魷日記: 八日七夜昇龍豪食自駕魷 --- 第四日高山宮川朝巿 + 金澤近江町巿場 + 東茶屋街 + もりもり迴轉壽司

大家見到上面張eye catching o既圖都係以食物做招徠,

應該都估到, 今日又係不停咁食~

同埋, 食過上圖呢舊壽司的話, 好難唔將呢張相放第一......

不過都唔係一起身就係咁食o既,

今日起身第一個行程,

係先去宮川朝巿。

顧名思義, 宮川朝巿,

就係上午時段, 於流經高山巿o既宮川河岸開檔o既巿場。

宮川某啲段落有大量o既鯉魚,
大家可以係河邊o既檔攤買魚糧餵魚。

上次同同事黎, 都有逛宮川朝巿,
檔攤主要以售買當地農作物為主,
亦有啲係賣手工藝品。

除左上圖嗰啲可拆o既臨時檔攤之外,
宮川朝巿亦都帶旺左實體o既租戶。
下圖就係其中之一。

用蛋白加砂糖打起, 然後拎去炸。
外面脆, 裏面鬆化, 而且甜味啱啱好, 非常好食,
可惜保質期短, 如果唔係小弟會買番屋企。

睇小弟冇乜相同介紹咁,
但其實宮川朝巿都幾好行。
小弟o既朋友不停咁買左好多新鮮小果食
結果......都係一起身就係咁食......

逛完宮川朝巿, 小弟一行渣個半鐘車黎到石石川県o既金沢。

因為成個幾鐘車, 所以渣到黎, 又差唔多係食lunch o既時間......

黎到金沢呢啲沿海城巿, 又點可以唔食海鮮呢,
而金沢o既近江町巿場, 正正係北陸一帶其中一個海鮮集散地。

因為小弟但黎到, 已經係中午o既關係,
好多新鮮o既海產一早已經俾上午o既遊客清晒......

咁都總會有啲淨o既。

新鮮即開海膽同生蠔。

仲有大蝦同蟹棒。

不過呢啲唔係小弟食的,

而係小弟o既團友買黎食的。

事關係佢地邊行邊食o既時候,

小弟搵緊今日lunch要食o既店舖, 同埋要攞籌等位。

就係下圖呢間いきいき亭喇。

地址: 石川県金沢市青草町88 近江町いちば館 1F

點解係呢間呢, 因為呢間店o既海鮮丼勇奪全國海鮮丼o既金賞,
既然係咁, 又點可以唔試下呢。

因為正值lunch time, 而店入面o既位置加起黎都唔夠20個,
所以足足等左成粒鐘先直正可以坐低食。

既然黎到呢間店, 就當然要試下全國金賞o既いきいき亭丼啦。
呢個時候, 就要介紹下いきいき亭丼入面其中一個主角, のどぐろ。

のどぐろ(Nodo-Guro), 漢字直譯係「喉黑」,
係日本海一帶o既魚。

其實係好多年前, のどぐろ係冇人食的,
因為冇人買黎食o既關係, 早期漁夫直頭撈到都掉番落海。
但十幾年前一個電視節目, 介紹左呢種海產作為北陸o既名物,
仲要拎左番錄影廠俾嘉賓試食, 嘉賓對其美味為之震驚。
呢個節目一出街, のどぐろ立即聲名大燥。
由於關東一帶冇乜出產のどぐろ, 所以反而成為左貴價魚, 一直到而家。

上圖白色肉o既就係のどぐろ。
其他刺身新鮮味美不在話下,
のどぐろo既肉質爽滑, 加上豐富o既魚油香,
真係唔明點解早期啲人會唔食。

當大家都係叫招牌いきいき亭丼o既時候,
其中一位富貴o既團友,
偏偏就係叫左下圖o既鉄火丼(全拖羅)。

有錢就是任性。

好多人, 就算係日本人都未必會知,

其實包括埋金沢o既石川県, 除左海鮮之外,

おでん都好出名。

(おでん, 中文譯做關東煮,

但其實同關東冇乜直接淵源......)

而係近江町巿場, 亦都有一個檔攤,
係幾間小店合營, 而其中一間專賣おでん。

上圖寫住,
金沢名物! くるまふ、ばい貝、赤巻、ふかし
本店人氣! えび天、牛すじ、たまごやき
数量限定! えび面、のどぐろ面、大根

的確, 好多都唔係正常おでん會見到o既材料。

小弟一向都鐘意食おでん,
所以雖然明知今晚會食餐勁o既,
但都係忍唔住要去買幾個黎食。

小弟第一輪食o既係大根(白蘿白)、牛すじ(牛筋)、えび面
えび面就係上圖左下方嗰舊野,
而下圖就係えび面o既另一面。
簡單講, えび面就係將蝦膠攘落個蟹殼度,

但點解明明係蝦, 但就攘落個蟹殼度?

另外, 小弟o既朋友叫左大根、豆腐同えび天。

食飽飽, 渣架車去酒店check in, 稍事休息之後,
我地就出發去ひがし茶屋街。
因為酒店位置優良o既關係,
步行十五分鐘左右就可以到達。

途中經過金沢o既街道, 都有唔少歷史見築可以參觀一下。

而家o既文化館, 前身係一間銀行。

由門口望入去

由櫃枱望番出門口

地庫o既甲萬。

不過而家改左做貨幣展覽。

一邊行一邊睇, 好快就到ひがし茶屋街。

ひがし茶屋街,
一條保存左好多舊建築o既區域,
係日本o既「重要伝統的建造物群保存地区」。

另外, 金沢仲有一項傳統手藝, 就係打金箔,
所以係金沢, 尤其是ひがし茶屋街一帶,
都有好多以金箔做招徠o既產品。
下圖o既金箔雪糕就其中之一(係上圖o既烏鶏庵買)。

因為烏鶏庵位於ひがし茶屋街o既入口處,
所以小弟o既團友一見到就買左。
但事實上, 行入去ひがし茶屋街,
仲有更多更誇張o既金箔雪糕。

由烏鶏庵再行幾步, 就已經係金箔o既世界,
例如上圖o既店。
下圖開始o既相, 全部都係單單上面一間店o既內部。

玄關o既裝飾。

總之乜都可以加金箔。
金箔面膜、金箔爽膚水、金箔唇膏etc

真係貼金箔o既擺設。

係離遠已經見到咁大個金箔雪糕banner,
好難唔過黎望兩眼。

同banner一樣, 真係成塊金箔冚實晒o既雪糕。

貼金o既器皿

日美首腦會議, 日本送俾特朗普o既金筆(同款)

壓金o既掛畫

真係冇諗過金箔可以咁做成為畫o既一部分。

小弟o既富貴團友, 就買左一把壓金o既日本扇俾佢母親。

就算對日本傳統建築冇興趣o既朋友,
淨係睇金箔o既產品都可以夠睇半日唔會悶。

小弟除左買左兩隻金箔酒杯俾老豆之外,
仲係頭先提過o既烏鶏庵買左條蛋糕番屋企食。

老實講, 除左真係蛋味濃少少之外, 就冇乜特別,
就成個蛋糕面都係金箔, 的確好靚, 送禮的話認真一流。

行完ひがし茶屋街,

大家番酒店放低啲戰利品之後,

休息一陣就去食晚飯喇

目的地係金沢駅接連o既商場o既もりもり寿司。
你話唔係呀馬黎金沢食迴轉壽司?
咁你就有所不知。
一來, 金沢近海, 海鮮本身已經豐富同新鮮。

二來, 金沢o既壽司, 出左名配料夠大件,
成日都可以聽到金沢o既人講, 去到第二啲縣第一次食壽司,
發覺配料好細件, 仲以為係黑店。
但慢慢先發覺, 只係金沢啲壽司配料零舍大件。

三來, 其實日本o既迴轉壽司, 同香港都一樣,
轉緊嗰啲只係做樣, 大家要食都係直接點黎食......