今日黎到唐津市十幾公里外一個叫呼子o既地方。
呢度有咩出名, 見到上圖大家都應該估到,
就係魷魚。不過其實魷魚之外,
小弟發現, 呼子意外地都幾多其他野睇。
上午九點幾揸車黎到呼子朝市旁o既停車場,
山旯旮景點有個好處, 就係好多時泊車都唔洗錢。
黎到呼子, 周圍啲招牌都係いか, 亦即係魷魚。
呼子本身其實只係九州北o既一條漁村,
不過因為盛產魷魚而稍有名氣。
因為有啲魷魚品種o既漁期不重複,
所以呼子基本上一年四季都捉到魷魚。
除左黎食魷魚之外, 黎釣魷魚都好受歡迎。
不過小時計劃行程較遲, 加上冇乜釣魷魚o既引,
所以冇將釣魷魚納入行程。
被喻為日本三大朝市(自稱)。
最出名就一定係長野県高山市o既朝市架喇,
其餘兩個, 其實都眾說紛紜, 由得大家自己爭飽佢......
呼子朝市o既大街, 大約只有二三百米,
唔知係因為疫情o既關係,
定係本身真係比較偏遠,or 因為係閒日,
正如上圖所見, 其實並唔係話太熱鬧。
雖然有啲冷清, 但人唔多, 啱晒小弟。
因為係漁村同埋盛產魷魚o既關係,
大份部店舖都係賣海產以及魷魚o既製品。
其中最出名o既係一夜干し,
即係將新鮮o既魷魚處理好之後風乾一晚,
保留鮮味之餘, 又有特別o既風味。
不過可惜, 即使風乾一晚, 一夜干し都仲係生肉,
冷藏的話可以保質一兩星期, 常溫的話頂龍兩三日,
小弟仲有成兩星期o既行程, 所以冇辦法買。
上兩圖就係賣緊一夜干し。
上面幾張圖都係同魷魚有關o既零食,
而下圖就係唔同o既海產製品。
一場黎到漁港, 當然要試下海產o既。
今次係小弟第二次食即燒海螺,
不過小弟都係頂唔順海螺有陣苦味......
另外有一檔即燒魷魚。
係就係幾軟熟o既, 不過冇乜特別。
上圖呢檔, 係一個大阪o既大叔開的,
係用魷魚做飴料, 加上大阪燒o既粉漿整o既,
類似葱油餅咁o既質地o既食物。
下面就係製作過程。
將粉漿用機壓扁, 上下同時加熱,
加入配料, 加埋大阪燒o既醬汁, 卷埋就係。
非常好食就講唔上, 但都唔錯。
不過店主大叔非常熱情, 同埋好多野講,
一邊煮一邊傾, 講左好多野。
原來佢會黎到呼子擺檔, 係因為呼子係佢老婆o既老家,
佢跟佢老婆番黎定居, 就順便係度做小生意。
老實講天氣都有啲涼,
全靠呀叔啲塊魷魚大阪燒, 成個人暖番晒。
下一站, 係坐船出海睇一個海岸o既奇特地形,
不過因為距離下一班船仲有大半個鐘時間,
所以小弟就到左呼子朝市街尾(就停車場斜對面)
o既鯨組主中尾家屋敷。
因為當年呼子都係北九州一個重要o既漁港,
加上當時捕鯨都好盛行,
而捕鯨o既經濟利益都非常大,
所以當年係呢一頭話事o既家族中尾家,
勢力非常大, 富甲一方, 又起埋大屋。
而家o既建築物, 都只係其中一小部份。
入場費唔貴, 入面展示左當年捕鯨人o既生活,
捕鯨o既用品、畫卷、捕鯨o既過程等,
都幾值得入去睇。
可惜入面唔可以影相, 所以冇得post上黎。
好喇, 差唔多到上船o既時間喇。
出海睇o既係呼子(正確黎講其實係唐津市)一個海岸o既六角柱石地質。
下圖可以睇到航線, 一路打橫向東面嗰條線,
就係去六角柱石海岸---七ツ釜。
上兩圖就係要坐o既船, 叫いか丸, 直譯叫魷魚丸。
咁當然, 熟知日本o既看官都知道,
日本人習慣將船隻甚至車稱呼做乜乜丸,
就好似香港人叫船做乜乜號, 叫店舖做乜乜記。
下圖就係碼頭。
2000羊出海, 大約30-40分鐘, 算係咁啦。
唔知係因為閒日, 定係通關未通晒,
計埋小弟, 成隻船都只係得3個人......
坐10零分鐘左右, 就見到目的地。
成個海岸, 幾百米o既範圍,
都可以見到一條條o既六角柱石紋理。
感覺好似細個玩泥膠, 用機壓意粉o既模樣。
上圖可以見到, 其中一個岸尖, 有步行徑延伸落黎,
令小弟決定陣間一定要搵機會過黎行吓。
所為o既 七ツ釜, 就係指有七個大洞。
啲洞其實唔係好大, 能夠俾呢艘船入去o既, 只有兩三個,
仲要只係夠深入半艘。
即使只係入到半艘船,
不過已經足夠讓船上展望台進入洞穴。
三四層樓高o既石洞,
頭頂就係一支支o既六角柱石,
下圖就係石洞o既正上方,
密密麻麻o既六角柱石,
有密集恐懼症o既朋友應該會想死。
其實一直都有擔心,
唔知會唔會無啦啦跌一碌石落黎,
除此之外, 就係石洞一斷滴水。
一來可能係啲浪花令到個洞好潮濕啦,
二來就係可能係上面啲植被o既水滲落黎。
睇左10-15分鐘就開船走了。
離開o既途中, 都仲發現到好多頭先冇見到過o既地形。
只可以用鬼斧神工黎形容。
時間黎到十二點幾, 係時候食野。
黎到呼子, 唔食魷魚仲可以食乜?
大家稍為上網search吓,
就會發現出名o既黎黎去去就得嗰兩三間,
可惜小弟胃就只有一個,
所以只可以去其中一間,
就係下圖o既 河太郎。
河太郎 呼子店
地址: 847-0303 佐賀県唐津市呼子町呼子1744-17
明明朝市都冇乜遊客, 得嗰小貓三四隻,
但唔知點解淨係河太郎門外都已經三四十人,
都未計入面食緊嗰啲人。
感覺上呼子o既遊客都黎晒呢度
(當然, 另外兩三間名店都應差唔多情況)。
攞飛, 個螢幕顯示要等100分鐘......
幻覺黎架啫, 呃我唔到o既,
反正行程好鬆動, 我唔怕等。
結果, 一等就真係等左108分鐘......
日本仔啲野又真係唔呃人架喎......
店入面最symbolic就係正中央一個魚池,
不過小弟獲分發到一個偏廳(下圖)
一場黎到, 當然係要試下いか活造り定食。
應該九成九o既人黎到都係食呢個。
另外有啲單叫o既小食啦。
不過いか活造り定食基本上都包晒。
正式係4餸一湯, 白飯唔係任裝,
不過佢端上一大盒白飯(圖外),
都有正常三碗飯o既份量。
上圖左上方係魷魚燒賣, 中間嗰啲係啲日式醃菜,
右上方係甜品大菜糕, 右下係味噌湯。
亮點當晒係いか活造り所指o既生魷魚。
上到枱啲觸鬚都仲郁緊, 老實講好似有少少可憐......
而旁邊白色嗰片, 就係切到一條條魷魚刺身。
(唔好搞錯, 下面一絲絲o既係伴碟o既蘿蔔絲)
唔好以為店家要你生咬生吞成個魷魚半身,
當你食晒啲魷魚刺身, 店員就會埋黎收走碟野,
然後將魷魚半身切成一舊舊拎去上粉炸。
甚至你話唔想再食刺身, 都可以要店員將食剩o既刺身炸埋。
炸o既方式係上薄粉炸, 而唔係天婦羅。
上圖左下方係混有海苔同芝麻o既鹽。
整體黎講, 炸得恰到好處,
唔會太老太硬, 軟得黎有口感, 仲好鮮甜,
所以話食野都真係食新鮮。
比起點醬油, 小弟都係想意點鹽食最香口。
炸魷魚眼。小弟初初以為會水溜溜又腥又難食,
但意外地, 煙靭軟熟又唔腥, 食落冇乜野。
另外就係魷魚燒賣喇。
唔好俾外面一條條嗰啲野呃到,
嗰啲唔係魷魚(應該唔係, 除非係),
魷魚切左細粒撈埋係啲飴度。
唔知點講, 同港式燒賣好唔同,
偏甜, 但幾可口。
所以小弟以side order o既形式再叫多一碟(上圖)。
老實講, 唔好見啲野細細份,
加埋三大碟白飯, 其實都幾飽肚吓。
小弟就算唔叫多一碟燒賣, 本身都夠飽,
再食埋燒賣, 其實有少少over左。
不過好食, 食幾多都得。
食飽之後係時候運動吓,
頭先講過, 坐船嗰時見到七ツ釜嗰邊,
原來係有路落去岸邊,
所以上網search過路程之後, 就車出發。
再一次感受到自駕遊o既必要性。
黎到玄海国公園,
就係七ツ釜上方o既範圍。
初初有條石級, 都好似靚靚仔仔咁,
但再行出啲, 完全係雜草叢生......
行到出岸邊, 可見到七ツ釜,
咁啱亦都見到觀光船魷魚丸。
上圖應該就係頭先坐船見到,
延伸到海邊o既遊步道。
頭先坐船, 啲六角柱石係頭頂上面,
而家行遊步道, 啲六周柱石就係腳低。
說來慚愧, 小弟從來都冇去過香港個六角柱石地質公園,
但小弟認為, 每個地方都有佢o既特別之處,
加上, 香港個六角柱石海岸, 應該冇呢度幅員咁廣掛。
基於以上毫無事實根據o既推論,
小弟覺得呢個七ツ釜, 都係值得黎睇吓的。
另外,玄海国公園入面有個小神社的,
不過好似冇乜特別, 有埋比較破舊。
三點幾, 都仲有啲時間,
番酒店又好似好浪費咁,
於是又上網search吓近近地有咩景點,
搵到一個叫田島神社o既地方,
位於呼子北面o既加部島。
其實唔係話啲好特別o既景點,
不過冇乜野做, 當遊下車河都好,
因為途中會經過一條拉索大橋。
山腳下o既鳥居遇上喵星人。
沿住岸邊斜坡而建o既田島神社。
又係紫藤花, 似乎北九州好興種紫藤花。
力石。話係當年啲人鬥大力用......
動作咁有趣o既狛犬真係第一次見。
田島神社有一個比較特別o既地方,
就係佢其中一個鳥居, 係對住海的,
沿住石級行落去就可以到碼頭。
小弟去過唔少神社, 但有碼頭o既神社,
除左厳島神社, 都係第一次見。
就算係之前海邊o既神社: 山口県福德稻荷神社、元乃隅神社,
又或者宮崎県鵜戸神宮,
都冇啲咁o既野。
Anyway, 參觀完之後,
都差唔多日落, 今次真係係時候番旅館休息。
正如琴日篇遊記提過,
唔知係咪因為佐賀県做緊旅遊推度,
琴晚o既唐津差啲book唔到住宿。
今晚呼子都係緊緊book到最後一間。
住宿名稱叫百と十,
應該屋owner改建平房而成的,
但個間隔好明顯唔係為住旅遊住宿而規劃, 房間亦只有三間。
但地方新淨寬敞。
地址: 847-0303 佐賀県唐津市呼子町呼子1960-2
小弟做左件錯事,
因為弟係直接email去訂房的,
小弟醒唔起特別講明小弟得自己一個人,
好明顯小弟check in嗰時, 老闆有少少surprise,
結果小弟一個人霸左一間雙人大房。
其實小弟真係好過意唔去,
首先問佢可唔可以調間細房俾我,
但佢話房間都已經安排好,
客人都已經入住。
然後小弟俾錢嗰時, 想俾雙人價錢,
(唔係得個講字, 小弟錢都放左出黎)
但老闆拒絕左。
大約一萬羊per head o既住宿, 有呢個海景真係值得。
而且更難得o既係, 晚飯係老闆每晚親自下廚,
用當地食材煮法國fusion菜。
旅館地面嗰層係一個容納20人左右o既西餐廳,
有啲坐位向海, 簡直係一流!
老闆手寫o既menu
係一個冇得彈o既fusion法式晚餐, 老闆手勢一流。
小弟雖然對西餐冇乜心得,
但每一口食物o既各種味道都好balance,
好明顯係精心設計過。
食完之後, 小弟有足夠理由相信,
老闆好大程度係因為想煮野食所以先開旅館~
食完野, 用zoom上俄文班, 然後休息瞓覺。
好滿足充實o既一日。
沒有留言:
張貼留言