4日5夜 伊豆諸島大島魷 --- 頭兩日 秋葉原 + 古典樂音樂會 + 早見沙織演唱會

 

因為旁晚到埗, 頭兩日都冇乜真正旅遊事項,

所以黎睇遊記o既朋友, 冇興趣的話可以skip左呢篇,

直接睇聽日嗰篇。

今次飛日本, 因為有啲ANA milage就黎到期, 所以順便用埋。

9月16日下午機, 到日本已經係旁晚。

求其食少少野, 第二日循例去秋葉原行個圈。

秋葉原都開周大福, 咩玩法?

lunch去左每次都會黎食o既

九州じゃんがら食拉麵。

小弟想話, 近年真係超多人排隊,

好多都係遊客, 唔知係咪間野出左名。

不過一來, 九州じゃんがら冇左小弟最鐘意食o既まぜじゃん,

二來真係爆多人, 次次都排成半個鐘以上

(最主要係啲遊客食好耐......)

小弟諗以後都未必會次次黎......

下午去左聽一個日本朋友參與o既樂團演出,

佢當年黎香港出差時同小弟參加同一個樂團,

而家佢番番日本做野, 咁啱夾到時間, 於是去捧吓場。

晚上, 一條魷,

係上野唔知食咩好,

求其上食ベログ搵,

介紹左附近一幢大廈頂層o既吉池食堂。

老實講, 啲野食唔係特別好食,

(都唔差, 係小弟咀刁啫),

不過勝在分量足, 性價比高, 又多選擇。

一條魷狂食食到反艇都只係七千幾羊咋。

18/9係早見沙織演唱會《白と花束》,

中午排物販, 旁晚開場。

個位唔係特別近, 不過有得睇已經好滿足。

晚上番酒店, 今次住係浜松町, 對住竹芝駅,

因為聽日小弟一早會去離島---大島,

近啲個碼頭可以瞓盡啲。