你話唔係呀馬, 俾錢都要講?
係呀, 因為呢啲細眉細眼野,
一般人唔會好留意, 尤其是首一兩次去日本o既人,
但的而且確好易中招, 仲要係幾瘀架添=.=
就係因為小弟試過, 唔想大家有同樣慘痛經歷,
所以容小弟係度講下。
鉄路
而實之前都講過, 不過實在要再三係度講多次。
日本o既售票機, 無論係買儲值咭定係買單程車票都好,
都一定係***先入錢***的!!!
香港o既售票機係:
1) 先禁啱車站、成人小童、同埋人數
2) 部機會顯示出相應價錢
3) 大家再按價錢入抄
於是香港人去到日本就中晒招喇
因為日本o既鉄路係(單程票):
1) 有理冇理先入錢
2) 部機會show你可以買到o既票種
e.g. 你入520yen硬弊, 佢會show 150、170、200......510 (如下圖)
3) then你按你要買嗰個距離o既金額(先進o既可以揀埋人數同埋成人小童)
4) 然後就會即刻出票and找錢
紅色一格格就係金額o既按鈕,
其他中文字, 聰明o既香港人睇得明架啦。
而下圖就係touch mon式o既,
睇唔明唔緊要, 因為好多時實物都會有英文instruction俾你揀。
冇經歷過or事先唔知道流程o既香港人, 必定係:
1) 企埋部售票機, 起勢係咁禁
2) 「冇反應o既」然後望下隔離嗰個啱啱買完, 又走過去試下佢部機
3) 「都係冇反應o既」, 屆時後面已經排住好長隊, 成村人睥住晒
4) 最後有職員見狀, 走埋黎, 叫閣下先入錢
5) 「噢」, 於是笨蛋誔生了......
你會問, 我點知禁幾多錢o既票先啱呀?
咁就唔該你抬頭望下頭頂嗰個車站vs價錢表 or 路線圖喇
香港人一定唔理解點解係先俾錢先?
唔小心禁錯左票種點算?
先答第一個問題:
咁樣做, 可以減短購票時間, 同埋減少堆係售票機前面o既人數,
因為大家一早已經睇好自己要買o既票種同價錢,
行到埋去只係俾錢&禁一兩個掣。
但以香港嗰種的話, 啲人就會係個售票機搞好耐,
起碼淨係搵目的地車站都有排搵(尤其是鐵路系統愈趨複雜)。
而第二個問題,
若果真係咁好彩香港腳發作禁錯掣,
咁你唯有死死氣咁走過去精算所(即票務處)叫職員同你補票or退錢......
食肆
有關食肆o既付款其實都真係五花百門,
不過小弟抽一啲地道啲、常遇到o既撞板情況黎講。
(1) 快餐店
講緊o既係好似牡丹樓呀、啃他雞呀、毛's burger呀咁,
呢啲唔會中伏, 排隊 -> 點野+俾錢 -> 攞餐or攞牌等餐 is okay
(2) 丼屋、定食店
呢種先係中伏o既黑點
同香港唔同, 日本基本上冇大家落、大塊活嗰種俾錢模式,
i.e. 唔會埋櫃枱俾錢買飛, 再去第二度拎餐,
因為日本服務至上, 捧餐一定係侍應做的。
就算係吉你媽, 都同香港好唔同。
(2a) 吉你媽、虫屋、すき屋等連鎖店,
多數都係一張吧枱再加幾張枱咁,
如果係堂食, 直接坐埋枱,
揀好野食之後yap個店員過黎落單就可以。
埋單都係yap個店員過黎就ok。
千祈唔好以為好似係香港吉你媽咁, 先走埋counter俾錢買票,
人地會以為你買外賣......親身瘀皮經歷......
(2b) 個別丼屋、定食店、拉麵店,
尤其是非連所店, 入到店入面,
首先搵一樣野, 叫食券機!!!!!!
食券機有好多唔同樣, 不過總之就係一大枱好多掣禁o既機,
多數都係放係店外or近門口位置。
如果搵到食券機, 諗都唔先諗喇, 埋去揀啱野,
然後跟買單程車票一樣***先入錢, 後按鍵***
部機就會自動出飛(食券)and找錢。
然後你先係店內搵個位坐低,
自然會有店員黎招呼你,
你二話不說, 俾張食券個店員就得,
你有咩特別要求就係呢個時候講埋:
咩走葱呀、走奶呀、叉飯走叉燒呀咁。
如果再次香港腳發作禁錯掣出錯飛點算?
唯有等你坐低, 個店員過黎o既時候同佢講,
個店員會幫你搞掂。
下圖就係食券機, 第一個係較大o既座地機,
第二個係較細o既座枱機。
(3) 祭りo既臨時食店,
講緊o既係真係有枱有凳嗰啲。
情況比較少, 有機會係坐低叫左野食,
食物送到時即刻俾埋錢。
不過呢種情況唔洗擔心,
反正佢一日唔出聲, 你一日都唔俾錢就ok架喇。
(4) 總之, 除左上述(1)、(2b), 同埋買外賣o既情況係先俾錢之外,
基本上日本o既食肆都係先食野後俾錢的,
只要留心(2a)同(2b)o既流程就唔會死。
沒有留言:
張貼留言