WWOOF第三日 --- 挖窿

先講下而家農場有咩人先。

1) 農場場主兩夫婦啦

2) 另外女仔方面:

一個台灣女大生, 小弟o既愚妹

3) 另外男仔方面:

小弟(香港代表), 一個台灣人(廿幾歲), 一個星加波人(三十幾歲)

可能因為難得有三個男生作為戰力,

所以農場場主俾左個任務我地......

場主話上圖嗰塊空地,
近幾年種野都唔係話種得好好,
所以要黎講大工程, 改善土質。

點改善?
就係挖一條條坑,
約半米深、大半米闊。
挖好之後放入禾桿草, 再堆肥,
然後最後將挖出黎o既泥冚番上去......



工具就只有,
四輪驅動開斗輕貨車,
尖頭剷x2, 平頭剷x2, 三叉戟 x1,
車輪手推車

that's all.........

條坑話短唔短, 都有成50米左右......

然後就係禾桿草,

啲草係上年秋天收成季節時收集,

放係露天到而家已經有大半年,

日晒雨淋, 面嗰層都仲好,
下面冚住嗰啲, 已經gnou到霉晒 (下兩圖),
好似pat屎咁, 又濕又臭, 勁大陣味。
想知係咩味, 可以問下住日出康城o既人,
佢地夏天聞到o既就係。

因為只有一支三叉戟可以用黎搬草,
所以有兩個人要用手搬草,
啲草仲滲緊啲屎水出黎。
雖說小弟們有手套,
但係係布手套來的......

上圖就係堆好左草o既坑。
然後就係堆肥。
可以見到下圖黑色o既屎山.......

小弟們研究過, 應該係牛屎來的。
不過因為已經處理過, 所以一啲味都冇

將啲屎肥剷上架單輪手推車,
再推去條坑, 倒落去。

最後就淨番將啲挖出黎o既泥舖番上去......



大家就咁睇文字好似好輕鬆,
但事實上真係食屎都冇咁辛苦.....
台灣黎o既同星加波黎o既朋友,
都異口同聲咁話, 服兵役嗰兩年內,
都未試過咁辛苦......

五十米o既坑,
花左一整日先挖好......

記得有人講過,
殺人之前, 要先挖好埋屍o既坑,
當你挖到半路o既時候, 就唔會再想殺人,
唔係因為有時間諗清諗楚,
而係挖一個埋到條屍o既窿仲辛苦過乜.......#$*()^@#$(%@

小弟今年親身印証!!!



住係城市o既看官,
睇完都唔會想象到有幾辛苦架喇,
有機會大家體驗的話,
先不妨回想起小弟呢一篇BLOG啦~