八日七夜 昇龍豪食自駕魷 --- 第六日 松本城 + 諏訪湖(《你的名字》聖地) + 形原温泉紫陽花祭 + 磯丸水產

今日行程實在有太多好o既相片,

但爭扎左一大輪之後, 

都係決定揀《君の名は。》(中譯《你的名字》)聖地巡礼o既相片,

用黎做吸睛圖, 陣間中段會講多啲。

黎到集體行程最後一日,

早上一打開窗簾, 天氣好到爆。

大家要知道, 其實六月底o既日本,
天氣都唔係話好隱定,
但一連幾日都冇落雨, 實在係天公造美。

先黎食個早餐,
其實小弟平時又遲起身, 又唔食早餐的,
但到左旅行, 生活反而仲健康左XD

除左枱上一set野之外,
仲有個小型salad bar,
唔係話好多款, 但勝在大家任裝,
啱晒食草o既某團友。

住得溫泉旅館, 當然唔可以蝕俾佢,

食完早餐再去浸多轉啦。

記唔記得琴日提過, 旅館會係子夜12點之後, 將男女溫泉互換,

所以, 機會黎喇飛雲。

當然, 溫泉入面唔影得相,

大家想睇, 就上官方網站啦。

雖然集體旅遊o既行程黎到最後一日,

但小弟呢啲寒酸o既性格, 係唔會放過任何機會。

最後一日都要去盡佢, 向東面進發, 參觀松本城。

又係城?
因為犬山城比較細, 而且主要得番天守,
所以都值得黎松本城望一望。
加上日本現存o既12天守,
只有姫路城同松本城係五重天守(石垣上計五層),
所以小弟決定帶團友睇一睇呢個,
有齊護城河、石垣、櫓等等o既大型城池。

下圖長長o既紅色橋(埋橋), 都可以話係松本城o既特色,
好多時影相都會包埋條橋。

係上圖o既 黒門 , 留個買路錢(610yen)

小弟幾喜歡松本城前面綠油油o既空曠草地。

松本城其中一個特色,

就係好鮮明o既黑白對比。

石垣o既一部份。

呢啲窗, 除左可以令城入面風涼水冷之外,
最主要係要黎睇水同放箭。


同好多其他o既城池一樣, 松本城入面放左好多同古時戰爭o既展品。

正式流星鎚。

火箭

火槍

初代城樓破風o既部件。

由城樓望番落埋橋。

↑　天守頂層天花結構。
↓　另一個角度可以見到有個小神壇,
傳統上大部份天守都會有個小神壇,
都係保祐平安嗰啲咁啦。

睇完松本城, 食左個雪糕休息左一陣, 又再出發。

本身小弟以為三個女生會想去outlet掃貨,

點知出乎意料之外, 三個女生都話冇咁o既必要。

而另一方面, 全團人都對動畫電影《君の名は。》頗有興趣,

(果然大家都係讀日文o既同學, 同埋新海誠真係太強),

於是小弟都可以一償心願, 去《君の名は。》o既主要聖地

---諏訪湖。

不過係時候先食少少野。

小弟一早已經搵好左lunch o既目標。

就係上圖食蕎麦o既店---更科。
其實小弟都幾surprise, 原來諏訪都出名蕎麦。
地址: 長野県諏訪市末広1-7

間店唔係話好大, 但有兩層,
而小弟們就係地面嗰層。

麻雀雖小, 但都好整潔同光猛。

蕎麦麵店就梗係食蕎麦架啦。

小弟就點左其中一個招牌蕎麦set,
就係四色蕎麦(下圖)

講解上圖四種蕎麦麵之前, 先要講下蕎麦。
蕎麦其實都係穀物o既一種,
成粒蕎麦磨爛拎去造麵條,
同 只係拎最核心部份造麵條,
出黎o既味道、口感等都會有好大o既分別,
情況就好似食白米同食糙米o既分別咁。

逐個介紹的話, 先介紹上圖右下方最深色嗰執麵。
係將蕎麦成粒拎去磨, 然後拎黎造麵,
以口感冇咁順滑, 但有非常香口o既穀物味道。

然後就係左上方, 顏色稍稍淺一啲。
就係去除左蕎麦最外層黎部份黎造麵,
所以口感會幼滑啲, 但穀物味就相對冇咁香。

而右上最白雪雪o既, 就係只用蕎麦最中心份部造麵,
當然, 一定係最入口順滑o既選項, 但就冇乜蕎麦味。

咁淨低左下方係咩呢? 係定期會轉o既menu,
而小弟今次遇著o既係紫蘇味蕎麦。
小弟其實唔係話好鐘意紫蘇葉陣味(但又唔係食唔到o既),
不過店家呢個蕎麦入面, 紫蘇o既份量啱啱好,
能夠帶出紫蘇o既清香之餘, 又唔會太過濃烈,
食落精神為之一振, 非常啱夏天令人疲倦o既天氣。

呢個會轉o既menu, 仲會有柚子等o既選頂,
希望會再有機會黎食。

對於小弟們呢班大食怪, 淨得幾執麵當然唔夠,

所以大家都各自叫左side order,

如上圖o既天婦羅。

好喇, 食完野之後,

小弟們終於黎到《君の名は。》聖地巡礼o既目的地

---立石公園

地址: 長野県諏訪市大字上諏訪10399

先講吓, 因為《君の名は。》o既作者新海誠本身係長野県人,

所以佢o既動畫作品好多時都摻有長野県o既景物,

而今次, 新海誠就完美咁將長野県諏訪湖,

打造成為電影入面o既殞石坑湖。

如果真正要到上圖o既地方朝聖 (存封三葉噛み酒o既石陣),

其實要到諏訪湖西北面一個山卡啦,

不過小弟們冇咁o既時間,

但都可以黎到另一個取景地點,

位於諏訪湖東面o既立石公園。

公園有一個廣場(上圖),

而個廣場就對住諏訪湖。

有塊金屬板介紹諏訪湖o既景物(下圖)。

當然, 小弟們黎到, 實在忍唔住擺番吓舖士黎影相留念。

呢個攝影師好盡責......

一來天氣好好, 二來個太陽個位置好正, 第三, 連啲雲都好交戲。

上圖完全冇p圖冇加effect, 原汁原味。

因為大家都話唔去outlet而轉去諏訪湖,

但諏訪湖用o既時間始都唔係話好長,

影完相都仲有少少時間淨。

淨低o既時間唔係話好多, 但去旅行, 去盡啲,

小弟膽粗粗搏一搏, 極速往南衝,

一下子黎到位於愛知県東南面o既形原溫泉,

不過唔係黎浸, 而係黎睇5萬株以上o既紫陽花!

形原溫泉有一個地方, 種左超過5萬株o既紫陽花,

每逢六月就會舉辦紫陽花展覽同埋祭典活動,

係日本出名o既紫陽花祭典活動之一。

かたはらあじさい祭り（形原紫陽花祭）
入場費300yen, 係真係抵到爛, 睇落去大家就會知。

就係買飛o既入口, 已經放左好幾盆怒放o既紫陽花,
有啲配色小弟都冇見過。

一進入園區, 經過一條點綴風情o既和式紅橋,
已經見到小山坡上堆滿紫陽花。
以下都冇乜野好講, 大家睇相。

由小山坡上望番落入口

唔係淨係得頭先個小山坡, 翻過左個山坡,
成個山頭都係紫陽花公園範圍。
而上圖o既紫陽花庭園只係冰山一角。





另外, 係園內一個湖o既沿岸,
放左一排差唔多上百盆o既紫陽花,
全部都各有特色, 好多品種同顏色, 都真係好特別,
以下係其中一啲selection。

小弟覺得呢盤真係好靚(上、下圖),
可以見到, 同一片花瓣, 有漸變o既顏色。

上面真係求其拎一張圖都可以用黎做wall paper。

可惜因為時間唔多o既關係, 加上入黑,

所以小弟們只有大約一小時o既活動時間.......

依依不捨咁離開, 趕係20:00之前番去名古屋駅交車。

成個行程順利完成!!!

最後最後, 小弟揀左酒店附近o既磯丸水產慶功。

去開日本o既朋友會話「唔係呀話, 磯丸水產好一般般架咋喎」

咁你就有所不知, 小弟係另有目的。

不過介紹左啲大路野先。

蟹膏攘蟹殼呢個真係百吃不厭。

上圖呢啲穩穩陣陣, 唔會出事。

清酒煮硯

燒凡立貝。
今次遇到個好好人o既店員,
教識左小弟們, 燒凡立貝要先反轉黎燒,
收左水先再反番正。

好喇, 小弟o既目標黎喇,
就係下圖o既雞湯拉麵。

吓? 黎磯丸水產食雞湯拉麵。
係。好多香港人未必知,
其實磯丸水產o既雞湯拉麵都幾出名,
好多時都賣斷市。

小弟之前已經想食, 可惜, 就係賣斷左市。
今次得償所願, 果然名不虛傳。
非常香濃o既雞湯, 為呢次旅程畫上完美o既.........
.............逗號

因為小弟o既行程仲未完,
聽日仲會stay behind去行山,
yeah~