今日黎個瓷藝文化之旅,
因為三個景點入面, 有兩個都係日本燒瓷o既勝地,
分別係 伊万里 同埋 有田。
而上圖就係有田o既陶山神社陶瓷鳥居。
先係由長崎飛兩個鐘車到伊万里。
明明伊万里同有田都係佐賀県,
點解小弟o既行程要咁樣由長崎屈番上去?
因為plan行程嗰時book唔到位睇軍艦島,
所以唯有今日咁樣北上番去佐賀。
對軍艦島有興趣o既朋友可以睇番琴日嗰編blog。
閒話休提, 番番黎伊万里。
伊万里大川内山,
村口就已經係免費停車場,
而單單淨係停車場, 已經十分有氣氛,
因為出面條小橋o既矮牆, 已經係由瓷器所裝飾。
係用瓷器o既碎片砌成。
亦都有整塊o既圖案。
而對正停車場, 就一大塊由瓷片砌成o既地圖, 真係十分有心。
小弟唔知咁樣燒瓷拼出一塊地圖, 技術成份有幾高,
但已經深深感受到伊萬里係一個瓷藝o既小鎮,
亦都俾到遊客一個好深印像。
唔知係咪因為時間係早上, 加上天氣陰晴不定,
定係伊万里個氣氛本身就係咁,
成個伊万里都好靜, 亦都冇乜遊人。
先介紹伊万里先。
伊万里大川内山 (下略伊万里),
日本最出名o既瓷器生產地之一,
全因為附近o既黏土十分適合做瓷。
當年中國仲係瓷器大國, 但日本人未識燒瓷,
而近水流台o既高麗人已經由中國學到一定o既技術,
於是日本出兵打高句麗o既時候,
就順便捉左一班高麗o既燒瓷師父番黎日本,
要佢地教日本人燒瓷。
因為想要獨佔技術, 加上要保持瓷器o既質量同珍貴度,
古時o既伊万里係官窯, 除左貨物進出之外,
人員o既進出亦都受到嚴格o既限制。
燒得唔好o既瓷器, 會立刻打爛,
品質ok, 先會送到一眾將軍名流手上。
雖然村裏面o既匠人, 人身自由受到限制,
但相對地, 官府會擔保佢地衣食無憂,
要乜有乜, 食好住好, 只要能夠專心燒到靚瓷器就得。
可能呢個就係做就日本匠人精神o既原因之一。
唔會好似中國咁, 一直只標榜萬般皆下品, 唯有讀書高。
小弟都只係漫無目的咁週圍行吓,
所以見到氣氛幾好o既店, 就會入去行吓。
杯杯碟碟就一定唔會少
呢個瓷頭盔應該只係店家做黎裝飾, 但幾別緻。
呢間店入面有個神壇,
可以見到祭祀o既有白蛇。
日本o既白蛇信仰有唔同o既象徵意義,
不過小弟都唔係好清楚呢度o既白蛇係咩意義,
上網搵過吓都不著邊際。
同一個店內, 仲有有一個窯, 應該只係demo,
但好有特色。
細心啲睇, 地上唔係一般o既碎石,
而係一個個器皿o既底。
連獎盃都可以用瓷黎做, 都幾特別。
如果係啲文化類比賽, 小弟收到個咁o既獎盃,
應該會幾開心。
連路標都係由瓷磚燒成。
點解會有高麗人の墓，
原因就係頭先講過, 當年第一批教燒瓷器o既,
就係由高句麗捉番黎o既高麗人。
好明顯, 風格同頭先嗰間好唔同。
另外, 番番黎村口停車場對面,
基本上伊万里每一間屋, 都係一個窯&陳列室,
小弟粗略估計, 大大話話都十幾二十個以上,
要逐個行晒, 都幾係野。
老實講, 其實有啲瓷器係幾靚,
唔同店亦都有自己o既特別產品。
不過一來, 小弟又未至於咁有米買呢啲野番屋企粗用,
同埋小弟又仲有成個幾星期o既行程,
所以完全冇買野。
不過小弟覺得, 日後都可以帶兩老過黎睇吓,
到時買番幾個玩意番香港都未嘗不可。
時實上, 如果係文藝人士的話,
好適合黎伊万里睇下瓷器製品, 足以行半日。
就算快行, 相信都可以成為一個兩小時左右o既景點。
小鎮內好多路旁o既事物, 都由瓷器所砌成,
令呢個偏遠o既小鎮, 加上了一點氣質。
其實小弟都入左六七間店細看,
不過唔逐個影相喇,
一來太多相放上黎大家都未必有興趣睇,
二來, 小弟又唔係買野, 吓吓咁樣起勢咁影, 唔係咁好意思。
除左窯之外, 小鎮旁仲有一個小公園,
唔可以講得上好有看頭, 但行下散下心都唔錯,
加上而家紅葉季節, 小弟就順便影下楓葉。
上圖o既路應該係通向一個古窯o既遺址,
不過因為道路崩塌, 所以通行禁止。
因為公園依山而建,
所以可以望落去小鎮, 見到一支支煙囪。
又有一個公園仔。
頭先揸車入黎, 掛住搵路, 都冇留意,
超正o既紅葉。
條橋一邊係龍, 一邊係鳳。
原來村口百幾米外已經有一條橋, 都係由瓷器所砌成。
初初諗住冇乜野好睇, 但逐間店行吓行吓,
再加埋兩個公園, 唔覺唔覺又行左粒幾鐘。
係時候祭五臟廟。黎到o既係一間叫做ドライブイン鳥 (Drive-in鳥) o既店。
睇個名都知係食雞的。
全個佐賀県o既県民都應該識呢間店,
應該話, 唔識呢間野唔好話自己係佐賀県居民。
一來, 係好食o既,
二來, 佢o既slogan 同廣告實在太洗腦。
三來, 係, 小弟認, 係因為動畫《ゾンビランドサガ》所以識得呢間店。
總店地址: 佐賀県伊万里市大坪町甲1384-2
佢句Slogan: 燒雞最好食, 然後炒雞飯
其實仲有下文的, 全句係:
「やき鳥一番、鳥めし二番、三はサラダで、四い健康、五つもニコニコ、鳥で満腹」
識日文o既朋友應該會留意到, 四同五係玩食字,
而最後個「鳥」同「トリ(壓軸)」係同音。
不得不讚嘆諗出呢句slogan o既人o既才華。
因為間店唔係話係啲大城市入面,
所以小弟初初諗住去到就算等位都唔會等好耐,
點知真係唔好睇少呢間野,
小弟雖然成點幾鐘先到 (錯開左少少peak hour),
但都要等成半個鐘先有位。
同埋觀察顧客, 客層非常廣,
一家大細、上班族、學生、情侶、老夫婦,
真係乜人都有。
以上係menu,
呢啲情況, 有定食就係好, 乜都唔洗諗, 樣樣有齊。
不過小弟叫o既唔係一番定食,
而係上圖冇o既Special定食, 陣間講有咩唔同。
無論你係一個人定係一班人一,
基本上都係獨佔一個compartment的。
有時見到出面咁多人等緊, 但小弟一個人霸一間房,
唔多唔少都有啲過意唔去。
一番定食乜都有, 不過都係雞,
上圖就係小弟叫o既Special定食,
眼利o既朋友應該認得出, 中間盤肉,
除左雞之外, 仲有幾舊佐賀牛。
呢個就係小弟揀Special定食o既原因。
另外, 左下係炒雞飯,
左上係沙律, 右上係用黎燒o既疏菜。
完全體現左佢句slogan。
燒牛會分部位, 應該都已經係常識, 但呢度連燒雞都有講究,
上圖最左邊o既係雞頸肉, 勁爽口!
當然仲有雞心雞腎呢啲雞雜。
下圖就係店入面, 教大家分雞o既部位o既poster。
其實一個男人, 食完佢一個Special定食都有啲飽,
不過小弟見個menu, 入面有個side order太吸引,
就係上圖o既炸雞皮。
炸到透o既雞皮, 再伴上少少椒點,
食到個口損晒都在所不惜!
頭先一開始都講過,
小弟都係因為一套動畫《ゾンビランドサガ》所以先認到呢間食肆。
係等位o既時候, 小弟就已經全方位地拍攝,
以下都係一啲動漫o既內容,
冇興趣o既朋友可以飛落去下一個景點。
Crunchy chocolate bar
雞飯飯團
作家、製作組、聲優等o既色紙。
タネキ～
羨ましい, 小弟都想俾一班靚女聲優圍住影相......
店外停車場o既水渠蓋。
飯又食完, 宅又宅完,
係時候黎到下一個景點,
同樣都係以盛產優質瓷器出名o既有田。
首先黎到有田o既陶山神社。
因乜解究下面係影住條火車軌。
係因為陶山神社其中一個特色,
就係JR o既火車係會駛經神社境內
經過一條石階, 就會首先見到上圖o既車軌,
而且仲要係冇欄冇閘的, 有時有啲人掛住影相,
小弟都覺得幾危險, 但亦都係陶山神社o既特色。
下圖可以睇到, 人同火車係冇任何分隔。
全日本鳥居有好多, 但用瓷器黎裝飾o既,
全日本就應該只有呢一個。
有別於木造o既、石造o既、紅色o既、灰色o既,
陶山神社o既鳥居用青花瓷黎包裹住, 十分有特色。
除左鳥居之外,
神社範圍內, 所有可以用瓷黎做, 或者可貼上瓷片o既,
都會用上瓷器。
無論係燈籠
或者係狛
定係介紹文, 全部都係瓷器。
仲有下面呢啲小弟都唔知叫乜喇。
而且啲瓷器雖然有啲可能日久失修,
但睇得出製作一啲都唔馬虎,
圖案十分精細。
再加上咁啱正值紅葉季節,
紅色o既楓葉襯托住藍色圖案o既瓷器,
十分搶眼。
其他神社, 地面最多都係舖啲灰色o既碎石,
但陶山神社呢度係舖白色o既小石春。
神社依山而建,
而係神社o既背面o既山坡,
有一條小路向上延身。
鐘意瓹窿瓹罅o既小弟, 當然係行下睇下通去邊。
首先會見到一個小神社, 應該係稲荷神社。
再行無幾遠, 會見到一大個墳寫住李参平の碑,
姓李o既, 應該都當年第一批黎日本教燒瓷o既高麗人。
由呢度可以一暏有田市。
上圖樓梯盡頭o既建築物就係賣御守りo既地方。
睇完陶山神社, 一落樓梯, 點解咁熱鬧o既?
果然係以陶藝為主o既神社,
啲御守り全部都好有特色。
大部份都有白瓷o既成份。
小弟就係下兩張圖o既御守り之間爭扎。
圖一係布質藍色圖案中間有一塊白瓷。
而圖二就係成塊都係瓷器。
掙扎左一輪之後, 小弟最後決定買布底嗰個,
因為小弟好鐘意藍色,
佢幾種藍襯埋, 再加啲金線, 實在好正。
另外, 小弟買左個虎形陶瓷御守り,
個小布袋, 可以當袋仔用, 又可以當Cushion用。
原來搞緊陶磁器祭り, 唔怪得有田多人過伊万里咁多啦。
出到大街, 有田同伊万里最大一個分別,
就係有田中間有一條大馬路貫穿, 而平行仲有一條鐵路,
所以可能因為咁, 有田o既accessibility比伊万里高, 知名度都較高。
事實上, 小弟進行今日行程之前,
都有少少覺得有田o既名氣比伊万里稍高(個人感觀......)
小弟都入左幾間店睇, 但整體感覺上,
相比起伊万里, 有田賣啲野, 好似偏向俗氣少少,
具體啲應該話比較偏向吸引遊客一啲,
同埋款式、種類比較新穎一啲。
當然小弟唔係話所有有田燒都係咁,
只係小弟個人入過幾間店後o既主觀感覺,
有唔啱請指正.....
有田另一個景點: トンバイ塀のある裏通り。
トンバイ小弟都唔知點譯喇, 上網搵都搵唔到中文,
簡單黎講, 係トンバイ係用黎起窯o既耐火耐熱磚,
而呢度石塀就係用呢啲石材,
加埋燒瓷o既一啲廢棄物所建成。
上圖遠處可以見到有一間小咖啡店,
遊客可以坐係啲長凳度休息及打咭。
最後一站黎到祐徳稲荷神社,
因為秋天入黑比較早,
雖然只係四點幾, 但個天已經開始黑。
祐徳稲荷神社, 係西日本數一數二o既大神社,
亦都係同京都伏見稲荷大社、茨城笠間稲荷神社齊名o既日本三大稲荷。
神社有幾把炮, 好多時未入個神社,
淨係行外面o既參道已經略知一二。
由最外面嗰個鳥居, 行到入去主建築群,
已經講緊成三百幾米, 行成十分鐘, 兩旁商店林立。
同一般稲荷神社一樣, 都係以紅色為主,
但祐徳稲荷神社 就更加色彩斑斕。
楼門
上圖就係御本殿,
因為依山而建, 所以好似清水寺咁, 下面由支架支撐。
御本殿正前方有一銀杏樹,
雖然係幾阻住個御本殿景觀,
但全黃o既銀杏係幾靚。
御本殿左右各有一條樓梯,
採取順時針方向, 左上右落o既方式參拜。
經過上圖o既御神楽殿, 右手邊就係下圖o既樓梯口。
御本殿, 比頭先o既楼門等更加絢麗。
御本殿o既天花
都係啦, 因為動畫o既效應同埋推廣,
神社裏面都好多相關o既絵馬。
不得不說, 《ゾンビランドサガ》
絕對係近年, 利用動畫作地域推廣o既成功之作。
同其他大社一樣, 好多時拜神社, 其實係拜緊成個山頭,
所以成個山都係神社o既範圍, 而神社亦都依山而建,
一路上都仲會有唔同o既小神社同奧ノ宮等等。
鐘意瓹窿瓹罅o既小弟, 又係時候上山了。
越上, 啲鳥居就越冇咁光鮮,
樹木亦都越高大, 加上天黑黑, 好有氣氛。
目標本來係山頂,
不過行到半山, 發覺前路封左待修。
(上圖石鳥居後o既紅鳥取有雪糕筒同告示)
明明前點啲石級好有氣氛......
只好係度影番張相就落山。
咁係防止上山o既人同落山o既人炒埋一碟。
黎到長崎, check in 左, 係時候搵食。
以為上唔到山頂, 即係去唔到奥の院,
點知落左一段路, 發現就係奥の院,
咁頭先石級繼續上山係啲乜.......
繼續落山。
因為天都黑, 商店都閂門,
所以小弟除左走人, 都冇乜野好做。
上圖係參道其中一間店賣o既地道菓子,
個麵包皮有啲煙靭, 裏面係紅豆蓉。
動畫《ゾンビランドサガ》其中一幅eye catching,
就係下圖嗰間店。
6點已經全黑。
係潻黑中飛車,
由祐徳稲荷神社飛70公里到長崎市。
因為冇主要幹道, 小弟又唔行收費高速,
所以大部份路程都好以上圖咁,
全黑, 一盞街橙都冇, 只有車頭燈。
第二晚黎到長崎, 都未正正式式食ちゃんぽん。
跟住日本食評搵最出名o既ちゃんぽん店,
黎到思案橋横丁, 可惜......
唯有跟住食評搵第二間,
點知第二間咁啱今日休息......
頂......
地址: 〒850-0853 長崎県長崎市浜町６−17
雖然話係其次o既其次,
不過係呢個ちゃんぽんo既發源地兼激戰區,
能夠榜上有名, 已經一啲都唔野小。
由上圖o既簽名板睇黎, 都有好多名人黎過幫襯。
其實仲有好多簽名板, 不過小弟認識o既唔多。
講番咩係ちゃんぽん先啦。其實係拉麵o既一種。
間間o既做法可能有少少啲唔同,
不過大致, 都會將配料落鑊炒一炒,
然後再加埋個湯底黎煮, 最後將淥好o既粗麵加埋落碗就完成。
因為配料炒過o既關係, ちゃんぽん一般會比日式拉麵更香口,
湯底亦都比較濃。
就咁長崎o既第二晚就咁過左,
聽日早上去埋長崎o既企鵝水族館之後,
就離開長崎。
沒有留言:
張貼留言