今日o既主要活動, 就係揸越野車仔(Buggy Tour)遊 裏砂漠。
所以點解小弟琴日話唔兜去表砂漠行山,
因為今日都會去砂漠。
係出發前一早係網上做好晒預約。
小弟只需時按時出現同俾錢就得。
如果有其他人同你一齊報名,
又或者同一個時段有其他參加者, 咁就位位12000羊
但如果成個時段真係得閣下一條友的話, 就要18000羊。
成個節目預番個半至兩個小時。
每日有三個時段, 小弟因為要就番4點鐘嗰班船,
所以參加左正午嗰個時段。
集合地點係一個鳥不生蛋o既地盤,
如果唔係事前再三確認, 我真係唔會覺得係度集合。
除左上圖三架小越野車之外,
仲有下面兩種吉普車仔。
但坐邊架就由職員分配。
然後小弟明白點解會係呢個工地集合。
因為一來啲車仔係收係呢個工地o既container入面,
二來, 呢度夠闊夠大可以俾啲人試車練車。
小弟唔知佢地有冇第二啲員工,
定因為小弟一直用日文同佢地電郵聯絡,
所以佢地好放心搵個日文staff serve我呢一節。
但佢地個staff似乎唔太識外語,
唔知有外國遊客時, 佢地會唔會有相對應o既外語職員。
雖然佢地網頁都有講, 外國遊客只要有國際牌就揸得。
聽完講解, 正式上公路去裏砂漠。
可能因為見到小弟揸車有文有路,
所以安排左我去最後, 職員就係最前領隊。
事實上係, 架車仔只有50cc,
所以聲就大, 但車速就慢, 尤其是上斜。
同埋如果去到啲窄路的話,
就要打死火燈靠左, 後面車輛先行。
但因為平日都冇機會揸呢啲車出馬路,
所以感覺都幾新鮮。
上圖就係由公路轉入裏砂漠o既入口。
估唔到入口已經係一個挑戰,
因為有一個位比較斜, 車仔唔夠力會溜後,
所以大家要由石屎地儲力, 一口氣剷上斜坡。
上圖唔係水泥地, 已經係裏砂漠o既碎砂石地。
係水泥地揸完全冇問題, 但砂地就會好唔同,
因為地面不平, 加上架車仔o既差速器應該一般般(可能冇添)
如果架車仔行駛中係路上彈跳, 就好容易失控。
上圖個女仔架車就係係砂地跣緊。
事實上係裏砂漠揸o既時間唔長, 大約只有十零分鐘,
反而係馬路就揸左半個鐘......
揸到去指定o既地, 停低架車,
職員會俾大約十分鐘大家自行遊覽一下裏砂漠。
其實十分鐘都夠,因為都真係冇乜野睇,
同行o既人都係行吓打個咭就算。
用「砂」字係幾啱的,
因為又唔係真係海灘啲「沙」咁幼,
都係啲比碎石再碎啲o既「砂」。
沿路番去工地放低車, 小弟就向碼頭方向進發。
其實大島都仲有若干景點o既,
不過一來多數都係用山茶花有關,
而山茶花而家唔係開花季節,
同埋淨低o既時間唔多,
所以都係留係碼頭附近,
食個Lunch 買手信算。
求其食左個冷麵就算。
琴日提過, 因為小弟個trip太遲plan,
所以買唔到大島直航竹芝o既船飛,
只好買熱海o既船飛。
但小弟約左一對夫婦食晚飯(香港老婆日本老公)唔想遲到,
所以小弟搭左人生第一次新幹線。
無錯, 你冇聽錯, 小弟黎左日本無數次,
今次先係小弟第一次搭新幹線。
無計啦, 以前窮L冇錢, 當然而家都唔係特別有錢......
最後順利準時同朋友匯合。
聽日就搭飛機番香港喇。
今次o既遊記亦都到呢度完結。
沒有留言:
張貼留言