魷日記: 七日六夜東京鎌倉自魷行第三日 --- 鎌倉 + 江ノ島

***************************************************
呢篇blog係三年後寫番o既回顧,
詳情請參閱「七日六夜東京鎌倉自魷行 Preface」,
當然, 看官無視呢點就咁睇落去都唔係問題。

***************************************************

今日o既行程比較特別,
因為就連小弟自己都唔知行程係點......

事源係小弟一直都有玩日本社交網mixi (即係類似Xanga咁啦),
而開始左冇耐有有個日本人B小姐Add左小弟。

B小姐好鐘意香港, 黎左香港都六七次,
所以同好鐘意去日本o既小弟傾得埋。
(唔好諗咁多啦, B小姐大小弟好幾年)

而今次B小姐知道小弟黎日本,
於是就包辦左小弟一日o既行程。

本來約左1000係藤沢o既車站等,
但小弟記錯左係藤沢JR,
而實際上佢地係藤沢江ノ電等......

係當時smart phone都未有,
結果搞左成粒鐘先相認到......

除左有B小姐之外,
B小姐仲帶左個朋友K小姐,
不過事實上兩個小弟都已經見過。
因為再早多唔夠一年,
小弟帶俾佢地遊廟街、食煲仔飯。

anyway, 講番正題,
見到B小姐同K小姐, 先知今日o既行程係鎌倉&江ノ島,
當然小弟都仲未係對鎌倉&江ノ島一帶好熟識,
莫講話當時《TARI TARI》未出街啦。
(詳情請參閱「小田原城+江ノ島」o既江ノ島部份)
所以當時都未係好知原來自己去左一個景點咁豐盛o既地方......

因為遲左出發o既原因,
搭江ノ電去到江ノ島一帶o既時候已經差唔多中午,
於是按B+K小姐介紹, 先去一間野食lunch。
(其實佢地都係睇旅遊書......)

間野係一間幾簡陋,
似係民居改建而成o既食肆,
(唔好意思, 冇相)
上層係食堂, 主要係食魚生、刺身定食。

係上層o既窗邊,
可以一邊睇住江ノ島一邊食野。
(對唔住, 曝光得太緊要)

小弟都唔記得自己當時叫左個咩食喇,
不過睇相, 似係しらす定食。
(しらす即係白飯魚仔)

江ノ島一帶o既海灘。

江ノ電, 即係江ノ島電車o既簡稱。
係路面上行走o既單層電車,
對香港人黎講應該幾新奇。

因為江ノ電比較早建成, 所以同民居都好近。

沿住海邊向東行,
先去長谷駅, 去睇日外聞明o既鎌倉大佛。

途中行經一啲本土民居小賣店,
B+K小姐不忘買手信回家。

開始進入高德院, 鎌倉大佛o既所在。

當然唔係上圖呢個啦,
下圖先真。

係日本要數一佛的話,
日本人都會即刻諗到:
西有奈良奈東大寺,
而東就係鎌倉大佛喇。
可見呢兩個大佛幾有人氣。

俾幾十yen (唔記得左excatly幾多)就可以進入大佛內部(下圖),
原來大佛係空心的!
下圖係向上影o既影像,
有個窿o既地就係大佛個頭。

出番黎, 係背脊睇大佛,
大家話似唔似章魚外星人?
嗰兩隻眼其實係散熱o既氣窗......

大家睇相,
都應該知道嗰日有幾天時暑熱......
去旅行天氣好係件好事,
但未免太熱喇=.=
唯有去雪糕店唞一唞暑。

再去下一個景點,
B+K小姐仍然不忘購物

下一個景點係長谷寺。

因為主建築係山岡上,
所以要行勁多樓梯先到。

上到主建築群, 可以飽鎌倉市。

落番山岡下, 傍邊有一個洞,
因為嗰時日本唔係咁好,
亦都冇話周圍影相,
所以都唔係好記得有啲咩喇。

再下一個目的地就係鎌倉o既中心喇。
見到上圖咁特色o既鐘樓, 就係鎌倉o既地標之一。
雖然當然小弟唔係好熟鎌倉一帶,
亦都未睇《TARI TARI》, 但都睇過YUI 拍o既戲---《タイヨウのうた》
故事講一個有XP o既女仔 (自己查下咩叫XP啦, 一個基因病o既名),
鐘意左一個熱愛衝浪o既男孩。
而上、下圖就係其中取景o既地方。

行行重行行,
今次行左好春耐,
因為目的地比較遠離車站,
仲要穿過一條好似《千と千尋》咁o既隧道添。

睇上圖都知小弟係去邊啦。
就係佐助稲荷神社。
即刻諗起《火滾忍者》。

佐助稲荷神社出名在一條滿是鳥居山路,
當然冇京都伏見稲荷神社o既千本鳥居咁勁,
但因為環境幽靜, 別有一番風味。

由佐助稲荷神社稍移「肉」步,
經過一排原色o既木造鳥居之後,
到左佐助稲荷神社傍邊o既銭洗弁財天宇賀福神社。

銭洗弁財天宇賀福神社最出名o既係有一個山洞,
山洞入面有個地方俾大家「洗錢」。

可見到下圖有一條綠色竹造o既架,
上面放左一個個金色o既兜仔。
只要拎個竹籃, 放啲錢入個竹籃,
然後用兜仔筆啲水沖下竹籃入面啲錢,
就會發過豬頭咁話。

咁世界上就冇乞兒啦......