魷日記: 八日七夜昇龍豪食自駕魷 --- 第五日兼六園 + 富山駅lunch + 奧飛驒白骨溫泉湯元齋藤旅館

一睇到上圖, 心水清o既朋友應該就會認得出,

係黎自兼六園o既兩腳石燈籠,

其實標題都大大隻字寫左兼六園......

冇錯, 黎得金沢, 又點可以唔黎睇吓兼六園。

兼六園, 係由加賀藩係金沢城前面起o既庭園,

時至今日, 同日本o既岡山市後楽園、水戸市偕楽園,

並稱為日本三名園。

另外兩個庭園小弟都去過,

有關岡山市後楽園, 可以參考

四日三夜廣島四國旅行團 --- 最終日岡山後樂園

七日六夜本州極西櫻花魷 --- 第六日岡山後樂園 + 早見沙織Concert Tour 2019 "JUNCTION"大阪公演

有關水戸市偕楽園, 可以參考

八日七夜北首都圈毒撚魷第二日 --- 偕樂園 + 大洗 + 築波JAXA

係兼六園附近, 當然唔少得以遊客為對像o既商店啦,

而下圖o既呢一間, 其實係琴日ひがし茶屋o既一間金箔店o既分店,

所以如果趕唔切去ひがし茶屋睇金閃閃o既手信或者食金箔雪糕,

都可以係兼六園出面呢度頂住檔先。

其實係2011年o既時候,

同屋企人已經黎過一次兼六園,

不過嗰時係跟團, 有啲趕鴨仔,

所以唔可以慢慢欣賞。

經過上圖o既小徑進入兼六園,

係下圖o既小亭買入場券,

成人只係310yen, 而小童更加只需100yen。

一個面積接近12萬平方米o既歷史庭園收呢個價錢......

價錢低都, 只可以話係象徵式收費。

所以成日都話, 日本大部份景點o既入場費真係好抵。

如果係正門入的話, 行入個庭園唔洗好耐,

就可以見到下圖o既兩腳石燈籠, 正式名稱係徽軫灯籠,

位於一個水池(霞ヶ池)o既岸邊。

因為實在太代表性,

所以呢個徽軫灯籠, 係遊人必定打咭o既地點,

而大家都會係徽軫灯籠前o既一條小石橋(虹橋)上面影(上圖粉紅衫)。

徽軫灯籠有咩咁特別呢,

咁係因為傳統日本o既石燈籠, 多數都係三腳或者四腳,

而好似徽軫灯籠咁兩隻腳一長一短, 更加係只此一家,

所以成為左呢個庭園特有o既灯籠,

而大家亦都唔難見到, 好金沢市官方o既宣傳會用上呢個徽軫灯籠o既圖案。

其實關於兩隻腳一長一短,

有人懷疑會唔會本身係兩隻腳一樣長,

因為係某繪畫兼六園o既古畫入面,

畫有兩隻腳一樣長o既灯籠,

不過無更多資料証實。

上圖就係由虹橋(打咭位)影。

仲可以影到遠處o既小屋---內橋亭。

內橋亭而家成為左食肆。

下圖左手邊可以睇到menu。

兼六園另外一個特式, 雁行橋,

係一條人字形o既石橋。

以下係一啲隨意景物照片。

利用地理位置高低差水壓造成o既噴泉,
有可能係日本第一個噴泉

以下係一啲植物介紹

小溪兩邊應該係啲菖蒲類。

上下圖都係櫻花樹, 期待櫻花花期時再來參觀。

唔合時宜o既紅葉。

上圖係梅花林, 真係有梅架(下圖)。

小弟都好鐘意影一啲未必係大路會影o既野,

例如下面幾張圖, 就係打理兼六園o既工作人員。

將路邊o既舖路碎石掃番入路中間, 減少碎石流失

修剪灌木

拔雜草

掃落葉

睇完兼六園, 係時候醫肚,

因為自駕o既關係, 所以可以渣遠啲都得,

於是小弟就決定過黎富山食lunch......XD

選擇過黎富山駅食野,

首先係因為距離唔太遠, 去下一個目的地亦都唔洗兜好多。

二來就係富山有白蝦呢種特產, 可以介紹朋友黎試下,

第三, 就係富山駅呢個美食area中間就係一個特賣場,

大家可以順便買埋手信。

由金沢出發大約60幾公里,

渣唔洗一小時, 就到達富山駅。

黎到富山, 就一定要試下富山特產, 白えび(白蝦)。

而下圖就係其中一間食白蝦o既專門店。

店內, 其實唔係話好大, 不過日本人翻枱快。

上圖左邊就係白蝦刺身, 圖右就係大家耳熟能詳o既富山螢光魷魚。

相信好多人都聽過某壽司連鎖店賣廣告,

話富山縣盛產螢光魷魚(ホタルイカ), 又話富山直送, 係威係勢。

的確, 富山有唔少店有提供螢光魷魚o既食譜,

但絕大部份都係作為醃菜咁進食或售賣。

聰明o既朋友都知, 新鮮好食o既食材, 日本人都係以刺身進食為多,

因為好食o既食材, 一定係就咁食最好食,

至於用黎做醃菜o既食材, 大家都知咩事,

唔係產量太多食唔晒, 就係跟本唔太好食。

白蝦定食、左上係白蝦刺身, 右上係白蝦剪餅,

左下就白蝦天婦羅蓋飯(下圖)。

頭先扁低完螢光魷魚, 咁白蝦又點呢。
原來白蝦一上水就好快死, 加上腐爛得快,
捕獲之後唔可以運得遠, 所以只可以一上水就食。
另外, 白蝦因為太細隻(最大都係同手指尾差唔多), 同埋身體軟弱,
一定要人手逐隻逐隻剥殼, 所以成為左貴價&地區性食材。

至於味道, 白蝦味道清新又唔腥,
慢慢細嘗, 就會食出回甘o既味道, 大家有機會不妨一試。

小弟買左啲白蝦手信, 可以係度介紹少少。

三包都係白蝦蝦乾(可即食),
左下, 係小弟上次黎富山買過o既蝦乾, 食過翻尋味,
比較貴, 幾百yen得嗰少少, 但好好食,
啲蝦肉好乾身, 蝦肉好香口, 蝦頭較厚部份唔會發霉。

左上, 係有落味的(小弟呢包辛味),
比較大盒, 但價錢適中, 質量同味道都可以。
有其他唔同顏色包裝, 係落左唔同味。

右邊, 1000yen一大包, 但蝦肉唔夠乾身, 而且有少少醒,
蝦頭較厚部份, 有某一啲蝦有發霉。
果然係一分錢一分貨。

食完lunch, 係時候出發。
今晚係團體行動o既最後一晚,
小弟一向鐘意將高級溫泉旅館放係最後一晚。
而今次o既溫泉旅館, 就係位於奥飛騨白骨溫泉 o既湯元斎藤旅館。
要再高級o既旅館, 當然一定會有,
但平衡過價錢、住宿、膳食之後, 小弟揀左呢間。

因為渣車o既關係, 旅館位置唔係考慮範圍內。
同埋叫得奥飛騨, 都應該係深山裏面(日文「奥」係「深入」o既意思)。
又或者咁講, 小弟一直就想黎白骨溫泉,
所以就趁今次渣車, 強迫大家陪小弟過黎。

湯元斎藤旅館

館旅藤斎元湯

↑　旅館對出o既小神社。
↓　由神社影向旅館對出環境。

旅館玄關

旅館小賣店

旅館reception前lobby
(呢張相係晚上熄燈後影, 所以黑黑地)

二人房間

↑　由門口影
↓　由窗台影

窗台休息位置

窗外風景

日本租溫泉旅館, 真係好搞笑的,
一般2人至4人一齊book, 佢都係俾同一間房你,
但價錢係斷人頭計的。
換句話說, 好似小弟6個人,
book 3+3 or 4+2, 兩個組合都係得兩間房,
而book 2+2+2會有三間房, 但三種combinations人頭費一樣......

咁小弟梗係book 2+2+2啦......

大家頭先聽過小弟講幾次, 呢個溫泉區叫白骨溫泉,
咁點解係叫白骨溫泉呢,
因為呢一區o既溫泉水, 係非常非常混濁o既白色,
如果係拍旅遊節目, 就算個美女真係赤裸裸咁浸落水,
正面zoom埋去都應該乜都影唔到。