小弟成日都同身邊o既人講,
日本o既天氣報告好準,
就算係以3個小時咁短間隔為單位,
都係好準, 唔會相差得去邊。
琴日仲打緊風o既時候, 日本天氣報告就話晚上6點停雨,
夜晚仲會好天到見到星星添。
本身小弟都半信半疑, 但當小弟凌晨兩點鐘起身,
又真係好天架喎~~~
地圖選自: 昭文社 山と高原地図 剱・立山 2016
好喇, 開始正題
小弟o既目標係登上立山o既第二高峰---雄山 睇日出。
日出時間係0521, 而由小弟下榻o既雷鳥莊到山頂, 大概要兩個半鐘,
所以小弟兩點就爬起身, 帶埋腳架相機同埋一啲簡單裝備就出發了。
兩點半左右離開雷鳥莊, 開始出發。
山上o既氣溫比較低, 而日出前o既氣溫更加低,
所以小弟呢次黎日本, 都已經帶多件長袖衫同風褸。
可惜......可惜雖然天色唔錯,
但因為台風o既影響, 所以勁大風。
而家氣溫大概只有7度, 但係KEEP住好大風,
啲風冇停過咁吹, 有時啲陣風仲會吹到企唔穩。
低溫加上大風, 體感溫度低過5度, 吹到頭都痛。
就係小弟出發左唔夠十分鐘, 已經想打道回府......
咬緊牙關, 堅持繼續,
由雷鳥莊出發, 一直都係舖好o既路,
路係由大石同水泥舖成, 加上斜率唔大,
所以唔係話特別難行。
由雷鳥莊行到立山室堂山莊, 地圖話要35min,
而小弟只係用左25min就行完。
正當沾沾自喜以為自己可以比想象中更易上到山,
考驗先至一步步迫近。
由立山室堂山莊到一ノ越,
斜率黎越大, 加上因為近山拗, 風亦都越黎越大, 仲要逆風添,
行下唞下, 40min o既路結果用左45min先行完.....
其實行到呢度, 已經好辛苦,
因為真係好大風, 又凍, 個頭痛到要裂開咁。
真係好凍, 仲有覺得心跳有啲過快, 同埋有淡口水,
知道再格硬黎可能會出事,
於是決定入去一の越山莊避一避。
凌晨四點鐘, 當然唔會有人接待啦,
不過一般呢山小屋, 都會開放玄關俾人休息。
再講多次, 真係好大風,
山小屋o既門窗, 好似俾收數佬起勢大力係咁拍咁,
嘈到拆天。
睇上圖好似好平靜咁, 其實啲風吹到企都企唔穩......
休息到四點半, 就算而家上山都未必趕得切睇日出,
因為由一ノ越(2600m)到山峰(3003m)短短300m, 就要爬足一個小時。
事關由一ノ越開始, 再唔係正常o既路, 而係真係落手落腳爬石頭,
情況就好似西貢冉蛇尖咁。
正當小弟打算走人o既時候,
小弟見到有一個行山人士, 健步如飛,
二話不說咁經過一ノ越直接行上去雄山方向。
有多個人, 膽自然壯, 於是小弟即刻孭埋行裝,
打算追上去跟佢行。
好可惜, 嗰位人兄真係行得好快,
小弟連5分鐘都跟唔到......
爬幾米, 停一停, 氣來氣喘, 望番轉頭o既一の越山莊(下圖)
好似已經爬左好高咁, 但再望向山頂方向(下圖)
大家以為個尖位就係山頂?
錯了, 只係登上雄山之前, 突出黎o既一個小小o既平位, 叫三ノ越,
由三ノ越爬上山頂仲要20min,
而事實上小弟只係位於一ノ越同三ノ越o既中間......
實在係精神打擊......
考慮到風勢、體能、同埋路勢險要,
覺得再爬上去會有人身危險, 於是決定打道回府......
真係好沈重o既決定, 因為小弟今次黎,
好主要o既一個目的係上雄山睇日出 orz
小弟決定回程時, 都已經日出,
不過因為東面都係山峰同山脊, 所以睇唔到太陽。
但有啲地方仲可以見到未溶晒o既冰。
地獄谷方向
0630番到雷鳥莊, 真係好乸攰,
雷鳥莊o既早餐係自助式, 0600-0800任食, 都幾豐富。
0700食完早餐, 爭取時間嗱嗱聲番房瞓,
瞓到0900 check out。
陽光照射落室堂高原一帶。
琴日都仲落雨落到hihi, 但而家就晒到hihi,
天氣報告仲話黎緊一個星期都係咁晒......
其實雷鳥莊旁邊就係地獄谷,
有地熱同硫黃噴出, 所以雷鳥莊先有咁正o既溫泉。
不過因為近年地殼活動活躍,
所以進入地獄谷o既遊步道一直封閉。
植物都枯死, 果然係地獄谷。
就係小弟由雷鳥莊行番出去室堂駅方向時,
迎頭有個呀叔同小弟講「前面轉過彎有雷鳥, 快啲過去睇」
果然, 一轉過彎, 就見到有對夫婦係度影雷鳥。
當然下圖o既係雷鳥, 而唔係嗰對夫婦。
不過唔係stay一日的話, 又真係見到o既機會比較細。
呢隻咁o既野, 而家睇佢啡色咁,
但到左冬天, 就會換上全白o既羽毛, 保護色丫嘛。
雷鳥莊一邊係地獄谷, 而另一邊就係沼澤地。
再黎地獄谷close up(上圖)
下圖中間嗰條就係地獄谷o既遊步道,
可惜而家因為地殼活動活躍而唔俾入
室堂有幾個水池, 其中比較大同有名o既係ミドリガ池
另一個係ミクリガ池(下圖)
不過太陽好, 影o既相都好睇啲。
望番向一の越山莊(上圖中間)同埋雄山(下圖左邊)
真係感慨良多......
行番去室堂駅,
琴日因為落雨都唔可以慢慢睇。
係室堂駅外面除左有石碑之外(上圖),
仲有立山湧出o既山水(下圖)供人飲用,
小弟都有裝黎飲, 希望冇人係山上隨處大小便......
室堂駅, 一樓係車站,
二樓係立山HOTEL o既餐廳,
而三樓就係一個小展館。
雄山山頂上面有個小神社,
而呢個展館就係介紹呢個小神社。
而家山頂上嗰個係經修輯, 換出黎o既木, 有幾塊就放係度。
本身打算就就離開室堂, 落山向富山市出發。
但越諗越唔憤氣, 因為小弟今次黎立山黑部,
登上雄山係一個好主要o既目標。
加上頭先又睇左雄山山頂神社o既展覽,
更加令小弟想上雄山睇下。
而家時間係1030左右, 小弟企左係室堂車站內足足15分鐘,
認真地考慮要唔要再次上山:
1) 今朝上左一次山, 體力已有所消耗
2) 山路崎嶇, 體加唔知夠唔夠
3) 上山兩個半小時, 落山兩個小時, 未離開立山已經天黑
諗左足足15分鐘之後, 小弟都係覺得, 點都要上一次山頂!!!!
事不宜遲, 放行里係車站locker, 然後即刻上山。
由室堂駅出發, 比起今朝由雷鳥莊出發近得多,
且條路都來回行左次, 乜都熟晒啦。
之前o既行山地圖中, 中間偏右下o既祓堂。
好喇好喇, 又番番黎一ノ越喇,
抖擻精神, 向住亂石進發。
上到黎山頂喇!!!!!!!!!
先會先到一間小屋, 屋入面有飲品食物賣,
就小弟所見, 仲會有人係度食杯麵添,
不過當然, 價錢一啲都唔會平, 而小弟亦都未至於餓到要幫襯。
但其實呢度都仲未係雄山最高點,,
呢度都只係2991m高,
最高點就係再行過啲o既雄山神社(上圖右, 下圖左)
行過去雄山神社之前, 再飽覽一下360度o既靚景先。
小弟覺得好似仲好睇過富士山山頂。
富士山山頂太高, 所有野都係遠遠o既腳下,
但雄山附近, 又有山巒, 又有湖泊, 又有濕地,
多姿多彩過富士山山頂o既景色。
黑部湖方向
下三圖其實係由右至左, 由雄山神社到小賣部o既180度鏡頭
Trigonometrical Point, 2991.6m
此時, 小弟發覺山頂上o既人都一同望向三ノ越o既方向,
原來係有直升機開過黎, 似乎有人要用正升機枱走。
事實上小弟上山途中, 都遇到一個休息緊o既老人家,
佢話四年前試過上雄山一次, 不過途中氣力不繼,
結果要由直升機枱走, 而佢今年以六十幾o既高齡再挑戰多次......
不過除左佢之外, 小弟所見, 都有好多老人家登上雄山,
只係佢地花o既時間比較長。
好喇, 係時候向最高點, 雄山神社出發喇。
首先要買參拜o既符, 硬食一定要俾500yen的。
係上圖, 小賣部右手邊o既窗口買。
行上神社之前有個三岔口, 係通往立山最高峰o既大汝峰的。
不過小弟今次唔過去喇。
下圖就係通往大汝峰o既「路」,
其實都唔係路, 只係叫你向住嗰個方向, 見石就踩......
繼續行上雄山神社
小弟都clear左兩個了。
幫登上雄山神社o既人祈個褔。
佢真係做晒全套架喎:
大家係神社前坐好(唔一定要跪坐),
神官就會開始敲鼓, 又詠唱一大輪かしこみかしこみもうす
然後就會拎住玉串(一支木紥住幾串紙)係眾人頭上揚揚下,
再詠唱一大輪かしこみかしこみもうす,
大家跟住一齊兩拍手兩拜一拍手,
最後最後仲會有酒飲添, 當然只係象徵式呷一啖仔。
上圖就係神官洗酒碗o既情況。
搞咁大場大龍鳳, 俾500yen, 抵啦!
大家唔好誤會以為日本人咁冇公德, 係山上o既石頭亂寫野,
其實係啲人想許願, 於是係山下o既河流執啲石春,
將願望寫上去, 再千里迢迢帶到上黎雄山神社。
咁神心咁遠水路拎到上黎3003m高, 想唔幫你實現都唔得啦。
帶石頭上山呢個舉動, 仲有一個好處,
就係減慢風化帶黎o既水土流失。
事實上係日本, 好多人都會登山前係山腳執一兩舊石,
大小就量力而為啦, 然後帶到上山頂放低。
上山用左兩個鐘, 逗留左半個鐘, 1300落山。
落山意外地快, 只係用左一個鐘多少少就番番去室堂駅,
搭1440o既巴士離開立山。
先到達美女平, 再轉纜車落去立山駅。
正常的話, 一般人會由立山駅坐富山電鉄到富山市中心,
不過小弟重要去睇下日本落差第一大o既瀑布称名滝,
所以由立山駅坐半小時巴士。
好在小弟落山落得快,
小弟而家坐o既係最後一班有車番轉頭o既班次,
再之後o既班次, 就有去冇回......
好乞人憎地, 巴士落車o既地方並唔係瀑布o既附近,
而係要行1.3km先可以到瀑布,
腳程快o既小弟都要得三四個字先到......
上圖係落車o既建築物,住下圖o既馬路一直行就係称名滝。
當然呢個唔係称名滝啦......
仲要行400m
因為瀑布就係眼前,
水花仲係咁吹過黎添。
睇称名滝, 最好係過左中午,
因為瀑布係兩個山中間, 中午前冇陽光射到, 影相都唔靚。
最好時間係下午三點打後,
因為瀑布向西, 由橋上望向瀑布光, 夕陽西斜, 可以見到彩虹!
但當然, 要留意回程o既時間有冇車。
不過都係頭先條橋睇, 有氣勢得黎仲有彩虹。
所以要回程了。
老老實實, 要搭1000yen來回, 仲要行2.6公里睇條瀑布,
其實好似唔太化算, 如果佢加巴士係到瀑布旁邊的話還好。
除非大家好多時間, 又或者真係好想睇,
如果唔係, 呢個零鐘+1000yen o既景點可以節省。
搭富山電鉄去富山市中心
其實, 小弟係黑部水霸附近跌爛左單反支鏡。
個body冇事, 但個鏡頭個mount爛左,
搞到支鏡固定唔到係個body上面,
所以小弟係立山上影o既相, 都係用下圖o既方法......
小弟打算黎到富山市內, 求其搵間大型電器舖買支二手鏡頂住都好丫。
但小弟千萬都估唔到, 富山駅一帶作為富山縣富山市o既中心地,
竟然連一間電器舖都冇!!!!
問車站個看更, 佢仲好風趣咁話,
由呢度搭架巴士一直去, 行好遠好遠之後, 總會有的......
^&#%$*#!@#
時間都夜了,
係車站商場o既food court搵食。
睇旅遊書已經睇中左下圖呢間,
出名食富山名產, 白えび(白蝦)刺身。
好多朋友都咁樣問小弟,
小弟就會答, 你上網睇下富山縣向邊邊先啦。
小弟叫左個白えび定食,(2400yen)
有飯有白蝦刺身同炸白蝦
人工都係番度。
白蝦因為係人手搣殼, 上餐桌前又儲存左一陣,
加上體形細小, 所以口感冇乜, 唔會話爽口彈牙。
但白蝦味道清新又唔腥, 慢慢細嘗, 就會食出回甘o既味道,
大家不妨一試。
白蝦被處決前o既容貌
係香港, 相信好多人都聽過某壽司連鎖店賣廣告,
話富山縣盛產螢光魷魚(ホタルイカ), 又話富山直送, 係威係勢。
的確, 小弟係food court都見到唔少店有提供螢光魷魚o既食譜,
但絕大部份都係作為醃菜咁進食或售賣。
聰明o既朋友都知, 新鮮好食o既食材, 日本人都係以刺身進食為多,
因為好食o既食材, 一定係就咁食最好食,
至於用黎做醃菜o既食材, 大家都知咩事,
唔係產量太多食唔晒, 就係......
就這樣, 行左十萬八千里路o既一日就完結了。
好充實的一天!
沒有留言:
張貼留言