六日五夜 京阪奈良紅葉魷 --- 第一日 前言 + 大阪城

話說小弟一直都想帶屋企人睇下紅葉,

於是好早已經謀定睇吓有冇平機票,

又俾小弟僕到喎。來回連行里每人只係六舊水, 抵到爛啦。

當然, 時間就唔會係紅葉高峰期架喇,

而係紅葉高峰期前少少。

不過小弟認為, 只要識揀地點,

都一樣可以睇到紅葉架啫。

就咁, 六日五夜 京阪奈良紅葉魷 就開始喇。

因為小弟o既目的, 係用最少o既時間、行程,

盡量俾屋企人睇到最多唔同特色o既紅葉景色,

所以今次o既行程可謂精心策劃, 有動有靜, 多姿多彩,

實屬小弟自信之作, 相信第一次去京都o既朋友都可以作為參考。

另外, 如果看官係一條友, 自信腳程好又捱得辛苦,

想一次過掃晒京都主要睇紅葉o既景點的話,

可以參考小弟以前o既京都四日地獄紅葉之旅。

京都四日地獄紅葉之旅 第一日

京都四日地獄紅葉之旅 第二日

京都四日地獄紅葉之旅 第三日

京都四日地獄紅葉之旅 第四日

好喇, 入正題喇。

去大阪一帶, 點都走唔甩由關西空港著陸架喇。

因為唔想辛苦, 小弟揀左中午機,

出得機場入得大阪市放低埋行里, 已經四點幾,

太陽都開始西斜。

老老實實, 係小弟心目中, 大阪真係冇乜野好睇,

唯一o既land mark就係大阪城。

有關於大阪城o既介紹, 小弟係以前o既blog都講過,

係呢度唔多講喇, 有興趣o既朋友可以睇番之前o既文章: 大坂城 (大阪城)

咁啱嗰時去係紅葉時節, 啲相多好多同靚過今日呢篇。

其實小弟帶屋企人黎大阪城,

一來係攝時間啦, 二來係想睇吓睇唔睇到嗰堆變黃o既銀杏樹。

下圖可以見到, 啲紅葉就未係好紅,
但一如以往, 大阪城都係勁多人。

河畔o既樹都只係零零星星有少少紅少少黃。

好遺憾, 除左大阪城天守直前方嗰棵大銀杏有啲變黃之外,
小弟搵唔到當年由黃色銀杏葉鋪成o既道路。
係呢度唯有post番當年啲相出黎懷念一下。

天色已漸濃,
陪家母係難波高島屋買完野之後, 一行三人就去蟹道樂食晚餐。

講出黎都冇人信, 小弟當年係大阪住左差唔多一年(working holiday),
但從來都冇食過蟹道樂。

唉, 無計啦, 嗰時窮到貼地, 只係晚晚去超市買半價弁當咋,
邊有錢食呢啲高級野丫。

初初見佢得嗰幾條蟹腳, 以為冇乜料到,
點知食吓食吓, 其實都真係幾飽吓。
當然, 上圖入面, 並未黎齊菜。

味道? 說實話, 小弟其實唔太好海鮮,
尤其是有殼嗰啲......
不過不得不驚嘆, 就咁一隻蟹, 都有咁多種食法!

食完就番酒店。
今日冇乜行程, 聽日就會精彩番啲架喇。






閒話幾句,
自從小弟2011-2012年o既working holiday之後,
雖然都keep住一年去兩三四次日本,
但一直都冇到過大阪。
今次番黎大阪, 感覺真係好特別。
雖然未致於話係番番黎屋企咁,
但話晒都住左差唔多成年,
啲關西話、鐵路o既圖、車箱o既氣味,
全部都好令小弟懷念。
真係架, 大阪地鐵月台同車廂陣味, 真係同東京唔同架。