唔洗估, 上圖就係伊豆諸島 大島 o既 三原山火口。
事實就由準備講起。
首先係計劃行程同買船票,
大島其實唔係話真係好大,
但如果你真係打算要睇晒啲主要景點的話,
預番三日兩夜會鬆少少。
再玩埋其他細島, 小弟就俾唔到意見喇,
要視乎閣下玩幾多個島同玩得幾仔細。
雖然大島已經係伊豆諸島最大最主要o既旅遊地點,
但連接東京同大島o既船o既班次唔算好密,
尤其是閒日, 回程東京就可能得兩班, 一早下午。
(以小弟寫呢篇遊記o既時間點)
絕大部份人都會玩完之後搭下午嗰班走人,
所以下午嗰班十分搶手,
買船飛的話可能早兩個星期以上會穩陣啲。
因為要提早買定飛o既關係, 所以買船飛其實係係網上做。
個網站都已經好完善, 所以外國人係網站購票應該唔成問題。
小弟講過, 今次呢個trip plan得比較急,
所以小弟已經搶唔到下午回程東京o既船飛,
只能夠買去熱海o既船飛。
仲有要留意o既係, 大島有兩個碼頭,
西面o既 元町港 & 北面o既岡田港。
兩個碼頭都有少少距離, 同埋登島同離島可以係唔同碼頭,
買飛同計劃行程o既時候要意清楚。
為左早少少出實體船票,
順便問吓會唔會有機會仲有番東京o既船位,
所以小弟係琴日已經黎到碼頭出飛。
上、下圖係東海汽船位於東京竹芝o既碼頭&櫃台。
結果都係冇位改唔到票......(改票要另外俾手續費)
唯有按番原來o既船票。
一早乖乖黎碼頭到等上船。
冇乜野好做, 係碼頭周圍行吓。
有便利店可以買少少食物。
手信店, 但因為時間尚早, 所以未開。
有廚櫃展示東海汽船o既船隻。
另外仲有個corner有旅遊宣傳,
一啲都唔surprise有LOVE LIVE o既身影。
小弟已經冇追好耐。
夠鐘上船。好好天。
全部劃位, 跟冧把坐。
如果有大型行里, 記得網上買飛時買埋行里位,
如果唔係會俾人罰錢。
經過彩虹橋
經過羽田機場
船程大約1小時45分。
瞓個覺, 醒番就上得岸。
岡田港碼頭,
以一個咁山卡啦o既島黎講, 個碼頭好新好Fancy,
似乎係新起/翻新冇耐。
簡樸工業風, 但入面都好光猛同埋有強勁冷氣。
地面嗰層主要係候船o既空間,
上一層有啲展館介紹大島及其他小島生態,
有遊客資訊, 以及有手信小賣店。
其中一個展板, 係問You從何處來。
小弟都拎左張sticker貼係香港個位。
大島其中最最最有代表性o既產品,
就係山茶花油 (山茶花: 日文「椿」, 音Tsubaki)。
有各色各樣o既山茶花油,
主要都係用黎潤膚用品。
有平有貴, 小弟唔熟美容,
所以就算識日文都唔識分......
不過小弟買左幾支番屋企,
呀媽用黎做髮尾油, 或者推拿時用,
好似話幾好, 油得黎唔笠, 好fresh。
上左一段仔斜路影番落黎,
小弟想話, 真係好好天,
但亦都好Q曬......
個島唔係話好大, 加上唔係假期,
的士站一架的士都冇。
應該係話, 連一般o既車都唔見多架......
小弟見有人有的士, 不過應該係預約的。
睇下個站牌就知巴士有幾梳......
上巴士。
小第第一站係先搭巴士到元町港嗰邊,
因為旅遊雜誌介紹有一間好出名o既食店。
半個鐘左右就到元町港
元町港
黎到遊雜誌介紹o既食肆o既地址,
寿し光
地址: 〒100-0101 東京都大島町元町１丁目４−７
係門口見到下圖個告示真係嚇鬼死。
「多謝大家一直以來光顧,
因為人手不足, 以下o既日子會停業......」
正當小弟本住唔食得都睇吓o既心態,
係間屋附近影吓相o既時候,
見到有人從上面嗰層行出黎。
原來休業嗰間係地面嗰層o既Cafe,
真正o既 寿し光 係上一層。
黎到伊豆諸島, 一定要食當地先食到o既鄉土料理,
就係下圖o既べっこう丼(漢字: 鼈甲丼, 音: Bekkou Don)。
べっこう(鼈甲)即係指玳瑁龜殼。
用當地特製o既醫油黎醃當造o既白身魚,
因為醃左出黎o既顏色好似玳瑁咁,
所以就叫べっこう丼。
醫油唔會好鹹搶晒味,
反而帶出魚o既鮮味又唔會腥。
要知道小弟係勁怕腥的。
附送鮮魚味噌湯。
另外小弟再叫左一份刺身。
果然係靠海食海, 真係好鮮甜!
勁滿足。
食飽飽, 係時候出發, 下一個目的地, 係上三原山西面,
行經火山口, 然後行過去今晚住宿o既大島温泉ホテル(Hotel)。
其實正常o既人, 應該係會搭巴士直接去大島温泉ホテル,
又或者利用大島温泉ホテル接送服務。
但小弟就係犯賤, 要行下辛苦下先心, 所以plan左行吓山。
如果係假日, 都會有若干巴士出三原山,
但小弟今次係平日, 根本冇車上三原山,
所以只可以坐的士......
但頭先都講過, 車都冇多架, 何來的士,
所以小弟一邊行下影下相, 一邊睇下有冇的士。
真係好天到唔信, 行山一定冇死 (伏線)。
大島有唔少租單車o既店,
不過小弟係上山, 踩單車的話會死。
但如果閣下係環島睇島o既外圍的話,
可能仲好過等巴士或者截的士。
好彩行左唔係好耐, 就截到的士。
個司機仲要好健談, 一路車小弟一邊介紹大島,
又同我講佢個女去左出面工作。
真係好好天(伏線)
咦?
咦?咦?咦?
明明山下面係好好天,
但架的士越爬得高, 啲雲就越厚,
然後上到三原山レストセンター
(rest centre, 行山o既出發點),
就乜都睇唔到......個山明明得6、7百米高
係啲雲o既縫都仲睇到元町港o既。
三原山レストセンター,
車輛只可以黎到呢道。
出發前熟讀路線圖
有介紹三原火口o既形成同歷史。
出發, 開始進入地質公園o既範圍。
外輪山展望台
正前方應該係可以見到成個火山的,
如果好天的話......
遊步道大致上都係水泥地
呢個三原山屬於伊豆國立園範圍,
有唔同o既路線可以行, 其中一條係表砂漠course,
不過因為會兜好遠, 而且小弟聽日都會去砂漠,
所以而家不了。
雖然小弟冇行表砂漠course,
但都可以見到上圖所示o既砂。
一個好有趣o既fact係, 一同人提起日本o既砂漠,
大家都可能立即諗起鳥取県嗰個。
但其實鳥取県嗰個係叫「砂丘」,
而全個日本入面就只有一個地方係叫造砂漠,
就係大島三原山呢度。
不過大島三原山呢度o既砂,
唔係平時見開嗰啲淺啡色, 而係灰黑色,
原因好簡單, 因為呢度啲砂係火山爆發o既副產物。
仲有另一個Fact, 唔知大家有冇留意,
呢篇日記個tag只有東京。
好多人知道伊豆係屬於静岡県,
但其實伊豆諸島係屬於東京都管轄的。
Anyway, 題外話。
一路都係水泥地。
沿途o既避難洞,
火山爆發時捐入去避石頭。
經過火山腳o既平原之後, 開始上山o既路,
越黎越大風, 不過都好,
因為斜率都有啲咁上下,
行起上黎標晒汗。
望番向外輪山展望台
火山石
好乸攰
個景應該幾好的, 但而家真係乜都睇唔到......
雖然大風又大霧, 但橫掂都上到黎, 火山口兜番半個圈先走。
睇圖大家乜都睇唔出, 但小弟想講, 真係大風到癲,
啲風係刮面的, 人係企唔穩的,
如果開錄影, 你嗌幾大聲都好, 電話只係錄到fung fung聲。
I took a photo of the photo spot。
因為風向問題, 小弟兜左少少火山口之後, 好似又見到少少海。
但最關鍵o既火山口仍然係乜都睇唔到。
正當小弟打算離開, 出發去旅館o既時候,
突然雲霧四散。
呢個就係火山口, 個天總算待小弟不薄。
火山口邊o既崖。
繼續兜火山口, 然後又重遇番刮大風o既環境
B2火山口(下兩圖)
由出發點外輪山展望台行到而家,
大約左用一個半小時,
之後係落山o既路, 向大島温泉ホテル進發。
向大島温泉ホテル呢邊全部都係啲泥石路。
望番上三原山
離遠見到大島温泉ホテル。
叫就叫Hotel, 但實際上係日式旅館, 所以係平房。
臨近大島温泉ホテル, 會係一啲森林隧道,
有啲似龍貓入面o既情境。
彼岸花, 中文叫石蒜花
做少少預告, 下一篇遊記就係去京都睇彼岸花。
行左一個鐘, 終於到達大島温泉ホテル,
啱啱好係check in時間,
小弟啲time management真係冇得頂。
好傳統o既「話新唔新話舊唔舊日式旅館」。
啲日本動漫, 話啲學生去合宿或者畢業旅行, 多數都係咁o既樣。
獨霸大房。
玄關有山茶花o既摺紙。
間房望正三原山, 如果好天啲就好喇。
晚餐, 最左一碟二碟細細碟之外, 仲有燒海鮮。
小弟係book房嗰時加左5000羊要多隻龍蝦刺身, 抵到爛。
食淨個龍蝦頭仲會幫你拎去煲味噌湯,
啲蝦膏起晒花, 配上味噌湯o既調味, 十分清甜又唔腥,
連平時好怕食蝦膏o既小弟都食到一粒都冇淨。
沒有留言:
張貼留言