七日六夜 東京鎌倉 自魷行 第二日 --- 築地 + 汐留 + 月島 + 両国 + 秋葉原

***************************************************
呢篇blog係三年後寫番o既回顧,
詳情請參閱「七日六夜 東京鎌倉 自魷行 Preface」,
當然, 看官無視呢點就咁睇落去都唔係問題。

***************************************************



本來今日打算六點半就起身去築地的,
點知結果都係瞓過龍,
醒番o既時候已經係七點有多。
不過反正今日啲行程都唔係話太緊,
於是慢慢梳洗, 七點九先出門口。

打算由酒店行過去新御徒町駅搭大江戶線,
咁就唔洗點轉車。
睇地圖好似唔係好遠咁,
點知行行蕩失路,
於是就發生左一段插曲喇。



因為蕩失路o既關係,
當然係問路啦,
咁啱行過一個交番,
(「交番」即「警岡亭」, 日本警察好少話行必)
於是拎住本旅遊書走埋去。
因為當事實在係唔識讀「新御徒町」呢個字,
於是只好用手指指住個字問
「請問呢個地方點去?」



點知個警察呀叔瞄左我手指指住嗰度, 好唔耐煩咁問
「唔識去邊呀?」

咁小弟唯有再用手指指多次旅遊書上「新御徒町」呢個字
「呢度」

然後個警察更加唔順超咁問
「呢度即係邊度呀?」

「(心裏%@%$＊#(@^_＊&$)」

小弟唯有硬住頭皮嘗試讀.......
「Shin.....O.....To?....」

個警察呀叔聽到我讀Shin-O,
可能因為已經估到,
於是就指住某方向,
「哦~新御徒町呀馬, 嗰邊一直行」

咁總要講句唔該o既,
道個謝之後, 小弟抱住一肚悶氣&疑惑向住新御徒町駅前進。

事隔一兩年後, 同日本人傾開,
佢地話有啲老一輩o既警察,
真係有可能唔識字.......
對於住係一定要中五畢業先可以做警察o既番港,
小弟真係有點兒吃驚。

順帶一提,
「新御徒町」係讀做「Shin-OKaChi-MaChi」......



anyway, 八點半左右去到築地,
下圖就係場外市場。
有去過o既朋友都可能會有印象,
築地有分場外場內。
唔係話俾唔俾入o既問題,
而係一來講繄地理上,
場外市場係外圍,
場內市場係裏面。
另外功能上,
場外多啲小店、食店,
而場內多啲批發店。

上圖就係場外市場o既商店街。

咦, 點解好似咁靜咁o既,
人都唔多幾個。

問一個修路o既工人,
點解咁鬼靜,
佢o既答案係
「夏休み」

・
・
・
・
・
・
・

What the Fxxk !!!!!

有啲咁o既野架咩!?
點解從來都未聽過架!?

原來年中無休o既築地,
每年夏天築地都會有三日暑假......
小弟咁啱就係撞中第三日o既暑假黎到築地......

好, 聽日去買六合彩。



不過亦都因為咁,
小弟能夠一睹平日熙來攘往o既魚市場平靜o既一面。
(係咪好呀Q呢)

魚がし横町o既壽司店都全部休息.......

一場黎到, 無理由唔食番吓海鮮架~
於是係場外市場, 唯數不多營業中o既店入面,
揀左上圖嗰間食海鮮。

叫左個海鮮丼,
樣樣有啲, 正!!!!!!

印象最深刻o既係啲海膽真係好甜好鮮!!!!!!
到而家, 小弟都未係香港食番嗰種味.......
所以而家小弟都放棄左係香港食海膽......

因為魚市場休息冇野好睇,
於是食完個brunch就繼續行程,
經過本願寺 (唔係京都嗰個=.=)

亦都經過波除稲荷神社,
好似話築地市場o既人經常會黎拜下。
不過工程中......

好, 築地一帶都已經冇乜野好睇喇,
唯有重新調下啲行程,
睇下邊日再去多次築地啦。

下一站,
熟識東京o既朋友有冇印象呢,
答案係

汐留

都講過好多次,
其實比起行街食野,
小弟更喜歡去啲多啲綠色o既地方。
所以黎到汐留,
先係到旧浜離宮庭園睇下。

繁華中o既一片淨土。

見到東京鐵塔。

唔好見上圖絲色一片以為係草地,
其實係一個生滿浮萍o既池塘......

閑遊完公園之後,
正式進入汐留o既核心。

上圖見到有「中銀」o既字樣,
覺幾有趣, 於是影低左。

去到汐留某商場o既露天花園,
咁啱有event搞緊,
原來係《君に届け》寫實版o既宣傳。

都係嗰句啦, 好地地一個漫畫 / 動畫,
搞乜鬼寫實版丫......

其實小弟覺得寫實版,
用番能登麻美子黎拍都ok丫~



一個對動漫有興趣o既人,
到汐留必睇o既野,
就當然係下圖,
由宮崎駿designo既大鐘啦。

每日10:00,12:00,15:00,18:00,20:00都會響,
唔同o既parts都會郁, 持續約五分鐘左右。

然後下一個景點係「旧新橋停車場」
(地方名叫「新橋」, 所以唔係又舊又新)

呢個地方未必個個遊客都知,
小弟係因為睇左一套腐動畫《ミラクル☆トレイン～大江戸線へようこそ～》,
所以先識得黎。

係鐵道迷的話,
都知道旧新橋停車場係日本鐵路史上好有象徵意義
(最少, 以首都圈o既鐵路史黎講)。
詳細唔多講, 有興趣o既看觀自己搵下資料啦。

模仿番以前o既建築,
白色鐵架嗰part就係月台

主建築而家做左商店同埋博物館。

「0」,
呢個係代表住「旧新橋横浜間鉄道創設起点」,
亦即係以前o既鐵路,
就以呢度作為起點量度距離。

博物館內唔可以影相,
所以圖片欠奉,
不過唔識日文, 又或者唔係鐵道迷的話,
唔黎呢個景點都冇乜大礙。

係汐留o既商場, 買左啲綠茶製品做手信之後,
下一站就係去月島食もんじゃ焼き。

下圖就係月島o既大街。

一出地鐵站,
地面旁邊有一個小店位,
話唔知咩月島もんじゃ焼き協同組織咁上下,
係一個當地商店組成o既資訊站,
於是小弟就去問下,
有冇啲もんじゃ焼き店可以介紹一下,
小弟話要傳統少少o既,
嗰個坐陣o既呀蟬就介紹左下圖嗰間俾小弟。

「もんじゃ焼き」其實好似關西o既「お好み焼き」,
都係啲一pat 麵粉漿咁o既野煎熟,
再加上配料。

小弟叫左一份明太子もんじゃ焼き。
事實上小弟係唔識煎的,
店員見小弟好似兩頭望咁,
問小弟話洗唔洗幫手煎。
小弟就扮晒醒咁話「想自己試下」

於是就睇住menu黎試喇。

係煎板上查油

先落椰菜, 配料放係一邊煎熟。

再撈埋啲麵粉漿。
其實小弟o既方法係落錯的,
正確應該係將熟左o既椰菜圍一個圓,
然後先至倒啲麵粉漿落中間。

整成正方形係小弟獨創的,
好孩子不要學。

味道ok啦,
反正小弟到三年後o既今時今日,
都唔知真正o既もんじゃ焼き係點煎, 同埋係咩味orz



宅人黎到日本,
當然唔可以唔去聖地秋葉原啦!!!

不過途中經過両国,
先到国技館睇下。

日本o既国技,
講緊o既係相撲。
其實相撲咪又係蒙古o既摔交傳過黎......

因為冇賽事,
所以唔開放。

館o既一邊係相撲歷史資料館,
有興趣o既可以入內參觀。

両國附近o既道都有相撲o既裝飾。
石礐o既手印, 好似堅係相撲名人o既手印。

不過呢啲野真係どうでもいい,
因為小弟到達秋葉原喇 ＼(^o^)／

電器街出口一出,
當然會見到ラジオ会館啦,
三年後o既今日, ラジオ会館成幢拆左再起過~

嗰時先仲係賣緊なのはMOVIE 1ST o既碟。
仲有《みつどもえ》

因為相機冇電,
所以之後都冇再影。
總括黎講,
就係行均晒所有店,
然後到一間叫「じゃんがら」o既店食拉麵。

小弟實在好鐘意呢間「じゃんがら」o既拉麵,
以致小弟以後一次黎秋葉原,
都一定要黎食一次!!!!!!



ANYWAY, 今日行左一日都好攰,
加上聽日仲有更精彩o既節目,
所以今日早少少唞。