魷日記: 六日五夜石垣沖繩中同魷 --- 第四日浮潛睇鯨鯊&青の洞窟 + 首里城 + 安里窄巷夜店餃子

黎到沖繩第二日, 小弟們由市中心渣半個鐘車,

黎到宜野湾マリーナ碼頭集合, 參加浮潛活動。

天公造美, 勁好天。

出發前又係要先填寫文件啦。
一行約二十個參加者,
基本上全部都係中國人同台灣人.......
日本人只係得兩個......
唔怪得連碼頭集合o既接待員都係請台灣人......

填寫左資料之後, 每人獲發一隻小鯨鯊布公仔,

其實都唔會因為咁而話「正呀有野送」, 反正已經包左係費用度,

但不得不承認, 公司的確係有花心思, 加分。

小弟們乘坐o既遊艇。

艇上面有一大袋麵包, 好可能係餵魚用。

距離目標海域約大半個鐘船程,
學左點樣用浮潛用品後, 大家可以到船o既上層吹住風等運到。

黎到第一個景點, 就係睇鯨鯊喇,
就咁睇海面好似冇乜野。

但水下魚其實養住左兩條鯨鯊。

兩條鯨鯊其實係養左係水下面o既一個大網入面,

個網有幾大, 小弟就估量唔到喇,

不過範圍都唔細, 因為足夠兩條鯨鯊係入面遊,

有時甚致會消失係視線範圍。

事實上小弟們因為係浮潛, 只可以由水o既最面層睇鯨鯊,

如果係參加水肺潛水的話, 就可以直接遊到鯨鯊o既網入面,

仲可以好似上圖咁, 用預備好o既o既小魚(白色布袋)黎餵鯨鯊!

因為小弟們唔可以潛落去餵魚, 所以計埋遊水,

睇左半個鐘左右就上船去下一個景點喇。

有做過資料搜集的話, 都應該聽過青の洞窟。

正正常常的話, 可以由岸邊行落去洞窟,
不過小弟們就選擇左遊潛呢個方法進入個洞入面。

船隻停係洞窟外大約二百米遠,
然後大家就要自落水遊過去喇。

小弟並沒有帶防水相機,
啲相都係職員義務幫我地影,
所以都唔要求得咁多。

所謂o既青の洞窟, 其實同好多唔同地方o既藍光海洞穴一樣,
因為水底透光, 所以光線由外面經水底折射入洞穴,
造成好特別o既藍光。

可能就咁行入黎泂穴睇, 會覺得冇乜特別, 影個相打個咭就走人,
就係因為咁, 小弟先會選攞浮潛呢個方式漫遊(游)青の洞窟。

還記得船上嗰一大袋麵包嗎?
回程遊番上船之前, 職員派麵包俾小弟們餵魚,
引來勁多魚!

雖然真正落水o既時候唔係話真係好長,
加起黎應該都冇一個鐘,
但着住浮水衣游水, 比起就咁遊實在係嘥力好多!
所以上番船之後大家都死左一半。

正當而為直接番碼頭o既途中,
小弟發現遊艇兜路!?
原來係特登帶小弟們到残波岬打個咭。

小弟本身冇打算黎呢個景點,
因為之前google map就咁係岸上睇, 好似冇乜值得好睇,
但原來係海望番番去個岸係咁奇特咁靚的!

如果企係崖邊o既人發現腳下其實係突出o既岩石,
都咪話唔驚。

好喇, 真係回程喇。

番住宿換件衫之後又再渣車出發。
先祭五臟廟。
本身想去一間古風o既店家食麵的,
點知遇著不定休, 真係冇野好講......
因為真係爆餓, 所以結果係路邊求其搵一間食就算。

味道就冇石垣嗰間平良商店咁好食架喇,
但都唔差架。

下午小弟係黎參觀首里城,
黎沖繩, 點可以唔黎首里城打個咭丫。
不過唔知係小弟搵錯路, 定係真係指示唔清晰喇,
搞左一輪先搵到個停車場入口,
仲要好似唔係正門入口......

因為小弟們係由首里城公園o既北面進入,
所以首先見到o既係円鑑池同弁財天堂,
記住, 係弁財天・堂, 而唔係弁財・天堂。
呢個堂係16世紀由琉球尚真王建成,
用黎祭祀水o既女神---弁財天。

沿路向南, 然後向西行就會見到久慶門,
不過冇乜好睇, 旅遊書亦冇乜介紹。

黎到歓會門, 係進入首里城o既正門

有別於日本o既阿吽同中國o既石獅,

歓會門兩邊係地道o既シーサー。

再行入去係瑞泉門,
而個瑞泉係邊?
就係面向瑞泉門右手邊。

瑞泉門右手邊有一個泉源,
好似話只有琉球王帝先可以飲用呢啲水。

一路行, 穿過上圖o既門,

就會到達一個小廣場同埋見到奉神門。

唔想打開荷包的話, 貴客只可以黎到呢度,
因為要穿過奉神門進入正殿, 係要俾錢的。

因為沖繩地勢比較平坦,
由呢度唔係好高, 但望番落去沖繩市內, 都已經可以望到好遠。

係進入收費地區之前,
小弟們見到廣場有個表演場地。

原來係有傳統琉球o既舞蹈表演。
好似話係由美女跳o既舞......
但小弟所見, 好似只係得兩個婆婆......

傳統琉球舞蹈表演,
每日11、14、16點開演 (請自行再check schedule),
星期六、日仲好有人教彈三線添。

睇左一陣, 係時候入去正殿,
盛惠820yen。

穿過奉神門, 就係下圖o既御庭同埋正殿。
御庭就係舉行祭典或者有咩活動o既空地,
而正殿, 當然就係文武百官議政同埋王帝處理公務o既地方啦。

好可惜, 正殿o既正面做緊維修保養。
但都突左個龍頭出黎(下圖)。

正殿簷上o既龍頭, 有別於日本一般用o既鯱。

上面呢個石龍,
中國o既皇宮同日本o既城池宮殿都唔會有,
只有首里城先有, 突顯地道特色。

進入正殿之前,
同其他日本文物建築一樣,
都係要求參觀o既人除鞋,
然後放係提供o既膠袋入面, 自己拎住行。

正殿入面o既庭園,
唔知幾百年前係咪咁o既樣,
但庭園入面o既植物種類, 好明顯同日本庭園用開o既好唔一樣。

到左真正王帝理政o既地方,
上圖右手邊就係龍椅。

龍椅後o既「中山世土」, 出自康熙手筆,
當然, 只係仿製品, 首里城係1945 o既沖繩戰,
一早已經燒到渣都冇淨。

永祚瀛壖,
日本人都問, 點讀?
對唔住, 小弟都唔識......

永祚瀛壖係出自乾隆o既手筆,
仲有一塊(上圖最遠嗰塊), 係「輯瑞球陽」, 出自雍正。

都係嗰句啦, 原先o既扁額一早燒左,
而家呢三塊, 只係仿製品。
係仿製, 而唔係複製, 係因為並冇燒之前o既照片,
只係知道本來寫左乜同大概係點概樣,
而家呢三塊野, 係日本人修復首里城o既時候,
搵番沖繩同中國保存有三個清皇帝o既真跡, 然後執番啲字出黎。
而冇嗰啲字, 就唯由從真跡入面搵番啲部首或者點橫撇捺,
然後砌番隻字出黎。