冇錯, 今日o既行程,
係長崎県o既軍艦島。
一早起身,
食過由旅館主人精心泡製o既早餐之後,
9點唔夠就出發去長崎了。
雖然間旅館咁正真係好想住耐啲,
(有關於旅館, 請參考昨日o既遊記)
但因為1點前一定要到長崎,
所以一定要9點前就出發。
飛車飛左3個鐘, 行走左120公里,
總算趕係12點前到達軍艦島デジタルミュージアム(Digital Museum)。
點解要plan一個咁地獄o既行程? 小弟都唔想......
因為家吓要登陸軍艦島就一定要參加local tour,
但小弟呢個九州trip黎得好突然, plan o既時候已經冇乜得揀,
加上前前後後啲行程都冇乜得點郁,
只有淨番今日下午兩點o既local tour係啱小弟.......
小弟參加嗰間local tour,
因為報名o既時都真係爆晒,
得番最貴嗰個premium plan, 所以都冇得話唔揀,
不過premium plan都有若干好處o既, 陣間再講。
Premium plan包多好多野,
首先係同軍艦島數碼博物館有個聯營,
可以無限入場睇展覽
啲登島旅行社,
似乎同軍艦島Digital Museum有某種聯營關係,
因為所有o既登島旅行團,
都會指示遊客先到Digital Museum報名出票(上圖), 以及集合出發。
而出發之前, 都會借用Digital Museum o既立體模型同影像黎做簡介。
(可能某啲plan先有)
軍艦島Digital Museum旁邊, 正正就係通往大浦天主堂o既大道,
路o既兩邊都係為遊客而設o既店舖。
小弟就係唔想同啲遊客迫,
所以專登走向另一個方向搵野食。
但呢區實在係冇乜正正常常o既平民食肆,
加上唔係好夠時間, 結果小弟只係係7仔買左幾個飯團咬.......
咬完飯團入去軍艦島Digital Museum。
頭先都講過, 小弟個Premium plan包左無限免費入場,
不過就算個plan冇包, 小弟都好建議大家出海前入去睇睇,
如果唔係, 大家就只知道軍艦島係一個爛溶溶o既荒島,
而唔知道其細節。可惜真人講解都係日文的。
地面大堂o既大螢幕。係呢度小弟介紹一下軍艦島。
軍艦島, 個名好似好惡咁, 但其實*同軍事一啲關係都冇*。
個名叫軍艦島, 純粹因為從某啲角度睇,
個島及其建築o既剪影好似一隻軍艦, 因以為名。
個島本身叫 端島。
幕末時期開始, 發現呢個島下有煤炭,
及後由三菱收購擁有及開採。
正值當時日本工業及軍事起飛,
煤炭需求十分巨大, 所以呢個事業十分鎌錢,
煤炭礦工o既收入亦非常可觀,
所以即使工作危險, 亦好多人爭住做。
因此, 係呢個全長唔夠500米o既島仔上,
最高峰時間一共住左成5000人,
成為當時全地球人口密度最高o既地方。
出產煤炭可以發電, 而個島又係由公司持有,
所以島上免租免水, 大家只係象徵性俾8羊電費。
係呢個孤島上, 大家有錢冇地方洗o既關係,
大家都將啲錢放晒係生活上面, 買最先進高級o既家俬電器,
令到當時軍艦島家庭o既電器化比率, 比當時o既東京還要高。
當東京o既電視普及率係10% o既時候, 軍艦島係100%
不過花無百日好, 及後日本政府將能源政策,
改為由石油主導之後, 煤炭需求急速下滑,
再加上發生左幾次礦難, 於是三菱關閉礦洞,
及後短短5年內, 所有人員撤離。
因為個島係一個孤島, 撤離後島上面又真係一個人都冇,
所以三菱都冇話特別諗住點處理島上o既建築,
於是個島就一直丟空, 最後仲讓埋俾當地政府。
直到近年, 政府允許媒體登島報導,
無心插柳令軍艦島成為左旅遊業o既新星,
成就左今時今日o既軍艦島登島旅遊。
館內一角, 模擬當年軍艦島居民o既住屋環境。
呢個就係一般員工一家人o既居住面積,
4疊半至6疊, 同香港劏房有得fight。
由於大部份建築物日久失修,
所以就算參加旅行團登島, 都只能夠係建築物區外遙望,
要深入了解軍艦島o既結構同建築,
就只有靠Digital Museum o既展品。
上圖右下, 就係軍艦島其中一個最symbolic o既建築,
30号棟, 係日本最古老o既鋼根水泥公寓。
Digital Museum頂層有一間房(上圖左),
入面可以俾大家戴上VR google,
用航拍機o既視野, 360度全天候進入軍艦島o既建築物,
小弟十分推薦睇吓, 因為只有呢個方法,
可以咁近距離觀觀察, 甚至進入軍艦島o既建築物。
除非閣下好似下圖,
進撃の巨人寫實版o既演員咁,
得到特別許可, 係建築物裏面拍攝。
估唔到係VR google房入面打工嗰個後生仔原來都係香港人。
事關小弟已經戴住左參加旅行團o既name tag,
所以佢睇到小弟個名, 同小弟打招呼。
佢係黎長崎留學o既留學生。
到集合時間。
大家先係Digital Museum集合,
駐館o既職員利用模型,
解釋一下陣間架船點approach個島,
島上面各個特色建築物, 當時島民o既生活,
以及陣間我地可以到o既地方。
因為解說o既大叔, 正正就係當年島上o既住民,
所以講解得非常生動同埋細緻,
可惜佢只講日語。
聽完講解之後, 一團人就黎到幾個路口外o既碼頭上船。
船上面"地面"嗰層已經坐晒人。
因為小弟參加左premium, 所以先有得參加頭先嗰個真人講解,
其餘o既"平民"就一早到碼頭上船坐定定等小弟們。
即使一般平民冇得參與頭先嗰個真人講解,
但船上面都一直有播軍艦島o既簡紹同埋介紹沿途風光。
所以你如果識日文都話, 都會得到最基本o既訊息。
途中經過三菱造船廠, 可以見到建造中o既日本自衞軍艦。
另外, 經過一個島, 上面有教堂同埋好大個聖母像。
開始見到軍艦島,
premium o既好處, 就係成員可以到遊艇上層,
自由走動影相, 而一般平民只可以坐定定。
你遇著坐正人群中間, 真係想影張相都難。
下面一連串, 夾住一啲zoom大左o既圖片。
因為事實上係島上可以走動o既地方非常有限,
唔咁想影遠鏡, 根本唔會有機會睇到咁多建築物。
上面呢張圖, 應該係最似軍艦o既角度。
頭先到提過, 事實上係島上,
可以走動o既地範圍非常有限,
上圖可以見到, 紅色就係登島路線。
只可以係島o既其中一邊外圍逗留。
上岸了。
當年起黎擋浪o既圍牆。
登島之後有三個逗留點,
大家都要按導遊指示停留, 唔可以周圍走,
因為同時間都仲有幾個旅行團係島上,
佢地夾好晒啲時間, 如果唔係會打大交。
你會話, 俾幾舊水甚至成千銀,
咁都唔可以自由活動, 好搵笨。
但又唔可以咁睇,
一來, 啲建築物真係冇保養過, 真係隨時都會冧。
事實上導遊講解o既時候, 建築物都耐唔史冧跌啲野...
所以佢地成日都話, 要睇最新o既軍艦島,
就一定係這一刻, 因為下一秒鐘又會冧梗啲野少梗啲野。
二來, 其實有得你上岸都痾里吉帝,
因為有時風高浪急, 連岸都冇得上,
只可以係海度遙望......
小弟唔知道係我地個團係咁, 定係其他旅行社都係咁,
小弟個導遊, 以前細個都係住係軍艦島附近一啲有煤礦o既島,
佢父親都係做礦工。不過佢嗰個島冇軍艦島咁出名( 池島)。
可能因為咁, 導遊講到好多礦工o既危險同辛酸俾大家聽,
加上導遊一把利舌, 一切都講到好生動,
聽到大家都眼泛淚光。
上兩圖影o既, 係島上礦工o既大浴場,
大家都可以見到圖中靠左下方有啲白色方形瓷磚,
就係浴池o既舖裝。
另外都仲有好多特別o既資訊。例如
日本一向都係小學、初中、同高中分開運作,
但因為地方不足o既問題, 軍艦島上面係實行小學中學一體制。
而學校同樓宇o既天台就用作耕種, 走在善用土地o既尖端。
另外, 一來因為個島係由三菱擁有, 係工作o既地方,
二來都係嗰句---唔夠地方, 所以島上並冇乜娛樂場所。
最初只有一間影院, 後來有一間柏青哥, 亦即係彈子房。
不過後來發覺啲員工掛住玩柏青哥唔番工, 所以下令關閉。
但經過眾人力陳, 最後三菱決定自己經營柏青哥,
於是成就左, 工資來自三菱, 用在三菱(柏青哥),
呢一個永久機關, 無限循環。
為左安全, 遊步道同建築物都有好一段距離。
石垣
逗留左唔夠一小時就要離開了。
因為係premium o既關係, 有名信片送。
上番岸, 經過匯豐銀行長崎分店,
不過小弟想睇大浦天主堂多啲, 所以skip。
周圍都係賣吉士(Castella) o既產品。
正式進入教堂前, 左手邊有個小庭園,
入面有啲雕像同埋壁畫, 紀念偉人同殉教o既人。
教堂入面可以參觀, 但可惜唔可以影相,
所以教堂o既相只係黎到呢度。
不過面向教堂o既右手邊, 有另一個建築物 (下圖),
舊羅典神學校, 羅典, 即係拉丁,
小弟十分喜歡Latin呢一個翻譯名譯,
可以解讀為「羅馬典籍」, 是為羅典, 像聲又會意。
而家作為博物館, 十分詳細地介紹天主教傳入日本o既歷史,
最多著墨當然係天主教同北九州一帶o既關系。
不過實在太多史料同文物展出,
如果好俾心機睇, 睇成粒鐘都睇唔晒。
小弟又唔係宗教人士, 所以睇睇吓都變左水過鴨背......
睇呢啲文化交融, 往往會有啲有趣o既野出現,
例如展覽入面有一幅舊日本畫,
題材係天主教o既「最後審判」,
入面畫到耶穌佢地好似閰羅王咁, 十分有趣。
臨走, 係教堂外,參道o既一間布甸店,
買左兩個布甸番酒店食。正。
今晚只係長崎第一晚, 加上周車勞頓,
草草係酒店附近食左個拉麵就算。
沒有留言:
張貼留言