六日五夜 老套行程東京魷 --- 第四日 箱根神社（九頭龍神社） + 溫泉旅館

第4日行程, 主要係箱根一帶,

然後係箱根o既溫泉旅館過一晚。

首先坐JR到小田原駅,

先係小田原駅買箱根o既周遊pass。

係小田原買箱根周遊pass有一個好處,

就係呢度o既旅遊資訊中心有箱根最新o既消息,

例如有冇火山活動影響地區o既開放、

會唔會因為大風而影響纜車行駛、

又或者會唔會因為大霧而影響遊覽船運作等等,

從而再計劃行程、買幾多日o既pass。

小弟確認好情況之後, 就買左兩日pass,

然後搭車到箱根湯本。

小弟都係為左呢個行程, 上網check過先發現,
原來係箱根湯本駅o既月台, 扶手電梯旁,
有一個接收行里o既counter。

只要交低行里、填低資料、同埋俾低少少錢,
職員就會將行里送到閣下下榻o既旅館。
於是遊客就可以無拘無束咁玩到夠鐘check in,
又唔洗自己將行里抬上抬落,
話晒箱根有好一部份旅館都係山上,
又或者距離車站有少少距離。

交低行里, 先係箱根湯本附近o既商店行個圈之後,
就上到去蘆ノ湖。
不過小弟唔係坐觀光船遊覽,
因為事實上坐船都冇乜野好睇......

小弟們沿住蘆ノ湖行, 目的地係箱根神社(九頭龍神社)

不過誠如大家係相片所見,

上山之後天氣唔多好,

又大雨、又大霧、又刮強風......

小弟發覺同親屋企人上山, 天氣都會唔好.......

明明自己旅行, 十之八九都係晴天......

不幸中o既大幸, 小弟到達箱根神社o既時候,
風雨都細番少少。

經過上圖o既鳥居向上行, 就係箱根神社o既主建築物,
不過小弟一家反而係向住湖邊方向向下行。

目的就係黎到呢個湖邊o既鳥居影相。

當然, 唔係淨係得小弟知道有呢一個湖邊鳥居啦。
事實上小弟去到o既時, 已經有十數名遊客,
係度排緊排隊等打咭。
做o既動作, 大家都不礙乎好似上圖咁。
當然晴天係好, 但係好似今日咁o既惡劣天氣,
擺番同一個post, 又別有風情。



打完咭, 然後就去本社參觀。
因為小弟已經係第二次黎,
有關箱根神社（九頭龍神社）o既詳細,
請參閱上一次o既BLOG。
同埋上次黎好天氣啲, 啲相都靚啲。
七日六夜 箱根東京千葉魷 第一日 --- 芦ノ湖 + 箱根神社（九頭龍神社） + 甘酒茶屋 + 箱根旧街道 + 溫泉旅館

參觀完箱根神社（九頭龍神社）之後,

都差唔多係時候夠鐘去溫泉旅館check in。 

話晒一晚都唔平, 唔好蝕俾佢, 準時三點去到check in。

今次小弟們住o既溫泉旅館係「櫻休庵 」。
櫻休庵距離最近o既強羅車站, 都有五至十分鐘的士車程,
如果行的話, 要花大約二十分鐘。
不過小弟們問過屋企人, 佢地都話行得下,
於是一家人就跟住google地圖行喇。




因為係郊區o既關係, 有啲小路都幾難搵, 而且又有斜坡。
不過行路都有個好處, 就係小弟們途中兜少少路,
經過便利店, 買少少飲品小弟, 準備今晚係旅館享用。

連埋買野, 行左半個鐘左就就到達上圖o既櫻休庵。

正門

大堂common area

走廊



外觀好似有少少舊, 但入面整體都幾骨子。

主角當然係客房啦。

最重要係, 獨立露天溫泉風呂!!!

說實話, 係就係好開揚,
但個景唔係話特別好正,
只係對住一堆樹。

當然, 旅館都有共用o既溫泉浴場,
不過既然我地自己房都有, 又洗乜去共用~



全家人輪流浸完溫泉風呂, 就到左晚飯時間。
係專人送到房間o既service。

BOOK溫泉旅館, 小弟會有以下因素考慮,
1) 距離車站路程
2) 有否獨立溫泉風呂
3) 共公浴場環境
4) 餐單
5) 是否房間用膳 / 還是到旅館餐廳用膳
6) 客房大小、配套
7) 價錢



因為係一家人旅行o既關係,
小弟揀左係房間用膳。

係BOOK房o既時候, 小弟已經仔細研究過餐單,
旅館容許加錢轉某些餸菜,
於是小弟加左少少錢, 要左上圖o既 蟹+海鮮刺身,
同埋下圖o既 龍蝦+海鮮刺身。

上圖仲可以見到左上角有燒和牛~~~


都冇乜好講喇, 享用完晚膳,
浸吓溫泉睇下電視攤下唞下, 好好享受人生,
咁就一Day。