港日文化差異 之 過馬路

日本o既行程完左,
寫blog o既動力亦都一下子冇左,
將呢個blog丟空左咁耐,
實在係抱歉......

其實有好多見聞想寫,
不過太多, 都唔知從何開始寫起,
亦都係咁耐都唔落手寫o既原因之一。



話說在頭,

1) 文中內容極其量為小弟個人見聞,
如內容與事實有所偏頗, 歡迎指出

2) 文中內容有可能摻有小弟以前讀過o既刊物o既資料,
如果跟閣下之著作有抵觸, 歡迎向小弟申訴

3) 因未能好好整理內容,
只係諗到咩寫咩, 文理雜亂無章, 還請見諒。



過馬路

還記得第一次跟團去日本,
過馬路o既時候,
唔知點解明明係綠燈,
都會有架車隊埋黎,
嚇到小弟即刻跑住過馬路。

相信呢個唔只係小弟o既問題,
好多唔知頭唔知路o既香港人到日本都有機會試過。

係日本生活左一段時間,
先模清點樣係日本過馬路。

上圖好似好複雜咁,
其實已經盡量簡化左。
通常係一啲唔係太繁忙, 但又主要o既十字路口,
配置都同上圖差唔多。



首先講番小弟遇到o既綠燈過馬路俾車隊埋黎嚇親o既情況。
原來日本唔係好似香港咁, 行人同車o既通行係 or -gate 形式(physic 用語=.=)
而係行人可以過馬路時, 有機會車都同時駛過黎,
就好似上圖咁, 可以見到行人過路燈係綠燈,
但同時間, 平行o既馬路交通燈都係綠燈。

所以就會做成行人過馬路同時,
有車按藍色箭咀轉過黎o既情況,
亦都係小弟俾車隊埋黎嚇親o既情況。

不過放心, 同香港唔同, 日本同歐美一樣,
一定係行人優先。
應該係話, 似小弟o既認知,
只有香港先係車惡過人=.=

如果肯定自己係綠燈過馬路的話,
有車隊埋黎都唔洗驚,
車一定係先讓人行o既。
如果你真係唔好意思o既,
咪行快兩步囉。



如上圖綠燈時, 車按綠色箭咀直行, 當然冇問題啦,
但楂車o既朋友會問, 紅色箭咀又係咩一回事?

基本上如上圖所見,
好多十字路口中央都會有個棱形,
俾啲右轉o既車知道路口o既中間位係邊,
如果順住棱形右轉,
理論上兩架對頭右轉o既車係唔會撞,
但問題係同時間直行o既車仲行緊(綠色箭咀),
對頭o既直行車輛會阻住反方向行駛o既右轉車輛,
呢個時候, 右轉車輛司機就要乖乖停係度,
等到冇晒對頭直行o既車之後,
先到自己右轉。

當然, 有啲多車o既路口,
直行o既車行極都行唔完,
通常呢啲路口, 會多一盞只可右轉o既燈,
係綠燈之後會亮紅燈及只可右轉o既綠箭咀燈,
呢個時候按紅、綠箭咀行o既車都已經停晒,
所以可以安心右轉。



正如頭先所講,
呢啲配置只係通常係一啲唔係太繁忙,
但又主要o既十字路口。
如果係非常繁忙o既十字路口,
該十字路口o既交通燈及過路方法,
同香港都係一樣。



另外, 一啲冇咁多車同人o既地方,
可能連行人過路燈同班馬線都冇,
呢個時候, 行人只要睇行車o既交通燈就得。
只要同自己行進路線parallel o既行車交通燈係綠燈的話,
大家就可以過馬路 (換句話說即係上圖唔見左行人過路燈同班馬線only),
當然, 車一定會先讓人行的。