作為表演俾遊客睇o既活動之一。

日本全國有十幾個地方有鵜飼表演,

雖然實際流程、安排有少少唔同, 但大致上有兩種。

1) 坐船淨係睇鵜飼

2) 坐船食野觀光加埋睇鵜飼

今次因為係帶朋友玩,

所以參加左坐船食野觀光加埋睇鵜飼。

上次小弟參加o既岐阜長良川鵜飼,

係乘客自己買便當上船,

而今次犬山木曾川鵜飼,

遊客係需要事先同營運所講好要邊個便當,

再由營運所落order預備。

所以見到上圖o既收據,

除左乘船料金之外, 仲有食事o既料金。

第5名團友係呢一站加入, 所以人數變左5。

而下圖就係附送o既名信片。

https://kisogawa-ukai.jp/
上面係木曾川鵜飼o既公式網站
好可惜, 佢地唔公開電郵, 要預約只可以靠打電話,
加上同一般日本人一樣, 佢地啲英文都唔見得特別好,
所以只可以用日文交流。
(來自4年後o既資訊: 佢地已經建構左英文網站,

仲可以網上預約添)

預約、點餐等, 一早已經係出發前搞好左,
小弟們係集合地點登記左, 俾埋錢, 等夠鐘, 就開始上船喇。
下圖就係碼頭。

下圖可以見到, 乘客order左o既便當,
一早已經按坐位分發好係船上。

上圖就係小弟o既便當,
而下圖就係負責便當o既食肆o既打招呼同埋菜單內容。

坐住船, 享受微風, 食住野, 睇下風景, 係幾寫意。
美中不足o既, 頭先啲鰻魚仲未落晒格, 所以有啲食唔落,
但呢啲都只係個人因素......

犬山城

上次小弟參加岐阜長良川鵜飼,
同今次唔同o既, 除左係船家預備好便當之外,
就係食野o既時段同睇鵜飼捉魚o既時段係分開的。

岐阜長良川鵜飼, 係一邊食野一食睇捉魚,
而今次犬山木曾川鵜飼係食完野之後, 先落船一次,
係岸邊聽下營運講解鵜飼,
然後重新上船出去河中心睇表演。

下圖就係遊客係岸邊聽匠人講解鵜飼。
而唔參加食便當觀光, 齋睇鵜飼o既遊客就係呢個時候加入。

小弟因為已經係第三次睇鵜飼,
所以完全估到晒匠人將會講啲乜,
於是就充當朋友們o既翻譯。


呢個時候, 鵜 都已經開始亮相。

重新上船, 出去河中心睇表演。

用鵜o既捉魚方法,
就係將未食飽o既鵜,
用繩綁住佢頸o既底部,
令到鵜捉到魚, 都唔可以吞落肚,
只可以留係喉嚨,
然後鵜飼師就會拉佢番上水,
用手唧番鵜喉嚨o既魚出黎。

一條捉魚o既船最少兩個人,
主要嗰個鵜飼師會拎住啲繩, 控制住啲鵜,
而另一個人會用硬物敲隻船黎嚇啲魚,
啲魚一驚, 就會搵地方聚埋一齊,
而多數就係聚係船頭個火把下面,
於是鵜就可以更有效率咁捉魚,
呢個亦都係火把o既工用。

一發覺有鵜已經捉到魚,
鵜飼師就會係手上一堆繩入面,
搵番相應嗰條出黎, 然後秤隻鵜上水,
係佢喉嚨唧番條魚出黎。

一個人睇住6-10隻鵜都幾忙,
又要睇住佢地唔好穿過船底去左另一邊,
又要睇住有冇鵜捉到魚,
有的話又要係嗰堆繩度抽番嗰隻出黎,
拉佢上水唧啲魚出黎,
又唔可以俾啲繩打結, 要不停解開打結o既繩,
仲要個火把其實真係好熱......

整體呢講, 犬山木曾川鵜飼o既安排都幾好,
因為食野同睇表演分開, 可以專心用餐同專心睇表演。
上次長良川鵜飼一邊食一邊睇, 有啲兩頭唔到岸。
而且犬山木曾川表演鵜飼o既船安排得宜,
每一首客船、以及客船o既兩邊都有足夠o既機會睇到鵜飼捉魚。

番番酒店, 窗外o既景色。
左上方就係犬山城。