七日六夜 東京鎌倉 自魷行 第一日 --- 淺草寺

***************************************************
呢篇blog係三年後寫番o既回顧,
詳情請參閱「七日六夜 東京鎌倉 自魷行 Preface」,
當然, 看官無視呢點就咁睇落去都唔係問題。

***************************************************



今次東京之行, 係小弟懂性以來,
第一次自己一個搭飛機去旅行,
實在心感興奮。

可能睇動漫睇得多啦,
一直期待緊搭飛機時,
會唔會有一個靚女坐少弟隔離,
然後同小弟搭上話,
從此一條魷o既旅行變左二人同行.......
呢啲咁o既事, 理所當然地
沒有發生OTZ

因為小弟係第一次去東京啦,
雖然刨左好多旅遊書,
但都唔係好清楚要由機場搭咩線去市中心,
於是係到步後, 直接問票務啲,
點樣由機楊搭去淺草最平。

印象中係搭押上線再轉車到淺草,
點解係淺草?
因為小弟住o既酒店係浅草ビスタホテル,
貪佢夠平, 同埋睇番地圖,
同小弟o既行程都幾啱。



三點幾到達淺草,
係酒店放低啲行里之後,
立即就去第一個景點。
黎得淺草, 最就腳就當然係淺草寺啦!!!

淺草寺為東京都內最早o既寺廟,
供奉o既係觀音。
因為係佛教o既關係,
所以淺草寺前面冇鳥居,
(神道教o既神社先有鳥居)
但取而代之, 最出名o既莫過於淺草寺雷門o既大燈籠!

時間為1615, 向淺草寺進攻~

雷門大燈籠底部o既木雕。

其實唔講大家可能唔知,
(不過大家睇左wiki就一定會知)
其實呢個大燈籠係由Padasonic o既創立人松下幸之助,
因向觀音祈願, 及後病瘉,
為報恩而所贈道的。

過左雷門,
係一條直街 --- 仲見世。
兩邊都係手信、名產店。

小弟第一次自己遊東京啦,
所以某程度上都好依賴旅遊書介紹o既野。
以至小弟買野食呀諸如此類,
都係跟旅遊書的。

首先係係寿子屋買煎餅食。

揀左唐辛子味, 少少辣, 好惹味~
最重要o既係新魷熱辣!

然後係到 中富 買炸饅頭,
三年後o既今日, 都唔記得左係咩味lu~



行過其中一個十字路口,
見到下圖o既小販檔。
係不定期擺賣o既流動小販,
賣o既係浅草焼き。

旅遊書都有介紹,
不過唔知好唔好食,
所以買一個食住先。

其實小弟唔係太鐘意和菓子啲紅豆飴, 甜到嘔。
不過呢個浅草焼き甜味啱啱好,
幾好食。打算參觀完淺草寺先番黎大量購買啦,
點知番轉頭o既時候已經唔見左......



呢筆唔講住,
開始正式步入淺草寺。

↑　↓    宝蔵門

宝蔵門o既燈籠

過左宝蔵門, 正面就係本堂喇(上圖),
當然唔少得o既係右手邊有個賣護身符呀、
辟邪野o既小賣部啦(下圖),
唔係點賺你錢啫。

↑　宝蔵門後面

唔係淨係淺草時,
好多時入寺廟之後,
日本人都會先到大香爐前,
用啲煙薰一薰自己,
甚至係拈起一啲香爐灰捽上頭或身,
代表淨身、驅去身上o既污穢。

本堂內部

本堂內部o既天花,
畫有梵天・帝釈天o既畫像。

由本堂望番出宝蔵門

五重塔



參觀完淺草寺,
去食野之前兜小小路睇下野啦。
見到下圖o既小食店

即刻諗起夏娜~



有睇旅遊書o既朋友,
都應該知道淺草寺附近有間叫「犬印鞄製作所」,
出名皮革製品,
小弟為左買手信,
都上左去兜左個圈。

啲款夠簡約, 其實幾合小弟河尺,
不過因為價錢略高,
所以買左個小筆袋做手信之後就走左lu。

時值黃昏,
係時候食晚飯。

去左上圖o既店食浦燒饅魚飯。
相信大家都睇到小弟係用邊一本旅遊書=.=

第一日行程完結,
番酒店休息,
聽日一早去築地魚市場!!!