琴日一落機就已經又玩水、又食牛,
所以今日瞓番晏少少,
十點幾先起身, 食個brunch再進行下午o既水上活動。
食brunch o既地點. 係距離酒店約廿分鐘路程o既麵店---平良商店,
淨係睇個名都唔會知佢係做飲食......
今日特登黎食佢o既八重山拉麵。
八重山拉麵, 係沖繩拉麵o既其中一個分支,
其特點係用o既麵比較粗, 而且多數係配以炆豬肉為佐料。
要試菜, 唔洗花考, 就叫左八重山拉麵最common o既種類。
唔好一聽到日本拉麵, 就以為一定係豬骨湯底,
八重山拉麵o既湯底, 多數係豬肉+鰹魚出湯,
所以湯底都比較清甜, 另外如果冇食錯的話,
小弟仲覺得呢間平良商店個湯底有少少雞味,
唔知係咪有落少少雞黎淆湯。
另外, 啲豬肉同豬軟骨都非常好食,
個味道就應該都係用豉油、味醂, 再加啲香料醃架喇,
不過鹹甜適中, 又能夠帶出五花腩o既香味~
係用沖繩出產o既酒---"泡盛"浸泡辣椒而成。
有讀過高中理科o既人都應該記得like dissolves like o既道理,
因為辣椒入面辣o既化學成份主要係non-polaro既,
所以用番(某程度上)non polar o既酒精, 就更能提取出辣o既成份。
一如意料地, 呢支野都真係幾辣吓. 仲要係純辣, 不帶麻及其他味覺,
辣o既成份係口腔上久久不能散去......
另外, 上圖呢支コーレーグース同一般o既唔同,
大家可以見到入面有一塊白色o既野, 係香茅。
就小弟成個旅程所以, 加有香茅o既コーレーグース並唔常見,
如果想買有香茅的話, 見到有就好買。
食飽飽之後, 就番酒店換個衫, 然後出發去下午o既活動。
今日下午, 係跟水上活動公司去玩滑翔傘同浮潛。
步行十五分鐘到達碼頭集合o既地方。
已經有若干團員到左, 正在填寫資料。
填好資料之, 分開做兩批人,
小弟行四人同一對日本男女先出發去玩滑翔傘。
係途中傾偈, 先知原來兩個係新婚夫婦,
由廣島出發, 坐遊輪黎到沖繩, 下圖就係佢地嗰隻遊輪。
滑翔傘係雙人玩的,
好在今次小弟係四個......
先係小弟兩個fd玩先。
當然要做足安全措施啦。
放好滑翔傘之後, 配戴好安全帶o既人,
就會被連接上滑翔傘。
而係指定安全動作。
然後就係等工作人員將繩慢慢放出去。
Basic course係大約一百米高(垂直距離),
如果想玩得「high」啲, 就要另外加錢。
150米就2000yen per head, 200米高就3000yen per head。
小弟唔係話特別拍高, 所以都幾enjoy。
事實上如果你問小弟的話, 小弟唔會自己走去玩滑翔傘,
今次去玩滑翔傘都係因為有團友話想玩。
Anyway, 都唔差丫。
玩完滑翔傘之後, 就同另一批人交換,
今次係到另一個海域浮潛。
啲水真係清到無倫,
香港o既後花園---西貢都完全比唔上。
如果俾貴少少的話, 可以由浮潛轉水肺潛水,
但小弟o既男性朋友不諳水性,
所以小弟們只係浮潛。
雖然我地唔係水肺潛水, 但導賞員係水底撈左條海參上黎。
水係好清, 但可惜水底好明顯受到幾大破壞,
好珊瑚都係已經死左。
眼界好o既朋友見唔見到上圖嗰兩隻Nemo。
好痛心o既係, 破壞水底o既, 原來小弟們都有份......
上圖可以見到, 小弟隻船o既船錨係鈎係珊瑚礁上。
雖說個珊瑚礁已經死左, 但始終唔係咁好.......
老實講, 黎沖繩石垣玩浮潛, 都係俾小弟o既朋友過下隱啫,
因為真正潛水o既人都知, 要睇靚o既珊瑚礁,
點講都係去菲律賓, 沖繩石垣海底再靚, 拍馬都追唔上。
玩完浮潛, 番番酒店。
今晚安排左夜晚浮潛,
不過聯絡店家, 佢地話俾少弟知水流唔太樂觀,
所以今晚o既夜浮潛取消......
無啦啦變左冇野做,
於是恰左一陣之後, 落去石垣o既商店街行吓街睇吓野。
因為時間係下午三點幾四點,
所以公設市場冇開店。
上圖係沖繩戰隊o既人像。
沖繩戰隊都係啲戰隊打怪物o既特攝片,
不過特色係沖繩本土製作, 而且全片用純正沖繩方言。
因為係純正沖繩方言o既關係, 就連日本人都聽唔明入面o既對白,
(沖繩一帶o既人當然聽得明啦)
所以係有日文字幕的......
一來小弟買野唔太在行,
二來又真係又冇乜野好買,
所以都冇乜野好講喇。
塞翁失馬, 焉知非福。
小弟們雖然去唔到夜浮潛,
但就變左有時間去當地居酒屋食dinner happy。
今日去o既係一間都幾出名o既居酒屋うさぎや。
(U-SA-GI-YA, 中文字面譯應該係「兔屋」)
就係石垣都已經三間店, 沖繩本島都好似有分店。
所以見到推薦o既野都叫。
海葡萄係一種藻類種物,
因為一串串好似葡萄咁, 所以叫海葡萄。
每一粒咬落去都好脆口, 薄而彈牙o既外層爆破後,
入面有海水鮮味o既液體就會流出, 再加埋豉油或柚子醋, 更能帶出鮮甜。
不過如果想要買番香港,
要留意o既係海葡萄唔可以放入雪櫃冷藏,
反而就咁放係常溫就OK,
如果唔係會縮水同埋會變腥......
但係就算係保存得宜, 但始終都係唔夠新鮮食咁好食......
沖繩名菜---午餐肉苦瓜炒蛋。
你話唔係呀話黎沖繩食午餐肉?
事實上其實日本人極少有機會接觸到午餐肉。
而因為沖繩係一個經常受颱吹襲o既小島,
一打風就會斷晒外界o既物資供應,
所以午餐肉呢啲保存期長o既罐頭就成為沖繩一帶o既食糧。
另外, 沖繩一帶又盛產苦瓜,
所以午餐肉苦瓜炒蛋就成為特色小菜。
其實仲有加強版的, 就係午餐肉吞拿魚苦瓜炒蛋,
當然, 吞拿魚都係罐頭ver。
店家特色沙律
もずく係一種水藻, 中文叫水雲,
切到一條條, 加上口感爽滑, 所以可以當麵條咁食,
加少少醋、糖、豉油就搞掂, 非常方便又健康。
ラフテー, 類似中國o既東坡肉,
煮到又焾又滑、炆到入晒味,o既五花腩,
實在太好食, 小弟們最後番兜左一次。
當然, 小弟唔會就咁普普通通黎食野啦。
同其他石垣o既大少少o既居酒屋一樣,
うさぎや每晚都請黎專業三線手黎表演三線。
三線係沖繩一帶特有o既樂器, 就係下圖左手邊嗰個仁兄手上o既弦樂器。
有時彈下慢歌, 有時彈下快歌,
間唔中仲會有哥哥仔係一邊打埋手鼓添(下圖右)
另外, 店員都仲會跳埋一份, 非常好氣氛。
下圖呢個女店員, 樣貌都幾標緻,
不過基於私隱, 小弟都係唔公開佢個樣。
最後煞科, 嘉賓會彈勁high o既歌, 然後叫大家一齊跳舞,
因為氣氛真係好好, 所以基本上全場人都會起身跳,
就算唔識日文, 都可以好high, 就好似上兩張圖中小弟o既團友咁......
仲有人企埋上凳度跳添(下圖)
完左表演, 大家仲可以走去台前借樂器黎合照。
大家如果都想玩得咁盡興的話,
去沖繩石垣真要做少少功課,
check下邊啲居酒屋有樂手表演,
仲要check埋表演時段, 同埋要訂定位,
如果唔係真係摸門釘o既多。
沒有留言:
張貼留言