八日七夜 昇龍豪食自駕魷 --- 第七日 行山(乳岩峽)

一大班朋友o既集體行程, 琴日就完結左喇,

但小弟同另一位朋友stay behind, 黎一個小小o既hiking。

小弟選擇o既, 係由乳岩峽出發, 行上去明神山。

會揀呢條route, 係因為上啲日本行山網站,

話呢條路線都幾多野睇, 而且有少少難度。

小弟因為唔想行啲太悶o既山,

於是就俾啲景點同"有少少難度"吸引左。

要到乳岩峽, 可以由名古屋坐JR到三河川合駅,

再行半個小時, 就可以到乳岩峽......o既出發點......

因為淨係搭JR到三河川合駅,

單程都要成3粒鐘, 單程車票2千幾yen per head,

仲要由車站行半個鐘先到登山出發點,

所以小弟同朋友決定租一架車仔渣, 渣足一日都唔洗10000萬yen。

去番同一間店攞車, 我諗店員會有啲奇怪,
小弟明明琴日還左架七人車, 今日又租架4人車仔。


十點鐘左右攞車, 渣個零鐘就到達上圖o既乳岩峽登山出發點。
因為車路只黎到呢度, 所以啲人都泊晒啲車係度,
然後出發遠足。

雖然黎日本前都有做吓功課, 睇下行山路線,
但出發行山前都係睇清楚好啲。
上圖就係起點o既牌, 簡單介紹乳岩峽o既行山路線,
但因距離明神山都仲有一段距離, 而且又係單一路徑,
所以行去明神山o既指示有點兒從簡(上圖左)。

係上面個地圖中下方, 有一個小方框(下圖),
介紹乳岩峽其中兩個景點---乳岩, 同 通天洞,
亦都係小弟們打算去睇o既地方。

睇清睇楚路, check好帶齊野之後, 就出發了。

一開始都有好清楚o既路標。

一起步, 係一大片岩石, 而右邊係一條小溪,
嚴格黎講, 係大岩石上面流過o既surface runoff。
有個呀叔帶小狗黎暢泳。

事實上今日有少少熱, 天氣好得有點過份,
睇見隻狗游得咁開心, 小弟都好想跳落水。
不過事實係條小溪好淺水。

呢片大岩石+小溪大約百零米左右,
好快就進入山路。

山路全部都冇舖設,

只係俾人行到秃左o既泥土+岩石地面,

加上大樹o既根都突出黎,

所以有少少崎嶇難行。

旅行唔一定要去吃喝玩樂,
就咁行吓山都好舒暢。

行左半個鐘, 黎到第一個分岐(日文「分岐」係指分岔路口)。
小弟們先去乳岩, 所以係左手邊。

大家應該都忍左好耐, 點解係叫「乳岩」?
咁係因為, 呢一個山, 主要係一塊勁大o既岩石,
而呢塊岩石, 有好多裂逢、洞穴等,
又因為岩石係石灰岩, 所以有啲鐘乳石,
鐘乳石睇落好似乳房咁, 所以就叫乳岩......(唔好再問落去點解)

成個岩山就係一舊大石。

有幾大? 由上兩圖開始,
一直到下面一系列爬樓梯o既都係......

啲鐵梯極窄同極斜, 條條都大過45度。

爬完一條又一條。

有啲梯級仲要就黎斷咁款。

可以見到而家o既鐵梯下面,
仲有一條簡陋o既鐵梯, 可能係早期o既梯。

有啲位真係肥少少都過唔到......

終於到頂喇。
因為乳岩山其實只係明神山o既一部份,
加上周圍樹木茂盛,睇唔到廣闊o既view。
不過咁樣爬鐵梯上黎, 都已經夠晒好玩刺激。



再行少少, 可以見到下圖o既天然大石橋。

由起點行到黎呢度, 用左差唔多一小時,
稍事休息, 繼續出發。
下一站係通天洞。

一路沿住大岩石行, 又會再見到鐵梯。
(下圖中下方啡色鐵梯)

由洞入面望番出去。
真係鬼斧神工。

洞入面有一排地蔵。

小弟o既朋友都係業餘o既攝影愛好者。

洞入面風涼水冷, 唞一陣之後, 就番番落頭先個分岐,

向明神山頂進發。

落路越黎越難行, 而且斜率都幾大。

有啲路直頭要落手扶住。

乳岩峽另一個地標---鬼岩
就係下圖中間稍為白色o既岩石, 仲有人係度玩攀石添。

放大少少(下圖)

可以見到岩石表面非常凸凹不平。

鬼岩應該都係攀石熱點,
因為上圖o既牌, 係提醒大家攀石要戴頭盔。

因為非常凸凹不平o既表面,
加上舊石好似一大舊竹筍咁棟係度,
所以叫鬼岩。

舊石真係好鬼大舊, 就算上圖咁企到咁遠影, 都影唔晒.....

應該係頭先攀石位仁兄o既行裝,
睇黎佢係度過夜。




繼續上山。

啲路越黎越難行,
甚至有啲路段要拉住條繩上(下圖)。

黎到鬼岩乗越o既分岐,
一來實在有啲攰, 二來時間都唔早, 就快三點。
考慮體力、路山路程、還車時間等因素之後,
小弟們決定係度唞一陣之後折返。

享受一下大自然o既寧謐。

落山又係一大考驗......
常言道「上山容易落山難」。




番番起點o既小溪。

小弟個fd sort左......正常人切勿模仿。

蝌蚪, 突然發現, 自從幼稚園番大陸鄉郊捉過蝌蚪之後,
一直都冇再親身見過蝌蚪。

小弟們實在有點兒睇小明神山,

如果真係要到明神山山頂的話,

首先要早個幾兩個鐘出發(小弟們差唔多正午先到達起點)。

另外就係, 可能要犠牲乳岩嗰幾個景點先得。

其實由乳岩峽起點到鬼岩乗越, 已經係明神山頂o既3分之2,

下次睇下有冇機會登頂。

成功八點前交車, 簡簡單單係名古屋駅搵食。
上圖o既名古屋驛麺通り,
就係小弟第一次黎日本旅行, 食第一餐o既地方,
當年老豆仲話80幾蚊食碗麵肉都赤埋,
但而定係香港食個日本拉麵閒閒地都成舊水.........





除左拉麵之外, 呢條位於車站內o既小路, 仲有其他選擇。

黎到名古屋, 點可以唔食炸豬扒,
不過名古屋出名o既, 其實應該話係炸豬扒汁先啱。

小弟們俾呢間店o既呢張紙吸引住,
上面寫住: 椰菜、飯、味噌免費任添

!!!!!!!!!!!!!!

好, 小弟就黎會一會你!

小弟朋友叫左個炸豬扒拼雞翼,
需知道雞翼都係名古屋名菜。

而小弟鐘情炸蝦。

好juicy o既炸豬扒, 同埋夠晒重口味o既醬汁~

定食仲配有一小碟應該係燉牛雜, 正呀。

特登食淨一半餸, 叫個侍應黎添飯添椰菜同添味噌。

叮, 又滿番, 正呀XP

話晒啲飯都唔少, 添一次已經飽到反艇。

行完辿山出完一身汗, 再食個飽飽,

非常滿足, 今晚應該會好好瞓。