魷日記: 十日十一夜立山黑部登山魷 --- 第九日冰見 + 忍者小靈精火車 + TRUE TEARS 聖地巡禮

先簡介一吓今日o既行程先。

本身都冇話決定好今日去邊,

一係去城端嗰邊, 一係去氷見嗰邊,

不過目的都係差唔多,

就係旅遊, 順便聖巡埋動畫《TRUE TEARS》o既景點。

考慮到氷見嗰邊近海, 仲話有個魚市場添, 好似好吸引咁,

於是最後決定左去氷見。

途中經過高岡一帶, 都係《TRUE TEARS》o既聖地,

不過有關聖地巡禮o既部份, 會放係呢篇日誌o既後半部。

好可惜, 事車上氷見冇想像中咁多野睇,

再加上MISS左最重要嗰班巴士,

所以整體黎講, 今日o既旅程唔係話咁精彩......

由富山坐あいの風とやま鉄道到高岡,

為左聖巡《TRUE TEARS》,

特登行一個站到越中中川(詳情見後半部),

然後搭下圖o既JR氷見線到總站。

好耐以前見過旅遊書介紹氷見線,

因為氷見係《忍者小靈精》作者---藤子不二雄Ⓐ o既家鄉,

所以氷見市有好多《忍者小靈精》o既相關裝飾之外,

JR氷見線仲會有列車貼滿《忍者小靈精》o既圖案。

小弟當年仲心諗, 「小弟先唔會黎呢啲山卡啦地方」,

點知真係風水輪流轉, 小弟真係黎到呢個山卡啦o既地方......

一出車站, 已經見到local o既的士都貼有《忍者小靈精》o既圖案。

按小弟臨時臨急定o既plan,
小弟一定要搭到12點幾嗰班巴士,
因為後面仲要駁一兩次巴士。
呢啲咁o既山卡拉, 一個鐘先得一班車,
miss左一班, 駁下一班可以又要等一大輪......

為左了解巴士o既資料, 當然係先到案內所(資訊中心問啦)

案內所內部。

成功得到巴士o既時間同問到搭車o既地點, 仲有氷見市地圖。
好可惜, 因為地圖唔清唔楚, 小弟行過龍, miss左班巴士orz

miss所都冇辦法, 下一班車要等成粒鐘......
再考慮埋之後駁巴士o既時間,
小弟唯有放棄原先o既plan,
由氷見駅, 行經市中心, 到氷見魚市場睇吓。

頭先一直話山卡啦山卡啦,
氷見有幾山卡啦呢,
除左大家可以係google map知道大概之外,
仲可以睇吓下圖

上圖就係氷見市最中心o既大街,
suppose應該係最多人的......
但都成個鬼城咁.......
而家係中午12點幾1點, 應該都見到有人食lunch掛?
不過, 事實上係連想搵間食肆都難.......

繼續行過去魚市場

唔知係咪出晒海啦, 一個人都冇,
不過好寧靜, 加上咁好o既天氣, 感覺幾好。

終於見到有人 !

行左大半個鐘, 見到上圖o既建築物,
係氷見魚市場o既食店,
都差唔多係時間祭五臟廟。

行過去睇吓,
啲menu都唔係話特別吸引......
以呢啲山卡啦地方, 個價錢反而算係貴,
再加上見到食店入面都係旅行團為主,
都冇乜心機話好想食......

咁咪行下個魚市場囉。

有冷氣, 同埋都幾乾淨企理。

小弟都知, 中午先黎魚市場, 都唔好期望會見到啲乜,
但事實上魚市場比小弟想像中冷清, 同埋海產唔多。
最重要係, 冇乜話有啲咩氷見特產, 想搵啲特別啲o既野食都冇......

魚市場入面都有food court,

不過小弟去嗰時, 冇乜邊間有開,

有開o既都冇乜特別。

魚市場見到富山特產白蝦 o既蝦片,
不過白蝦係新鮮先好食啫,
咁樣整法, 咪又係蝦片一塊......

公平啲講, 小弟本身冇好好計劃,
中午呢個咁o既時間去魚市場,
又真係冇乜好睇o既, 所以小弟o既見聞比較片面,
大家計劃好啲, 可能可以搵到氷見魚市場熱鬧o既一面。

因為要進行動畫《TRUE TEARS》o既聖地巡禮,
小弟要繼續向北行, 深入不毛。
但小弟o既性格, 係盡可能睇晒經過o既竟點,
研究過巴士時間表之後, 小弟有大約30分鐘,
由魚市場行過去阿尾城跡(下圖o既白色岬角)再到巴士站。

唔好睇上兩圖好似好近咁,
因為要沿海灣行, 都有成公里左右,
仲要個岬角都有差唔多成百米高,
要跑上山再落番黎都幾係野。

叫得阿尾城跡, 即係話個城已經冇左,
得番個地基係度,
反而上面o既神社白峰社就仲係度。

上到差唔多山(岬角)頂, 經過上圖o既鳥居,
就見到下圖o既白峰社,
嗯, that's all。

行另一條路, 上到真正o既岬角尖尖,
就會見到下圖o既阿尾城跡,
佔地都唔夠幾百平方米......

由阿尾城跡望向東南面氷見市中心,
因為天氣好, 睇乜都心曠神怡。

趕頭趕命, 半行半跑,
先叫做早過班巴士兩分鐘, 趕得到上車。
都係因為《TRUE TEARS》聖地巡禮o既關係,
小弟繼續向北, 途中係薮田落車。

為左係薮田聖巡, 小弟白白係度浪費左一個鐘,
因為下一班車要等一個鐘......
大家欣賞一吓山卡啦巴士時間表。

小弟班巴士係1509到達薮田,
而下一班係1609。

不過小弟都見怪不怪,
因為一日得兩班o既時間表小弟都見過,
所以已經冇乜野好驚訝......

成粒鐘冇野好做,
好在附近有間便利店,
店外仲有張枱仔。
於是買罐可樂, 係咁好o既陽光之下, 欣賞太平洋。

等左一個鐘, 搭1609班車到下一個景點,
叫做大境洞窟住居跡。
唔怕坦白講, 由小弟miss左氷見駅外第班巴士開始,
所以行程都係即刻plan的, 景點都係臨時搵的。
不過氷見實在係冇乜景點.......
跟住落黎o既大境洞窟住居跡亦都係冇乜好行之下去的......

大境洞窟住居跡, 其實係氷見海岸o既一個洞穴,
考古學家發現該洞穴有人類活動o既痕跡,
最早可以追遡到日本縄文時代,
即係世界史上o既中~後期石器時代,
都算得上係幾早吓。

落左巴士, 行經一啲住宅區,
可以見到下圖o既屋好有魚村風味,
係日本見到咁舊o既屋, 都真係第次。

到左大境洞窟住居跡, 有個窿(上圖),
你唔係同我講大境洞窟住居跡就係呢個放滿漁具o既窿吓話。
好在真係唔係.......

真正o既大境洞窟住居跡, 係係下圖o既白山社後面。

繞過上圖o既白山社, 後面就係下圖o既大境洞窟住居跡

其實個洞穴都冇想像中咁大。

上圖o既小社後面, 個洞穴一落深入去(下圖),
不過就好扁好窄, 同埋閒人勿進。
好似話係古時啲人儲存物品、食物用。

單眼老睇老婆

呢個大境洞窟住居跡, 可能係人類學上有好大意義,

但對於小弟黎講, 只係山窿一個......

大家就算有時間都好, 唔好學小弟咁黎埋啲咁o既地方......

好啦, 又等多大半個鐘, 先有巴士番番去氷見駅......

時間已經係差唔多五點鐘......

不過作為今日行程一個小小o既驚喜,
就係小弟回種嗰班JR, 咁啱係《忍者小靈精》o既列車。

於是小弟就坐住呢班車,

又越過高山又越過谷(海灣only),

番到高岡, 再回到富山市, 已經係黃昏。

搵地方食晚飯,
都係黎到富山駅商場o既food court。
target就係想食佢好多日o既富山BLACK拉麵。
呢間野係咁細o既富山市, 都有幾間分店,
而旅遊書都有介紹, 加上黎到日本, 小弟就一定會食拉麵,
所以都虎視眈眈左幾日。

料唔係多, 但價錢都唔算低。

好喇, 主角出現喇,
小弟點o既係「大」o既。

個湯底真係好黑, 都估到會好重口味。

食落, 嗯, 點講呢。
真係好鹹, 嗒真啲都有啲鹹香同埋一啲特別o既香料味道,
不過我諗呢種味唔係個個鐘意。

叫得中華そば, 所以佢用o既唔係普通拉麵o既細麵或者ちぢれ麺,
而係比較粗身o既麵。
呢個的確係一個幾啱o既組合, 因為本身湯底已經好鹹,
用直身麵, 冇咁掛湯之餘, 亦都減少一口麵入面, 湯底佔volumn o既比例。

食係幾好食. 不過真係幾鹹,
你叫小弟間唔中食吓就好,
但日日食就真係會爆血管......

由於今日係最後一日, 所以小弟要買埋手信。
之前都提過, 富山o既特產係白蝦,
當然要買番啲相關特產番去啦。