七日六夜 觀禮帶團沖繩魷 --- 第六日 美ら海水族館 + 万座毛 + 琉球の牛

就算唔睇title, 睇到上面幅吸睛圖,

大家都應該知道今日係去沖繩o既美ら海水族館啦。

今日天氣麻麻, 仲有少少雨, 不過反正水族館多數都係室內。

入場費1850yen, 都唔算係好貴。
一進入館內, 就係可以俾大家觸摸o既地帶,
水族箱內放左唔同o既海星,
大家可以試下摸下。

因為上次已經黎過一次, 所以今次小弟都冇影咁多相,

相對地呢度o既講解亦都少啲。

如果大家想睇多啲相, 或者了解多啲水族館內部,

可以參考上一次個BLOG

六日五夜 石垣沖繩中同魷 --- 第五日 万座毛 + 美ら海水族館 + 自製琉球玻璃杯

但就算點縮骨都好, 點都唔可以唔講下
美ら海水族館o既招牌菜, 特大玻璃魚缸。

睇到上圖啲人, 都約略知道塊玻璃有幾大。
再想像一下入面裝左幾多水, 有幾大水壓,
大家就會知道呢個水缸有幾了不起。



借番上年啲相

水族館入面有間餐廳,
唔似香港o既海水公園咁, 啲野食一啲都唔貴, 仲幾有質素添。
不過最重要係, 可以坐係個無敵大魚缸旁邊,
一邊食, 一邊欣賞巨大o既海洋生物。

其中有幾張枱, 放正係塊大玻璃旁邊。
不過呢啲枱要排隊的, 唔係話要霸就霸到。

係食肆門口, 有個位負責登記。
登記唔洗錢的, 只要名嗰時你應機就得,
所以有啲人會登記左之後, 先入去買野食,
排得食物黎都差唔多叫到你個名。
就算未到, 都可以一邊食一邊等。

不過一旦入坐, 45分鐘就要交枱。
但就係因為咁, 所以就算係午飯高峰期,
等位都只係大約需要半個鐘左右就OK。




一來小弟已經黎過呢個水族館一次,
二來有左上次o既經驗,
今次趁啲團友去睇緊其他野o既時候,
小弟就已經登記定排隊,
同埋影晒menu問大家食咩。
所以團友門都可以好順利咁,
睇完魚之後直接入座。

主館睇完睇埋其他周邊o既展覽。

先係海龜館。
上次黎度正值海龜館放晒水大清潔,
今次終於睇到係游緊o既龜。

另外仲有海牛。

臨走前, 睇埋海洋劇場。

有興趣睇o既朋友, 記得要早啲要去霸位,
想霸到好位, 早30分鐘都不為過。

睇完水族館, 趣仲未完全日落,
較啱時間黎到万座毛睇日落。
時間就較啱左喇, 可惜天氣不似預期.......

勁多雲

咁下圖係咩黎架。

好簡單, 買一張名信片,

然後影張名信片........

晚上黎到琉球の牛食燒石垣牛!

本身小弟都唔知呢間野,
都係介紹琉染嗰個朋友介紹。
呢間野都好爆, 基本上預約左都要等一陣。
不過好可惜, 呢間野只接受電話預約,
即係話你要打長途電話去用日文同佢book枱......
咁啲樣對小弟黎講冇難度o既。

琉球の牛有set, 亦都可以散嗌,
不過事實上, 佢啲set唔係話會比散嗌平,
而且叫set仲會限定左你想食o既野,
所以散嗌反而有so。

一如小弟o既習慣, 食到七成飽o既時候,

叫一碟上剩o既肉黎品嘗

今次叫o既係4600羊180g o既西冷。

其他人埋單都只係五六百(HKD),
小弟埋單就埋左成千銀..........




講番間店先。
啲牛比其他店有少少偏貴,
不過勝在環境好, 夠高級, 坐得舒服。
但完全係嗰種「專俾遊客黎食」o既感覺,
反而上次小弟係石垣o既一啲地道小店,
食物質素差唔多, 但價錢平兩成左右。

帶人食的話, 琉球の牛的確係一個唔錯o既選擇,
但如果幾個圍埋, 想搵平靚正的話,
 可能去番啲up up dup dup o既店仲好。