六日五夜 京阪奈良紅葉魷 --- 第五日 嵐山嵯峨野 (嵐山小火車 + 保津川小船 + 天龍寺 + 野宮神社 + 竹林之道 + 常寂光寺)

黎到第五日, 可謂今次旅程o既重頭戲之一,

就係黎嵐山睇紅葉喇。

有爬開小弟文章o既人會話「又係嵐山?」

無錯, 小弟係黎過好多次, 但今次主要係帶屋企人黎丫嘛。

晨早出發, 搭JR直接到嵯峨嵐山駅,

出站後第一件事梗係到旁邊o既觀光小火車車站買車飛啦。

雖然小弟已經預早左大半個鐘到,

但排隊排到小弟o既時候, 觀光小火車座位已經售罄,

得番企位......不過都好過冇啦。

一來企位影唔到相啦, 二來啲紅葉都未話真係好紅,
所以坐觀光小火車都冇乜點影相喇。



係小弟心目中, 遊嵐山最standard o既行程,
一定係先坐觀光火車到龜岡,
然後再坐保津川小船番番去嵐山。
呢個亦係點解小弟要上午黎嵐山o既原因。

河邊坐緊馬車o既遊客

打算玩激流o既遊客

之前黎親嵐山都會落毛毛雨,
今次終於係好天o既一趟旅程!

因為天氣太好o既關係,
河水比較平靜, 所以船都行得比較慢。
對小弟黎講係好事, 因為同樣o既價錢可以坐耐啲,
但對船伕黎講就唔係開心事。
因為小流慢, 佢地就要更加落力撐隻船先會郁。

到船程o既尾聲, 就會有賣小食o既船駛埋黎賣野。

好喇, 到岸, 要落船了。

小弟有五日行程, 點解要將嵐山放係今日, 其實係有原因的,
因為今日係嵐山紅葉祭りo既日子。
係河流下遊會有唔同o既機構, 派出小船同人員係河流遊走,
當然唔少得有神官做祭祀o既儀式啦。

你問小弟佢地做緊咩, 小弟都唔係好知,
只係知道有好多船係度轉黎轉去。
然後有啲船上o既人會玩樂器, 有啲會有動作,
有啲就可能只係坐係度揮手。

吹彈拉打

東映o既船隻、船上o既一男一女可能係藝人,
不過小弟識佢老鼠......

祭典分上下午兩part,
而家睇緊o既上午part。
到尾聲時,啲船開始靠岸。

最後, 好似有一場神功戲咁。
以小弟愚見, 似乎係講緊下圖呢個武士殺左一隻紅髮惡鬼。

斬首, ~完~



離開河岸, 開始漫遊嵐山o既紅葉景點。

經過宝厳院。
其實宝厳院o既紅葉都OK, 不過入場費比較高昂,
加上唔想屋企人趕行程, 所以小弟決定SKIP左佢。

然後經過天龍寺。
天龍寺睇紅葉的話, 即係外面已經夠,
小弟認為唔需要要入去收費區。
另外, 會發天龍吟嗰個建築, 未見識過o既都可以入去o既,
但一來小弟已經入過, 二來今日目的主要係紅葉,
所以小弟都係直接跳過算。

離開天龍寺範圍, 直入竹林の道。
雖然冇紅葉, 但竹林の道又真係幾好feel,
加上呢個係打咭必到之地, 而又順路經開,
所以都帶屋企人行吓。

野宮神社, 冇乜特別,
小弟又唔洗求學業。

直接奔向下一個紅葉景點, 之前,
經過o既小路, 都幾好feel。

由上圖開始, 就係小弟覺得嵐山睇紅葉不可劃缺o既景點---常寂光寺 喇。

紅葉係靚,
但有紅有黃之餘, 再配上翠綠o既苔蘚,
個畫面就更加豐富喇。

上圖o既紅葉有啲特別,
佢唔係成塊葉轉色,
而係有兩截色。

有密集恐懼症o既朋友應該唔受呢張相......

真係求其拎起相機都可以影到wallpaper。

就咁, 簡簡單單o既嵐山紅葉旅程就完結左。

話時話, 動慢o既魔抓, 就連京都o既和菓子都染指......





走人喇, 今朝搭o既係JR,
而而家搭o既係阪急, 直接番大阪喇。

番到大阪, 玩左咁多日, 最後當然係要豪一豪佢啦,
去食燒肉放題。每人只係幾舊水, 但質素一啲都唔差!

話就話六日五夜,
但事實上最後嗰日係中午機返港,
check out左之後逛左陣就直接去機場,
所以都冇乜野好寫喇,
請容小弟在此為六日五夜京阪奈良紅葉魷作結~
BYEBYE