雖然旅行一共有16日,
但真正o既觀光黎講,
今日係最後一日。
早上係由布院溫泉旅館食左個豐富o既早餐,
再標個尾會浸個溫泉之後, 就出發最後o既紅葉之旅。
Plan左兩個紅葉點點係回程番福岡o既路上。
第一個係秋月城跡。
因為秋月城跡附近冇得泊車,
所以要將車輛泊係建築群外面,
然後行大約400-500米到賞紅葉o既地方。
沿途都有唔少古蹟同埋小店,
所以行呢幾百米唔會覺得悶。
途中經過呢個叫杉の馬場o既長長道路,
話以前附近有棵好大o既杉木,
加上以前o既藩主同將士係度練馬術,
因以為名。
一到左春天, 遊人就好似置身於櫻花o既隧道當中。
嗯, 小弟又要book mark一個櫻花名勝。
黎到秋月城跡, 觀賞紅葉o既核心o既外圍,
就開始見到楓紅喇
(又核心又外圍, 你講緊乜...)
沿上圖o既石級上, 就會到秋月城跡。
而條石級, 亦都係一個好好o既拍攝地點 (下三圖)。
今次整個兩週o既紅葉之旅,
老實講, 之前一直都係唔太遇到好多紅葉,
「睇唔到」比「睇到」, 大約係6:4比,
但今日最後一日, 總算都可以睇到全紅o既紅葉,
都真係好開心。
境內有啲城門, 有啲石燈籠等等,
非常識合拍攝。
另外, 天公都造美, 一直陽光普照。
境內仲有一個叫垂裕神社,
係祭祀呢度o既歷代藩主。
不過因為今次行程主角始終都係紅葉,
所以小弟都冇深究。
係秋月城跡有個奇遇,
係小弟影影吓相o既時候, 無啦啦俾人響全名......
回頭一望, 竟然係一個中學同班同學。
雖然秋月城跡都算係一個小有名氣o既紅葉名所,
但小弟真係冇諗過呢啲山卡啦會撞到熟人。
聽佢講, 佢同佢媽媽係坐公交黎秋月城跡。
小弟深明呢啲山卡啦交通有幾咁唔方便, 班次有幾疏,
既然咁有緣, 小弟就決定車佢地到附近o既大JR站。
路上有講有笑, 他鄉遇故知, 都幾開心。
因為大家目的地唔同,
小弟放低左中學同學&佢媽媽之後,
就黎到今次整個行程o既尾站,
竈門神社。
竈門神社, 除左紅葉之外,
其實並唔係話十分大名氣,
不過近年因為動漫《鬼滅の刃》,
男主角個姓同神社同名, 所以多左好多人拜訪。
Anyway, 小弟今次主要係睇紅葉。
參考咁多日以來o既行程,
同一日兩個景點都有紅葉, 真係好難得,
而今日, 得左! 為兩星期o既行程畫上完滿o既句號。
因為小弟黎到時已經係三四點,
開始日落西山, 所以光線開始偏黃。
不過咁樣, 反而更加有利拍攝紅葉,
而且有啲位遇上西斜, 影得仲靚。
唔講咁多喇, 大家睇相啦。
頭先都提過, 因為動漫《鬼滅の刃》o既影響,
所以多左人黎參拜。
大家睇吓上下圖呢啲絵馬, 就知道影響有幾大。
特別新特別Fancy。
宝満宮竈門神社境內有一排鳥居,
當然一定唔及伏見或者祐德稻荷神社,
但作為一個拍攝o既地點, 已經夠晒正。
一連13日o既北九州紅葉之旅就完結了,
淨低聽日只係番係福岡,
買少少野, 中午就上機番香港。
呢13日, 差唔多日行130公里, 實在太癲。
(上圖行車紀錄o既路線, 只係顯示到過去7日行程,
所以show唔到一開始福岡到長崎嗰幾日)
晚上, 係福岡車站附近一間もつ鍋o既店,
食到反肚之後, 就番酒店瞓。
沒有留言:
張貼留言