黎到今日,
今日o既行程應該係咁多日裏面,
最需要體力同精神o既行程,
但亦都係最苦盡甘來o既行程。
事關今日會去到兩個山口県兩個勁山卡啦o既景點,
就係上兩圖o既福徳稲荷神社同埋元乃隅神社。
有幾山卡啦?
可以參考下面o既地圖
再到元乃隅神社, 然後番去新山口駅過夜。
睇落好似好簡單o既行程,
但有幾花時間, 看官睇埋落去就知。
先係車站快快手手食個蕎麦,
再買啲水同飯團, 就開始JR之旅。
先坐1035 o既車到湯玉駅
多數除左嗰兩大塊水泥月台之外就乜都冇。
不過湯玉駅o既月台就連住左間藥局。
但事實上, 每日都唔知有冇一個人幫襯呢間野,
因為計埋回程, 小弟前前後後係呢個車站逗留左兩個鐘,
都冇人一個黎到呢個月台......
而且呢個月台o既位置係係海邊,
另外一邊係下圖o既公路, 冇幾多間民居......
雖然係有巴士路經, 但一日得八班車。
而且而家係日間, 巴士時間通常都係就番外出o既人士, 對接番前往市區o既火車,
所以小弟呢個時間冇車由車站去神社(因為小弟係由市區入黎)。
係日光日白之下行左廿分鐘, 終於到達福徳稲荷神社。
不過因為福徳稲荷神社係小山丘上,
所以穿過上圖o既鳥居,
再要行一段極斜o既斜路先到達主建築物。
會見到上圖步向主建築物o既紅色金屬梯級。
而右手邊係一連串o既鳥居(下二圖)。
其實行鳥居係稍稍兜路的,
行金屬梯級更為直接。
但一場黎到, 小弟當然周圍都行下啦。
因為唔係咁多神社係依海而建,
仲要福徳稲荷神社係對到正個大海, 十分之心曠神怡。
另外, 藍天碧海, 襯托住紅色為主o既神社,
景色分外鮮明。
本身小弟都唔抱咩期望, 但黎到一見, 確實係身心舒暢。
對住海o既狐狸石像, 應該都唔係周圍可以見到。
唔洗睇介紹都估到, 又係敲下就開運接福咁上下啦。
有趣地, 神社有好一部份係用金屬建成,
上圖o既接駁位可以見到,
可能因為係對住個海o既關係,
即使油上油漆, 仍然抵唔住鏽蝕。
另一個有趣o既地方, 神社一個供人休息o既涼亭,
入面放有好多而家難得一見o既瓷器台凳,
好有中式o既風味。
由神社主建築望番向鳥居通道
建築風格亦都冇乜好大o既特徵,
但唔知係咪因為鎮守海岸, 對住個大海,
成個神社好有一種穩重o既感覺,
唔可以話係莊嚴, 但有一種令人內心平靜o既力量。
正如頭先小弟講過,
本身都唔係話對呢個景點抱好大期望,
但呢個景點, 確實冇黎錯!
成個神社, 就算慢慢影相慢慢磨,
大約大半個鐘左右乜都睇完。
1200左右到達福徳稲荷神社,
磨左45分鐘左右, 落番去神社前o既巴士站,
等1305 o既巴士到車站。
車程只不過係三分鐘, 而下一班火車係1440......
即係話小弟要係火車站等成粒半鐘......
不過小弟實在要留番啲體力,
所以都係搭巴士,
到車站o既候車室休息, 順便食個飯團充飢。
車站o既櫻花。
但影相都影唔到粒半鐘......
好在小弟有一個技能,
就係只要個姿勢唔洗用力, 小弟就可以瞓著,
於是小弟係月台瞓左成粒鐘......
下一個目的地係元乃隅神社。
係計劃階段, 小弟爭扎左好耐到底去唔去元乃隅神社。
原因係, 一來: JR到達最近車站o既班次好疏,
二來, 完全冇車接駁站到神社, 除左的士
三來, 就算打的, 都要4000yen單程......
四來, 唔打的, 行路, 都要行兩個鐘(單程)......
五來, 去完之後, 再搭JR去番山口/新山口, 又係一個漫長o既旅程......
不過諗諗下, 就算唔去元乃隅神社,
留係下関都好似冇乜特別好做,
而且都唔知幾時先會再黎山口県,
所以都係去左先講啦。
搭1440 o既JR, 坐左一小時左右,
1543到達長門古市駅。
啱啱講過, 由長門古市駅行去元乃隅神社,
要大約2小時, 一共7.7公里。
頭先福徳稲荷神社都話每日8班車經過車站,
長門古市駅到元乃隅神社係零, 完全冇......
所以由長門古市駅到元乃隅神社,
要麼搭的士4000yen, 要麼行兩粒鐘。
窮拎o既小弟, 當然唔會咁豪同你來回都搭的士啦,
所以小弟o既plan係, 花兩小時行去元乃隅神社,
然後打的番黎, 咁都係俾一次4000yen啫......
都唔好諗住走嗰時隨便舉起手就會有架的士停埋黎......
你估無記拍戲咩。
係長門古市駅外面有一間小小o既的士公司(上圖),
無論係去程定係回程都係靠佢。
尤其是小弟呢啲只搭回程,
最好就梗係拎定電話預約定時間先啦。
望下招牌上面個電話號碼.....
喂, 大佬, 你覺得小弟會睇得到你啲數目字?
仲要佢好似前後噴過兩次油漆, 啲字疊埋,
跟本都唔知電話號碼寫乜......
入去辦公室敲門啦, 入面又冇人架喎,
而且, 與其話係辦公室, 倒不如話係居舖同室。
正當小弟唔知點算之時,
有個肥妹仔(初中左右?)由遠處輕步跑過黎,
問小弟係咪租的士。
小弟表明左會行過去神社, 回程先至會打的之後,
小妹妹就入左辦公室打電話俾某人。
問清楚小弟回程JRo既班次時間之後,
小妹妹就抄低左下圖o既電話碼俾小弟.
叫小弟就番JR開出前半個鐘, 打電話call的士。
話說, 下圖個電話號碼, 除左開頭區號0837之外,
同上圖招牌啲數字好似冇乜幾多對得上......
成日都話, 人生就好似玩RPG咁。
好, 必要o既item到左手之後,
小弟就孭住15公斤行里, 開始兩小時o既長征。
Coin Locker? 咪玩啦, 呢啲地方點會有呀。
1600左右, 正式出發, 開始7.7公里o既長征......
一開始, 都仲有幾間疏落o既民居,
然後, 好快就變成下圖o既田+山only......
途中經過一個巴士站
total得6班車
好在而家仲係春天, 溫度平均二十度左右,
所以孭住十幾公斤行里, 都唔係話太辛苦。
一開始路程o既1/4係平原, 然後開始進入山區......
除左路、路牌、植物、同埋電線之外, 就乜都冇。
怕唔怕盪失路? 絕對唔需要擔心,因為路只有一條, 基本上冇可能行錯。
開始落斜!!!
見上面遠征o既描述, 簡單幾句, 好似好輕鬆咁,
但其實已經行到腳軟, 因為上山o既斜率都幾大吓,
如果唔係天氣稍為涼快的話, 真係會熱死同攰死......
用左45分鐘行2/3路程,
都仲有50分鐘......
真係唔明, 啲人住係呢啲山卡啦中o既山卡啦,
日常生活係點過架呢??????
今日o既日落係18:37,
想要係日落變暗之前影到日間o既相,
小弟盡量要趕係1730前去到元乃隅神社。
終於, 最後係1720左右行到元乃隅神社,
比google map suggest o既時間快左半個鐘多啲。
唔係google唔準, 而係一來小弟平時都行得比較快,
二來, 小弟真係出盡奶力咁趕路......
就上圖見到o既停車場而言,
睇黎都有若干人黎到呢個山卡啦縣o既山卡啦神社咁喎。
上下圖就係呢個神社o既招牌景色喇。
元乃隅神社位於一個小海岬, 依山坡而建,
一條由鳥居組成o既路, 由坡上彎彎曲曲咁申延去海邊。
係沿住鳥居行落去之前,
神社入口附近仲有兩個spots。
一個係下兩圖o既鳥居。
鳥居正中間有一個賽銭箱,
即係許願投錢幣o既木箱(下圖)。
見到個箱有個心, 都估到係求姻緣架喇。
而上圖o既朋友就正係度努力咁嘗試將錢幣掟入去個賽銭箱。
呢個應該先係神社主體,
不過小弟覺得冇乜特別,
因為比主體更搶風頭o既, 係延伸去海邊o既鳥居群。
好喇, 真係正式沿住鳥居行落去海邊喇。
行到落海邊, 望番向神社(下兩圖)。
事實上元乃隅神社並唔話有太悠欠o既歷史,
如果wiki老冇點錯小弟的話, 應該係1955先開始建立。
但後來1987年開始10 o既年間,
不斷有人捐款納奉, 造成一排鳥居o既奇觀,
於是名氣開始慢慢增加。
除此之外,
元乃隅神社仲有一個出名o既原因, 就係日落美景。
山口県本身已經位於日本本州o既最西邊,
而元乃隅神社又係向住西北面o既海岸,
日落、海岬、鳥居, 形成令人著迷o既美景。
成個元乃隅神社一啲都唔大,
就算閣下玩埋頭先掟錢呀、參拜呀咁,
俾到盡半個鐘乜都搞掂晒。
但小弟一場黎到, 又咁啱天氣咁正,
當然慢慢享受下呢一個美麗o既夕陽啦。
其實仲有一個原因......
因為最快嗰班JR要1952先開出,
小弟要磨到1900左右先call的士。
即係話小弟要係元乃隅神社磨一個半鐘磨到天黑.......
無乜野做, 周圍影吓相。
海岬最尖端嗰塊石
應該係啲海蝕洞做成o既垂直岩洞,
當風向、潮水高度、同埋波浪配合下,
可以有高到成30米o既水花由洞噴出。
不過小弟現在呢個天氣環境做就唔到水花由洞噴出。
大家梗係想睇下荷包乾硬化o既小弟,
點樣由荷包擠出4000yen黎俾的士錢喇。
呢個時候, 小弟就要講吓奇遇。
小弟平時去旅行, 十分之樂意幫其他人拎機影相,
尤其是嗰啲兩夫婦, 或者係一家人嗰啲。
因為小弟雖然自己鐘意一條魷旅行,
但亦都會覺得, 難得人地兩公婆/一家人黎到旅遊,
有張齊齊整整o既靚相做留念, 應該冇人唔想,
所以小弟會好主動問人洗唔洗幫手影相。
就係小弟係元乃隅神社磨緊時間o既期間,
有一對講國語、四五十歲左右o既夫婦黎到,
於是小弟又問佢地洗唔洗幫手影相。
傾落偈知道, 佢地係來自台灣,
咁係呢啲旅遊景點, 免不了會傾吓行程。
小弟講嗰時都冇話咩目的,
就咁話: 頭先去完福德稻荷神社,
然後搭JR, 再行個半鐘過黎元乃隅神社,
之後打算打的去番車站。
佢地聽到之後, 立即就話不如車小弟去車站。
唔係小弟貪心, 而係小弟咁多年人, 發現,
一個人唔想做一件, 係唔會主動去提,
既然主動提出, 即係話佢本身已經係想做or唔介意去做,
於是呢個時候, 學會接受好意, 都係相處之道。
結果, 小弟有順風車坐, 唔洗call的~yeah~
真心, 本來小弟諗住可以去到車站已經好謝天謝地,
點知係車上傾偈, 佢地知道左小弟係落去 新山口駅,
又主動話車埋我過去, 因為佢地都咁啱今晚番去 山口市過夜。
不過 新山口駅 同 山口駅 實在有少少距離,
要佢地特登車我過去 新山口駅 實在講唔過去,
於是最後拜托佢地車小弟到 山口駅,
然後小弟自己搭JR番去 新山口駅。
又係嗰句, 人生就好似RPG咁,
充滿住hidden events。
托兩夫婦o既好心,
本身要11點先番到酒店,
而家8點幾就番到。
希望兩位今後健健康康, 幸福美滿, 善有善報。
題外話,
元乃隅神社附近(其實都唔太近)有個景點,
叫「楊貴妃の里」, 意譯即係「楊貴妃故里」。
(上圖左邊突出o既綠色, 中間偏下部份)
山口県同楊貴妃有咩關係?
咁係因為楊貴妃由山口県久津登岸,
晚年係日本生活。
???
讀過中史o既朋友會話,
楊貴妃唔係安史之亂之後,
被禁軍迫唐玄宗賜死架咩???
原來有民間一說, 話有人用侍女做替死鬼,
跟住送楊貴妃離開中土, 乘船渡航日本,
於山口県久津登岸, 然後跟隨日本皇室渡過餘生。
呢個故事就奇趣滿分喇。
不過作為景點去睇「楊貴妃の里」,
小弟做過資料搜集, 唔係話太吸引。
都係有個楊貴妃石像呀、有啲唐式建築呀、
有啲寺院呀、同埋有個楊貴妃之墓咁。
個墓, 小弟都唔信係真架喇,
加上位置比元乃隅神社更隔涉,
所以實在提唔勁去。
有邊位仁兄去過的話,
麻煩話一話俾小弟知好唔好玩~
沒有留言:
張貼留言