七日六夜 觀禮帶團沖繩魷 --- 第三日 首里琉染(珊瑚染布) + 沖繩そば + 國際通

第三日早上, 小弟們黎做番啲文化藝術野先。

黎到一家叫「首里琉染」o既店舖,
賣點係日本唯一用珊瑚作為圖案染色o既技藝「珊瑚染」。
店入面o既布藝品, 全部都係以珊瑚拓印o既方式上色,
而且俾少少費用, 仲可以親身試吓,
自己一手一腳染T-Shirt或者係布袋。

之前有朋友黎過體驗完之後, 極力向小弟推薦,
所以小弟都黎玩吓。

成人報名費連材料3000yen, 小朋友2500yen。

店員帶領小弟們上店o既二樓,
枱上面都放有好多珊瑚形狀o既石(水泥?)
  

當然一定要有顏料啦 。
顏料有4種色: 紅、黃、藍、紫

上圖係一啲包住棉花o既布球,

首先將顏料唧落墊盤布上,

然後用布球壓住黎吸附顏料,

將T-shirt固定係「珊瑚石」上面,

然後將附有顏料o既布球往T-shirt上面輕印。

T-shirt上就會出現珊瑚o既圖案

轉換另一種顏色配搭, 效果會更靚。 

而每將枱其實都有配色o既教學(下圖右下)。

 除左珊瑚之外, 都仲有其他可以選擇o既圖案,
例如係魚(上圖中間)


大家都玩個不亦樂乎。
除左T-shirt之外, 仲可以揀選布袋,
上圖三位朋友就正正係染緊布袋。

玩左大半個鐘, 小弟o既T-shirt大工告成!!!
其實背脊都有圖案, 不過因為太symbolic,
所以唔方便公開。

同層亦都展覽好多示範作。

地面嗰層係商店, 售賣唔同o既琉染成品(上、下圖)
啲圖案都真係幾靚, 所以小弟同朋友們個個都有幫襯。

三樓頂層係展覽館, 展覽左好多真正o既珊瑚染,
當然唔係小弟呢啲三腳貓T-shirt可以比較......



總體而言, 係一個幾好o既體驗, 同埋一個老幼咸宜o既活動,
本身話唔想參加o既朋友, 最後都好似染得幾enjoy。

而且小弟覺得, 呢個係一個非常有學習得益o既活動:
要有構圖、空間感、手眼配合不在話下,
仲要識得原色概念、配色、溝色。
小弟一邊印, 一邊要將初中時美術堂學o既顏色概念,
由腦裏面o既資源回收筒勉強回收番黎XD
所以帶住小朋友玩都好適合。

大家有時間都不妨去試吓。
首里琉染官網



到左中午, 匯合埋最後一批到埗o既團員 (一對情侶及其奶奶),
就去一間叫亀かめそば食沖繩拉麵。
同平時大家認知o既日本拉麵唔同,
沖繩拉麵o既湯底並唔係醬油定係豬骨嗰啲濃厚o既湯,
而係多數用牛and/or雞煮o既清湯,
而用o既麵, 亦比較似香港o既油麵。

雖然好多旅遊雜誌介紹,
但因為本身都只係一間區內o既小店,
所以店面好地道, 唔會話為吸引遊客而做到好華麗。
但就係因為咁, 所以更為親切,
亦都更能感受當地氣息。

招牌菜係豬軟骨拉麵, 清甜o既湯底,
加上鹹甜適中、又煮到腍晒o既豬軟骨,
真係冇得挑剔。

另外, 比較特別o既係上圖o既フーチバー拉麵,
フーチバー係一種葉菜, フーチバー係沖繩方言, 其實即係日文よもぎ,
中文的話, 應該係叫「蒿」或者「艾」。
不過聽過名都估到, 呢種葉菜o既味道比較重, 未必個個鐘意。
而白色嗰片, 類似係潮洲麵o既魚蛋片。




接住落黎, 其實本應係要去首里城的,
但唔知發咩神經, 就連編排行程o既小弟, 都唔記得左呢個行程,
結果直接去左國際通, 進行五小時o既購物......
當發現未去首里城, 已經太遲了......

都係嗰句啦, 小弟對購物冇乜興趣,
同幾個fd揈完一輪之後, 就為晚飯作準備,
去國際通某間居酒屋攞枱喇。

黎到一間叫「琉球ダイニング地酒横丁」o既沖繩居酒屋。
老老實實, 唔知係咪因為間店係藥房o既二樓比較隔涉,
(事實上小弟都行過左四轉先搵到......)
所以唔係話好多人。
不過間店勝在地方大, 仲有張大枱, 啱晒我地咁大棚人。

店入面都有沖繩民謠o既表演, 不過比較形式化,
氣氛冇之前去啲小店咁濃烈。
但調番轉講, 反而可以俾小弟們靜靜地傾偈。
而且店o既流轉唔多, 完全冇話食完拿拿聲走人o既壓力。



食完飯之後, 小弟們就渣車向北行,
事關人數多左, 小弟們要移師去另一處o既住宿。
而平衡過金錢、舒適度, 同埋要近婚禮會場,
我地揀左住係読谷一帶o既airbnb獨立屋。