黎左九州超過一個星期,
今日總算真真正正睇到全紅o既紅葉喇T_T
不過呢個留番遲少少先講,
而家先由早上o既活動講起。
今日第一個活動, 係球磨川下り,
本身所謂o既球磨川下り, 就係坐住船,
沿住人吉o既主河流, 球磨川, 一路向下游進發。
本身球磨川下り有一啲激流o既段落,
不過因為之前有大風雨破壞左原來o既河域,
又多左好多大石沖左落河,
再加上球磨川有工程, 所以有關激流o既船運完全停運,
而家就得番靜靜咁坐係船度參觀人吉城跡,
亦都係小弟今日參加o既行程「梅花の渡」。
上圖就係營運o既大本營, 而下圖就係裏面o既情況,
除左賣手信同埋辦理觀光船手續o既櫃檯,
可以見到有一個cafe, 相信唔洗參加球磨川下り都可以黎chill下的。
因為小弟黎得比較早, 先仲係10點, 所以冇人黎cafe。
辦好手續, 夠鐘就上船。
本身email溝通嗰時, 船公司話,
會有台灣o既攝製隊同小弟同船,
問小弟介唔介意。小弟就冇乜所謂o既,
不過好似因為攝製隊改左行程,
所以最後小弟都係同另外兩班日本人坐船。
天有少少陰, 但都唔係話特別差。
船夫都話, 因為停左激流o既活動,
所以球磨川一下子靜左好多, 好可惜。
不過佢話上游o既工程完左之後,
會慢慢開始番激流o既活動。
下圖圍左橙帶o既地方, 就係工程範圍之一。
老實講, 就咁坐係船度,
大家除左同船伕吹下水之外,
都冇乜野好做。
下圖開始係人吉城跡o既相。
叫得城跡, 即係城樓都冇個,
只可以睇下河岸o既紅葉。
唔知係咪太悶, 定好奇心驅使,
有一個乘客問可唔可以試下划船,
船伕亦都好好人咁講解左幾下之後俾佢試划。
半個鐘船程, 盛惠2千羊。
希望到時激流段重開, 可以有更好玩o既線路。
告別球磨川, 黎到阿蘇三社之一o既青井阿蘇神社。
鳥居外, 禊橋下o既池塘, 本身係荷花池,
當然而家係秋天, 只會見到枯枝。
咁啱近日係七五三o既日子。
七五三係日本人幫小朋友慶祝o既節日。
因為舊時多天災人禍, 病患苦困,
小朋友能夠大得一歲已經好難得,
所以日本人會為三歲或七歲o既女孩子, 以及五歲o既男孩子慶祝。
大家見到啲日本傘, 都係啲佈置。
大大隻字「七五三」。
神社o既神官準備下一場祝禱。
青井阿蘇神社o既歷史都唔野少, 已經有1200年歷史。
拝殿(上圖)入面進行緊七五三o既儀式(下圖)。
上圖屋簷內左上方,
可以見到有一個白色o既面容(放大黎睇就見到),
其實係向住兩個方位, 個口一開一合o既面相,
四隻角各有兩個面相, 有喜怒哀樂四個表情,
只有青井阿蘇神社先有咁o既裝飾,
所以被稱為「人吉様式」。
本殿o既造式, 係三間社流造銅板葺,
講完都唔知係咩......
青井阿蘇神社入面仲有分社, 青井稻荷神社(左)及宮地嶽神社(右)
今日第一個主打, 就係黎食琴晚食唔到o既鰻魚飯。
上村うなぎ屋
地址: 〒868-0003 熊本県人吉市紺屋町１２９
一步上左山丘頂, 立刻就見到一大片楓樹林,
11 點半左右黎到, 其實都未到小弟o既食晏時間,
亦都已經比一般人食晏o既時間早。
咦, 好似未有人排隊喎, 正。
於是推門入去問有冇位。
店員話:「過隔黎停車場排隊啦。」
先發覺原來上圖左邊嗰個窿位,
已經坐左十幾廿人排緊隊。
但小弟冇唔開心, 反而鬆一口氣。
果然名店都係要排隊, 排得越多人, 小弟就越放心。
隨住越黎越近正午, 黎排隊o既人就越黎越多。
當小弟排到入店, 先發覺店裏面都仲坐住十零人左右排緊隊。
等左45分鐘, 終於入到飯桌坐低。
佢入面個面積比係出面見到o既大,
有好多箱房, 加埋晒應該可以容納60人以上。
即使店舖咁大,
加上小弟已經係peak hour 之前己經黎排隊,
再加上人吉都唔算係咩大城鎮,
但都要排咁耐隊先有得食, 足以證明佢o既人氣。
小弟獲安排坐箱房, 不過箱房分左三張枱。
鰻魚本身來貨價已經貴, 所以個價錢算係咁。
多國語言餐牌。
小弟叫左個うな重。
「重」, 即係「重箱(Juhbako)」, 指o既係嗰個好靚o既餐盒。
好唔好食? 對唔住, 一定唔會唔好食,
不過硬要小弟比較的話, 小弟會覺得上次名古屋嗰間,
燒得比較外脆內軟一啲。
不過, 只係比較對象太強啫,
所以如果係黎開人吉附近一帶,
絕對值得黎排隊食。
事實上, 小弟而家已經唔能夠食香港o既鰻魚......
因為全部都整得唔好食......
只會到日本先會食。
食飽, 黎下一個景點,
目標係紅葉秘所, 麓城跡,
不過要先經過谷水薬師呢間小廟。
事實上又山卡啦, 條小路又唔起眼,
如果唔係事先上網搵個資料, 都唔信行入去有紅葉。
沿住上圖右邊分叉路行就啱。
係入口處有啲紙, 自助交易,
陣間再講吓呢啲咩紙。
沿住小路行。
途中經過家族杉。
係其他地方, 兩碌黐埋一齊o既夫婦杉就見得多,
今次唔只夫妻, 仲一家四口黐埋一齊,
真係冚家杉。
行大約百零二百米, 好快就見到入口。
上圖o既入口, 可以見到兩個好核突o既像,
其實係仁王像。
(即係華人所謂o既哼哈二將)
點解佢個身有白色一pat pat野,
原來係呢度有個習俗,
話一邊諗住自己身體邊度唔妥, 一邊揸埋舊紙,
整濕佢然後撻上個仁王像上面, 就可以好番......
↑說明文
所以頭先入口嗰啲紙, 就係咁樣用。
Anyway, 經過上面o既仁王像之後,
行經一條石級, 就可以到谷水薬師間廟。
而呢個石級, 係一個唔錯o既打咭位。
上左石級, 到谷水薬師間廟,
一地都係銀杏落葉, 最適合低炒。
係呢啲山卡啦, 冇人長駐,
都可以保持到咁企理, 算係咁。
點講都好, 谷水薬師唔係小弟o既目標,
所以呢度匆匆帶過就算。
係谷水薬師旁邊, 仲有路牌指向麓城跡。
頭先由停車場行到谷水薬師,
啲路都有舖石或水泥的,
但由谷水薬師到麓城跡, 就只有泥路,
加上呢排都有啲毛毛雨, 條路都有啲跣。
行唔夠二百米, 周圍o既植物,
就慢慢由綠色, 漸變為紅/黃色。
上圖就係步上麓城跡最後幾步路。
全部都紅當當, 何其壯觀。
麓城, 又稱為上村城, or亀城。
最早係山賊o既地盤, 建築時期已經不能考究,
後來由上相良家統治下, 成為左人吉城o既支城。
而而家, 乜野城樓都睇唔到, 只係得番滿山o既楓樹。
個山頭高低起伏, 大約1/3個足球場左右大,
好難得清一色都係楓樹,
真係拎起鏡頭求其影都唔會唔靚。
下面都冇乜野好講喇, 大家睇相啦。
初初都陰天,
影影下出埋太陽, 天公造美。
因為地方都唔係話特別大,
加上清一色紅葉, 冇乜話要點樣特別去影,
所以大半個鐘, 小弟都影到夠本。
話雖如此, 但紅葉時節, 麓城跡絕對係值得到訪o既紅葉秘所。
本來要飛兩個半鐘車, 北上番番去阿蘇山o既北面,
不過時間尚早, 所以兜少少路,
順便去埋人吉附近o既鐘乳石洞, 球泉洞。
一般自由參觀路線, 1100羊, 一啲都唔貴。
另外有探險路線, 不過要join團。
有指定時間(上圖黃色表),
咁啱小弟錯過左啱啱嗰團,
又唔想花時間等下一團,
所以都係一般路線就算。
經過長長o既隧道, 就到鐘乳石洞。
大家做個好遊客, 跟住「順路」o既指示遊覽啦。
天然橋---上面嗰塊用狗臂架固定住o既石。
話係舊石咁啱跌左係呢個位,
而又咁啱係完全水平咁晾住左。
球泉洞冇山口県o既秋芳洞廣闊, 偏向上下起伏多,
上圖可以見到兩層高o既樓梯。
一大片瀑布形o既鐘乳石,
不過小弟壓縮左張相, 所以睇得唔太清楚。
因為水一直都係向下流,
所以出現橫向, 甚至係兜番向上o既鐘乳石, 係極其罕見。
下圖可以見到支鐘乳石有分支。
但實在太細喇, 背景又花,
又隔住鐵絲網, 所以呢張相未必睇到好清楚。
雖然球泉洞冇秋芳洞咁大,
洞內其中一條通道,
條路兩邊啡啡黃黃, 就係由蝙蝠屎尿形成o既羥磷灰石,
有睇過漫畫《Dr STONE》o既朋友可能會感到興奮。
完整鐘乳石石柱
圓形塊狀鐘乳石群
好似鬼爪一樣。
呢個鬼爪位就係球泉洞o既折返點,
當然, 只要跟住順路行就唔會撞到人。
有鍾乳石都仲係滴住水......唔係, 直頭係流住水。
唔同o既石層。
如果閣下係參加探險course的話, 就會行入呢條支路。
同中國o既黃龍洞更加係冇得比,
但如果黎到人吉一帶, 都值得黎遊覽一下。
由球泉洞揸三個鐘車,
到達今晚o既住宿ホテルサンクラウン大阿蘇。
因為中間唔夠油, 而且一直荒山野嶺,
要兜到比較遠先搵到油站,
搞到夜左少少先到酒店,
啲食肆都閂晒門, 只好食便利店o既飯。
沒有留言:
張貼留言