魷日記: 六日五夜中獎免費機票魷 --- 第三日城崎溫泉

城崎溫泉

因為小弟自己本身都未聽過,

所以小弟主觀地覺得一般香港人都未必聽過,

應該係, 除非唔係......

點解有咁多出名o既溫泉唔去, 要黎城崎溫泉呢。

因為小弟覺得好多時日本啲乜鬼「三大」都未必好靠譜,

例如下呂溫泉, 小弟就覺得有點兒名過其實。

所以今次搵溫泉o既時候, 小弟就稍為改變一下策略,

由搜尋　「最多日本人想去o既溫泉」,

改為搜尋「最多日本人想"再"去o既溫泉」,

然後排第一o既, 就係城崎溫泉喇。

另外, 再加上三月仲仍然係蟹o既捕漁期,

唔去山陰一帶食蟹仲等幾時。

又加上, 小弟個朋友想去鳥取砂丘,

以城崎溫泉為中途站都唔錯,

所以就黎左一個豪食蟹兼浸溫泉浸到甩皮o既城崎溫泉之旅。

因為小弟今次用JR關西 PASS o既關係,
所以小弟好旱有咁搭特急, 由大阪到城崎温泉駅,
但就算係特急, 都要兩個幾三個鐘先到。
點解唔搭新幹線? 因為冇囉......

講咁喇耐, 首先介紹下城崎温泉先啦。
城崎温泉位於兵庫縣, 不過同大家熟識o既神戶、姬路有好一大段距離,
因為城崎温泉位於日本本島向住韓國嗰邊。
下圖紅色圈最高嗰個地方就係城崎温泉喇,
可以見到同大阪、姬路係相反o既方向。

咁城崎温泉又有咩咁特別呢,
首先講溫泉, 城崎温泉有七個外湯,
呢度o既「外湯」, 係指唔屬於旅館獨佔,
公眾只要俾入場費, 就邊個都入得o既溫泉。

而城崎温泉七個外湯各有特色,
雖然話要一晚住宿時間浸晒都唔係話唔得,
不過考慮埋要享受旅館、同埋食晚飯的話,
要一日o既住宿時間浸晒七個外湯, 就真係唔係咁易,
而事實上今次小弟都只係浸到三個......

另外城崎温泉出名o既, 就係頭先提過o既蟹喇。
城崎温泉一帶o既山陰地區,
蟹o既捕漁期一般係9月底到3月底,
係呢段時間, 黎到城崎一帶, 不得不品嚐出名o既ズワイガニ(Zuwai Gani),
其中最為香港人熟識, 可以話係香住蟹。
其實山陰一帶o既ズワイガニ都係同一品種,
不過漁夫都鐘意用自己o既地方為蟹去命名,
所以香住蟹, 其實即係香住捕捉o既ズワイガニ。

再加上城崎都有若干老店溫泉旅館,
打造左城崎呢個食、住、同溫泉都令人大滿足o既旅遊地。

上圖就係一出左JR城崎温泉駅o既馬路交界。

話晒都係山卡拉, 啲建築物都唔會話好密同好高,

而一到達城崎就令人感受到溫泉o既,

就係上圖正中間嗰個瓦頂o既小亭。

原來係一個溫泉o既小泉(下圖), 大家可以用放係旁邊o既杯試飲溫泉水。

上圖係飲用泉o既成份分析同飲用上要注意o既地方。
當然, 唔識日文唔會睇得明。

一出車站o既右手邊, 其實已經係城崎温泉o既其中一個外湯,
稱為さとの湯。
不過小弟們拎住行里, 都係放低行里先啦。

時間係中午一點左右, 小弟o既計劃係先行去旅館放低行里,
然後再搵地方食lunch, 等到三點真正夠鐘check in 房間,
放低行里換件衫去浸溫泉。

事實上城崎温泉o既旅館一般都比較高級同好服務,
其實遊客可以約定旅館, 佢地會有車黎到車站接住客,
不過因為小弟想個行程free啲, 又唔係多行里, 旅館又唔係好遠,
所以小弟冇利用呢個服務。

行去旅館o既途中, 已經有好多賣蟹o既專門店。

上圖係一種海膽昆布o既漬物, 用黎餸飯,
好似話電視台某節目評選為餸飯最好o既漬物之一,
不過小弟買左番屋企, 一般般, 太鹹......

當然唔係淨係得蟹o既,
因為近海o既關係, 其他海產都唔少。

途經另一個外湯, 一の湯。

又另一個外湯, 御所の湯。

城崎温泉主要係沿住一條河黎分佈,
所以小橋流水, 甚有雅致,
而且如果小弟冇認錯的話,
上下圖o既禿支應該係櫻花,,
賞花季節到來, 必定係花開遍河。

雖然已經係三月上旬,
不過山陰地方仍然係比較涼, 溫度約10至20度左右,
所以係一啲陽光照射唔到o既地方, 仍然有殘雪。
而下圖o既小神社, 就係小弟下榻o既旅館旁邊o既神社。

神社(上圖左端)o既旁邊就係另一個外湯, まんだら湯,
如果小弟日文冇理解錯的話まんだら, 應該係「曼陀羅」。

上圖就係小弟今晚住o既旅館喇,
係お宿白山花まんだらo既別館, 名為湯亭花のれん。
係小弟考慮過地理位置、膳食、住房、館內個室溫泉、
最緊要係重有價錢, 然後精心挑選o既旅館!

因為仲未到1500 check in 時間,
所以小弟們只係辦左手續、放低行里,
然後離開旅館, 先去搵野食。

經過上圖o既店,
見到下圖o既menu有日本酒雪糕,
好似幾過隱咁, 於是買左杯食。

話晒都係雪糕, 不乏小朋友做食客,
所以呢杯雪糕應該冇乜酒精, 而味道有少少以飯味,
咁話晒日本清酒都係用白米做材料o既。

有少少調轉左次序, 但食完雪糕, 就到我地食lunch o既地方,
就係名為すけ六o既壽司舖,
目的, 當然係蟹啦。

店裏面只有壽司師父、樓面o既老婦+女士3人,
所以唔好期望效率會好高。
係門口等左十分鐘先有位入去座, 落單再等20-30分鐘啲食物先上枱。

不過事實上係日本, 咁樣係好正常,
反而其實係香港人太神經質, 乜都要快,
等5分鐘唔夠已經催單......

點左個壽司定食(1400yen)同埋一個折蟹肉丼定食(1400yen)。

鋪滿晒成個飯面o既蟹肉, 都係1400yen咋, 正呀喂。
蟹肉折得好乾淨, 冇混雜有殼,
而蟹肉應該用適量o既壽司醋浸過, 用黎辟除醒味,
另一方面又能帶出蟹肉o既甜味,
再加埋金絲蛋(甜煎蛋切絲), 一流。

食飽飽散步,
見到下圖o既手袋店,
不過最吸引遊人o既唔係手袋,
而係門口嗰個溫泉同埋賣蛋o既櫃位......

因為大家俾小小錢買隻蛋, 就可以自製溫泉蛋。
放啲蛋入店家提供o既小籃子,
然後係下圖o既木格吊落去溫泉, 將蛋浸熟。

其實只係俾個籃同賣隻蛋俾你, 煮俾你都慳番......

食完蟹, 個fd話有點寒涼, 想食番啲暖熱o既野暖下脾胃,
於是入左一間主要售買日式甜品o既店,
點左個薑味o既「くず湯」黎食。

「くず湯」o既「くず」, 唔係鬧人「敗類」嗰個「くず」,
而係「葛」o既意思, 而事實上「くず湯」亦會寫成「葛湯」。
故名思意, 係用葛粉造成o既甜品, 因為落左糖, 所以有少少甜,
咁講好似有啲核突, 但質地確實係類似於鼻涕。
(對唔住, 小弟諗唔到其他相似o既質地......)

食完坐下hea下, 差唔多係時候番去旅館真正check in。

河邊係櫻花樹, 而欄杆上亦有櫻花圖案,
春天一定好正(腦補中)

今日第一個戲玉係食蟹啦,

而另一個戲玉都即將開始,

就係享受城崎温泉o既外湯喇。

只要大家係入住正當的旅館的話,
應該都會獲發一個下圖咁o既QR code PASS,
有左呢個PASS, 進入外湯o既時候只需要嘟一嘟, 就可以無限出入,
如果唔係就要逐個外湯付款。
當然, 如果住宿方面冇提供PASS的話,
旅客亦可以到各個外湯o既窗口購買。

check in o既時, 小弟留意到一樣野,
就係房間雖然有浴室, 但浴室上鎖左用唔到。
小弟初初奇怪, 就算壞左,
以日本人性格, 都冇理由唔同住客講聲。
ANYWAY, 反正小弟都係黎浸外湯, 冇所謂。

頭先食飯前後未係check in時間,
但而家三點幾, 正正係大家check in完安頓好,
然後出黎浸溫泉o既時間。

成條街上面所有人, 都換上各自旅館提供o既浴衣,
躂住木屐係街上行, 向住唔同o既外湯進發。
就咁睇圖感受唔到啲咩, 但事實上當見到,
成條街都係著住浴衣o既人, 踢踢躂躂咁行,
而你又知道大家都係為左去浸溫泉o既時候,
真係好有風味, 即使未浸到溫泉,
都已經被氣氛感染, 感覺到非常雀躍。
呢個時候, 偶爾遇到唔著浴衣o既人反而先係異類。

呢個時候, 小弟諗起頭先上左鎖o既浴室。
小弟呢個時候推斷, 應該唔係淨係小弟間房o既浴室上鎖,
而係成個城崎温泉所有旅館o既客房浴室都係上左鎖,
目的就係要令所有住客都要走上街去外湯,
造就呢個「全城人都去浸溫泉」o既氣氛。

首先係去車站旁o既さとの湯。

さとの湯最有代表性o既,

應該都係嗰個可以遠眺群山o既露天風呂,

當然, 溫泉入面唔影得相, 大家只可以上網搵下官網o既圖片腦補一下。

浸完, 要趣係1800之前番番去旅館,

因為一個豐富o既全蟹宴等緊小弟!!

係補漁期黎到山陰, 無理由唔食盡啲蟹架。
小弟今次揀旅館, 膳食係其中一個好重要o既參數,
未至於去到蟹buffet, 但一啲都唔會寒酸。

上圖係第一輪上o既菜,
就咁已經有烚蟹、蟹壽司、蟹煲、燒蟹蓋等等。

唔係元器壽司嗰啲蟹柳壽司, 而係真係蟹壽司!!!

蟹煲o既材料

蟹天婦羅

瓦燒蟹爪

裝滿一個大湯碗o既蟹殼......

老老實實, 其實小弟唔係好食蟹 (你講乜春呀?)
係, 小弟平時嫌拆蟹肉麻煩, 所以唔鐘意食蟹,
所以拆蟹肉一啲都唔叻。
因為咁, 呢餐飯小弟同個fd足足食左兩個鐘......
同埋小弟可以肯定, 呢一晚食o既蟹肉,
一定多過過往三十幾年人食過o既蟹肉......
大滿足。