如果大家同小弟差唔多年齡層的話,
應該會覺得上圖o既建築物好面善。
就係Title寫左, 兒時動畫《小肥肥一族》("Moomins")入面,
主人公, 姆明, 一家住o既主建築。
小弟睇嗰時好細個, 其實都唔係好記得佢講咩,
但就淨係記得, 入面啲角色好有趣, 故事亦都好愉快。
所以到大個左, 仍然對姆明o既物品抱有好感。
而知道埼玉県有姆明谷之後,
黎姆明谷一直都係小弟想做o既事。
對於唔知乜頭乜路o既朋友, 小弟簡單介紹。
"Moomins"係一位芬蘭瑞典族女作家所作o既童話小說。
如果小弟冇認知錯,
"Moomins"好早就傳到去日本被翻譯,
後來更被製作成為動畫。
而香港因為一直都有進口日本動畫,
所以"Moomins"o既動畫亦都係香港o既電視播出。
小弟就係由呢個途徑接觸到"Moomins"。
日本o既姆明主題公園,
係2019年開幕, 位於埼玉県飯能市。
佢係一個綜合式設施,
分左做公眾區域同收費區域。
公眾區域可以自由出入, 範圍內有食肆以及小店,
大部份店都係以北歐為主題風格。
而收費區當然就係主題公園o既核心,
陣間再詳細介紹。
姆明呢個主題公園, 小弟以下就簡稱姆明谷就算。
要點樣黎, 大家上去網站就會搵到。
簡單黎講, 就係搭車搭到飯能駅(西武線)或者東飯能駅(JR),
然後轉巴士, 到達上圖呢個車站落車就係。
係正門就見到大大隻字寫住metsä,
芬蘭語解作森林。
正如頭先講過, 園區分左做公眾區域(上圖右下),
同埋真正o既姆明谷樂園(上圖左上)。
而下圖就係由巴士站通向公眾區域o既路。
唔知係心理作用, 小弟已經感受到一啲北歐o既氣氛。
行到入園區立刻就見到幾舊平房建築,
係公眾區域o既手信店、食肆、以及一啲個體小店o既集合。
手信店主要賣一啲歐洲、北歐o既產品。
而食肆就林林總總。
下圖o既平房就係食肆o既所在, 對正個固湖好好view。
因為實在太凍, 小弟揀左個窗邊位食。
老實講, 稍貴, 不過還可以接受。
出面一大塊草地, 有家長係度俾小朋友放電。
唔係唔好食, 不過又唔係話真係咁出眾, 志在醫肚。
而且黎到呢啲山卡啦, 大家都冇其他選擇。
途中經過一啲個體戶商店o既建築。
路上o既路牌, 都唔知係英芬混合, 定係真係芬蘭語,
雖然睇唔明, 總之就好有氣氛。
繩網陣俾小朋友放電。
好喇, 開始接近姆明谷收費園區,
離遠已經見到個燈塔。
閘門外o既擺設。
售票處。
3200羊, 以日本一般o既玩樂黎講, 唔係一個平o既價,
不過以一個主題公園黎計, 又唔算太貴o既。
張飛簡簡單單, 但係好靚。
上圖右方墊底, 上下有藍邊嗰張咭紙,
係俾大家到唔同o既station玩stamping,
集齊咁多個stamping,就可以得出一張完整o既圖畫。
陣間會再show俾大家睇
主題公園當然唔會放過任何一個賺錢o既機會,
一入到去, 大家就會首先經過一啲精品店。
呢隻森林精靈, 其實唔係特別可愛,
但唔知點解就係有一種親和力。
頭先提過o既stamping,
上圖係其中一個station。
入到黎園區, 啲路牌直頭全芬蘭語,
完全冇俾遊客睇得明o既打算,
不過小弟就係鐘意佢呢種堅持。
園區有啲姆明谷o既插畫,
對應番園區一啲景物,
而上圖o既插話就係對應下圖o既小屋。
真係好認真, 小屋入面o既佈置一啲都唔馬虎。
↓路邊一啲小精靈o既像。
入到園區o既中心地帶, 係一個舞台,
每日定時兩場歌舞表演。
咁啱兩點半個場就快開始,
都睇埋先再行。
遠睇的話, 只要頭身合比例, 隻姆明都唔係話好假,
不過下圖見到呀美(小美), 就好似有啲令人難接受。
變左一個著住紅色裙o既大媽。
有啲卡通人物係度郁, 小朋友當然就好高興o既,
作為大人, 第一次睇, 小弟都唔覺得話太悶。
睇完表演之後, 繼續遊覽園區。
啲河流、山石, 都幾有心機。
對唔住, 小弟都唔知呢隻係咩。
黎到小弟最想睇o既景點之一,
就係姆明一家住嗰間屋。
睇到1比1實物, 好似真係進入左姆明o既世界咁。
因為啱啱完左舞台演出, 大家都同一時間搵野睇,
所以要排隊排比較長時間。
並唔係由正門入, 而係由後門地窖入。
大家排住隊等入場。
啲decoration真係做得好細緻。
例如上圖牆角o既小精靈目光,
下面啲圖o既各種擺設, 真係好有生活感,
而唔係其搵啲野放係度就算。
隻紅色襪係咪阿美o既襪?
因為每一層空間有限, 加上導賞員會不斷講解,
另外又要顧及進入o既人同落樓離開o既人,
所以遊客都係1 group 1 group咁入,
而且逗留時間有嚴格o既限制。
不過呢方面日本人真係好出色, 安排得好好,
上同落o既group完全唔會係樓梯打交,
上行o既人到樓層聽講解嗰時,
上一層睇完o既遊客就落樓梯離開。
大家會見到導賞員成日望住隻錶睇住時間,
大家參觀的話請跟大隊, 唔好令導賞員為難。
由地窖一上黎就係正門嗰層。
地方真係唔太大, 上圖已經一眼睇晒。
牆上面掛左好多姆明一家o既相(下圖),
而啲相係由真係影出的黎, 唔係手繪。
又係啦, 好有心o既擺設, 好似真係有人住緊o既咁。
個大堂旁邊係廚房。
又真係有啲芬蘭艾o既書放係度。
樓梯位, 有傳說中姆明一族祖先o既畫像。
聽講細心盯住幅畫, 可能會見到佢眼仔碌碌。
姆明o既X光片。
有咩人會放自己X光片係屋企.......
下圖係姆明爸爸媽媽o既房。
上圖係姆明間房。
下圖呢間房勁細,
度門唔夠半個人咁高,
一睇就知係阿美間房。
上圖呢間係客房, 而家由科妮佔用緊。
頂層係工作室 (上、下圖)
再望上閣樓(上圖), 係姆明爸爸工作o既地方,
不過遊客唔可以爬上去,
只可以用潛望鏡(上圖中間垂直啡色管)睇閣樓。
因為姆明谷晚上會有light-up,
所以小弟o既目標係捱到天黑。
睇完姆明屋企, 可以行過隔建築物, 可以買姆明產品,
同埋入面有姆明o既展覽館。
先係黎賣店。啲種類真係多到你唔信。
小弟下面只係求其影左兩三種。
除左毛公仔之外, 都仲有好多實用o既產品。
然後去展覽館睇。
與其話係展覽館,
應該話係展示姆明世界觀o既展館。
有好多大型o既立體擺設,
展示番姆明小說入面o既場景。
小弟想話, 佢地燈光效果同presentation真係好正。
上圖係姆明生活o既嗰個世域o既微縮擺設(都成兩三層樓高)。
上圖係鳥瞰圖, 下面o既圖就係細部。
真係做得好精細。
姆明谷入面出現過o既人物o既畫。
有書店買書。
頭先一開始入園區時提過,
園區裏面有好幾個station俾大家stamp postcard。
集齊之後, 就會成一張彩色畫。
仲差少少天黑, 小弟行埋入園區最深入o既地方。
先係經過燈塔。
燈塔內部。
史力奇o既帳篷。
不過以行左咁遠路專登黎睇佢黎計,
又好似冇乜特別。
途中經過精靈o既群組。
個天終於黑齊喇。影埋相就走。
晚上又係別有一番氣氛。
加上而家正值隆冬, 真係好似去左北歐咁。
如果看官記得o既話,
上圖已經係售票處外o既擺設。
下圖開始已經係出番公共園區。
因為今晚係凌晨機,
係有樂町求其食個壽司就出發去機場。
時間番番黎1月1日小弟第一日埗日本。
第一時間去秋葉原食開嗰間食番碗拉麵。
估唔到今時今日都仲見到粒拉。
九州じゃんがら, 每次黎東京都一定會黎食番碗,
已經成為左習慣。
配菜配料任落。最鐘意佢o既高菜。
第二日, 1月2日,
先行吓御茶ノ水。
然後經神田去老秋。
所以好多人排隊參拜, 打晒蛇餅。
晚上睇早見Live,
老秋, 《うたわれるもの》宣傳。
疫情以來o既live, 太感動。
勁近
其實小弟拜訪左I'm Enterprise o既基地,
I'm Enterprise係咩? 知o既人就會知。
不過因為仲係方緊新年假, 所冇人番工係正常的。
然後小弟就出發去姆明谷了。
沒有留言:
張貼留言