大家, 對唔住, 今日行程都有乜特別。
為左之後啲住宿錯開啲星期六日,
所以今日都係留係福岡, 順便睇定有咩手信最後嗰日買。
正如上圖所見, 今日o既主角係新海誠新作《すずめの戸締り》。
就算看官冇聽過新海誠呢個人,
都應該聽過《你的名字》呢套電影動畫掛。
新海誠就係《你的名字》o既總監。
瞓到十一二點, 懶洋洋咁去到博多駅上蓋o既商場戲院。
傍邊仲有柯南o既展出, 不過小弟對死神偵探冇興趣。
可能因為啱啱上畫(11/11),
所以差唔多每小時都有一個院放映。
買左個半小時後放映o既飛,
然後就逛住戲院咁等時間。
成個戲院舖天蓋地清一式都係《すずめの戸締り》,
及後小弟剩餘行程, 無論係商場、書店、甚至係電視節目sponsor,
都充斥住《すずめの戸締り》, 似乎花左好多錢做宣傳。
日本電影院, 同香港電影院有一個分別,
就係多數會有個corner賣電影周邊,
當下就梗係全部都係《すずめの戸締り》,
另外仲有啲《君の名は。》同埋《天気の子》o既剩餘物資。
睇完《すずめの戸締り》之後先決定買唔買佢啲野。
上圖係入場贈品,
《すずめの戸締り》小冊子,
入面有一啲原畫、分鏡、背景美術等
同埋監督、聲優o既訪談。
講番電影本身(唔講內容所以冇劇透)
小弟覺得比《天気の子》好,
但始終超越唔到《君の名は。》。
不過點講都係算好睇。
最令小弟悉懷o既係,
今次終於冇乜嚴重犯罪情節。
但另一方面, 小弟始終覺得,
新海誠唔太識得處理男女主角o既感情發展,
男女主角無啦啦就會鐘意上對方......
Anyway, 《すずめの戸締り》都幾好睇,
所以買左件T恤留念, 睇得又用得。
冇乜野做, 逛吓書局,
然後去左位於天神o既animate分店。
每去日本一個地方就去逛animate分店,
已經成為左小弟o既習慣。
真心冇野做,
去左間starXuck hea吓,
順便睇下頭先入場贈品嗰本小冊子。
晚上到一間食評數一數二o既拉麵店食。
博多一双 博多駅東本店
地址: 福岡県福岡市博多区博多駅東３丁目１−６
一睇就知係名店,
因為即使裝修遮住個招牌, 都仲有咁多人排隊,
小弟都排左成廿分鐘。
間舖唔大, 好loacl o既店。
呢度真係提吓大家,
日本文化, 黎到拉麵店, 真係嗱嗱食完就走,
係度打躉吹水唔走, 係俾人側目的。
講番啲食物,
老實講, 一直以來聽開係話博多拉麵湯底濃到腥,
小弟expect黎會一會的。
但意外地呢間又唔係真係話好濃好濃,
(小弟唔係話唔好食呀吓)
所以唔洗話擔心好難入口。
不過食完, 仍然可以見到碗嗰啲骨髓,
就証明真材實料。
明天一早就去攞車, 開始一連14日o既九州廣域飛車紅葉之旅。
真真正正o既遊記, 聽日開始!
沒有留言:
張貼留言