魷日記: 七日六夜箱根東京千葉魷第一日 --- 芦ノ湖 + 箱根神社（九頭龍神社） + 甘酒茶屋 + 箱根旧街道 + 溫泉旅館

又到左八月底,

有爬開文o既朋友都會察覺,

到左呢個時期, 小弟都會去一轉日本,

參加ANIMELO SUMMER LIVE,

今年本打算唔黎架喇,

不過有朋友抽到飛,

結果都係黎左......

都係啦, 唔會淨係聽演唱會o既,

係演唱會之前, 通常小弟都會黎個小小o既旅行。

plan行程o既時候諗起, 小弟黎咁多次日本,

都未黎過溫泉熱點箱根!!!

於是小弟就決定去一轉箱根,

book間勁貴o既溫泉旅館,

黎個豪華溫泉之旅。

去程, 小弟仍然係選擇深夜o既廉航,

咁就可以請少日假, 而又玩盡第二日。

可能因為小弟遲check in o既關係,
一班九成滿o既機,
小弟竟然可以坐到係兩個吉位旁邊,
超lucky。
可以推起扶手, 打橫瞓晒三個位~

香港時間1150,take off,
日本時間五點左右landing,
太陽都未出黎。

呢個景色, 令小弟諗起早見沙織首《BLUE HOUR》

由羽田機場搭京急, 再轉JR,
早上七點半已經到小田原駅,
係度轉小田急去箱根。

唔知係咪因為已經黎過好多次日本,
加上手提電話太方便,
今次旅行都冇話計劃得好詳細,
列車班次等都唔係話check得好足,
入到小田急小田原駅,
先發覺原來有箱根free pass售賣。

兩日4000yen, 三日4500yen。
咁睇梗係三日平好多啦,
不過小弟聽日就走, 得物無所用,
於是買4000yen算。
雖然係咁, 其實只要你用張pass,
搭齊佢可以俾你搭o既車呀、船呀, 已經回本有找,
最重要係唔洗下下買飛、摷散紙嘛!
所以黎觀光o既朋友, 一定記得要買番張。
官網

由小田原駅到箱根中心溫泉旅遊地o既交通, 可謂多采多姿。
先係搭小田急(列車)到箱根湯本駅,
然後轉登山電車(兩卡列車)到強羅駅。
基本上較正宗o既溫泉旅館都係強羅一帶。

如果再要遊覽的話,
可以由強羅搭登山cable car(類似香港山頂纜車)到早雲山
再由早雲山坐吊車到桃源谷, 去搭觀光船。

上圖係小田原駅o既列車,
坐到去下圖o既箱根湯本駅轉登山電車。

坐上圖o既登山電車到強羅,
下圖為途中o既風景。
可以見到水蒸汽繚繞。

上圖就係強羅駅喇。
一般人對呢個名可能好陌生,
但對於阿宅黎講, 呢個絕對係耳熟能詳,
因為《EVA》劇中強羅絶対防衛線入面o既強羅,
正正係呢個強羅!!!
所以大家旅行途中見到好多動漫人物,
十之八九都係《EVA》~

係強羅駅, 唔洗出面,
就可以直接轉乘下圖o既cable car到早雲山。
而火山地貌名勝大涌谷就要係早雲山再轉吊車。
因為小弟一心係黎睇浸溫泉同埋睇大涌谷的,
所以當然要去啦。

不過係上車前, 小弟得知一個好令人震驚o既事實,

車站職員係車站派單張,

告知小弟而家正值箱根火山活躍期間,

大涌谷方圓700m不得入進,

由早雲山出發o既吊車亦都全線停止......

orz

cable car可以照到早雲山駅,

但到早雲山駅之後, 就再冇交通接駁......

雖然冇得睇大涌谷,

不過小弟又有排都未夠鐘check in旅館,

而時間又多的是,

於是都搭下登山cable car上早雲山駅睇下咩料。

果然, 登山cable car都係冇乜人坐,
到左早雲山駅, 車站亦都冷冷清清。
出車站外睇下。

車站外有個展望台,
可以飽覽箱根一帶。

可惡o既火山活躍,

如果唔係小弟已經坐緊上圖o既吊車去大涌谷。

睇地圖得知, 有一條截徑可以到小弟今晚住o既溫泉旅館,

不過要先沿公路行一段路,

而公路其中一段仔o既彎位,

正正700m封鎖線所覆蓋。

小弟姑且搏大霧睇下過唔過到。

沿途都有好多溫泉旅館,
不過真係冇乜人影。

行左廿分鐘,
果然, 日本人做野係一絲不苟的,
雖然只係其中一個彎受封鎖線所覆蓋,
但就係連呢個彎都唔俾你過......
小弟只好沿路行番轉頭......

搭番cable car(上圖)落去強羅駅(下圖)

頭先黎強羅仲係九點前, 乜都未開,
而家都差唔多成十點,
成個車站唔同晒,
商店開晒, 亦都多番好多人。

冇得抄截徑, 小弟只好由強羅搭巴士到旅館check in。
不過因為仲夠鐘上得房,
所以小弟都只係放低行里,
淨係拎住相機同free pass,
遊覽箱根o既其他地方。

早雲山吊車唔開,
咁又點去桃源台坐船呢,
唔洗怕, 有代行巴士由羅強站送你到桃源台。
不過因為要兜路被開700m封鎖線,
加上山路多彎, 所以都要差唔多成個鐘先到......

未夠鐘上船,
睇下手信店先。

正如頭先講過, 箱根係《EVA》o既聖地,
所以唔難搵到《EVA》相關o既商品。

真係成個架都係《EVA》啲手信......
最感興趣o既係加持良治西瓜饅頭www

黎緊, 小弟就會搭坐下圖o既觀光船遊覽芦ノ湖,
有睇《EVA》o既朋友應該都聽過蘆之湖呢個名www

上圖首船, 叫佢賊船都未為過,
因為除左佢個外觀係一艘海盜船之外,
收費仲一啲都唔便宜,
單程盛惠1000大洋......

事實上如果行程計劃得好的話,
基本上單程都已經夠,
而如果好似小弟咁買左箱根pass的話,
仲可以唔洗買飛坐添......其實咪又包埋係張pass入面......

anyway, 張 pass4000yen,
就咁坐一程船已經係入面o既1/4,
所以話, 張pass都幾抵買。

上面幾張圖就係小弟會乘坐o既賊船,
而當小弟要上船o既時候,
剛好另一艘船回航, 就係下圖紅色嗰艘。

小弟嗰艘綠色o既就似海盜船,
而上圖紅色嗰艘就搞到好似戰船咁。

上左船望番落碼頭。

事實上芦ノ湖都冇乜野好睇,
如果唔係pass包左, 小弟真係唔會上呢隻賊船......

坐左廿零分鐘就到左其中一站---元箱根港。
小弟因為要睇箱根神社, 所以係呢個站落車。
從下圖都穩若睇到碼頭後面有個鳥居。

不過鳥居只係表參道o既開始,
仲要沿住湖邊馬路行幾分路先到達神社。

小弟以前都話, 去日本旅行o既時候非常好采,
基本上都唔會點落雨,
日本旅行落雨o既日子, 數埋都唔夠十次。

不過今日, 小弟除左遇上大涌谷封鎖之外,
亦都要面對落雨。
好在o既係, 雨唔係好大,
而咁啱小弟亦都開始肚餓,
大佬, 成晚凌晨到而家點幾鐘都未食野,
於是小弟就求其入左間蕎麥麵店食野兼避雨。

食完野出黎, 雨都停晒,
於是繼續向箱根神社進發。

有時唔到你唔覺得外國月亮特別圓,
好簡單一片樹森,
但啲樹幾層樓咁高,
香港真係想搵多棵都難......

行過上圖o既樓就可以見到下圖o既本殿,
正確黎講係本殿o既前面。

上圖係本殿o既正門入口,
而佢o既右手邊有一個小水池洗手(下圖)。

其實箱根神社, 正式應該叫做 --- "箱根神社(九頭龍神社)"
不過因為附近仲有個九頭龍神社,
為免混亂, 所以呢個就咁叫箱根神社,

既然有得叫開括弧九頭龍神社閂括弧,
洗手水池有九頭龍o既造形一啲都唔驚奇。

總之就係話, 呢啲水係箱根山黎o既水,
水從山內流落黎, 充滿芦ノ湖,
是以用呢啲水黎洗手漱口, 可以盡去污穢不淨之物。

靈唔靈姑且唔黎, 九個龍頭o既造形確係幾有氣勢。

另外, 係九個龍頭旁邊仲有個小池,

幫襯神社買張符, 寫幾隻字, 放入池入面俾水沖走,

就自己心想事成, 可喜可賀。

小弟冇咁多願許,
直接入去本殿睇。

冇乜野好睇, 都係睇人許願>.<

好, that's all,
行番去碼頭嗰邊等巴士去下個景點。

都講過, 箱根係動畫《EVA》o既舞台,
呢套到今時今日都咁heat o既動畫,
當然係箱根都仲可以搵到佢o既痕跡。

係強羅附近仲有明日香同凌波麗o既汽水機,
不過小弟冇影到。

係碼頭搭巴士到下一個景點。
係度先介紹下。
箱根係江戶時代, 係一個幾重要o既地方,
因為江戶時代, 東日本急速發展,
好多人都經過箱根, 來往東日本同日本中部經商。
行路實要經過好多地方, 但點解箱根咁出名呢,
因為箱根出左名山多斜路多,
所以箱根係來往東日本同中部, 出左名o既難關。

小弟下一個景點......與其話係景點, 應該話係一段路......
小弟黎緊會行o既一段路,
就係當年穿過箱根o既其中一段路線 "箱根旧街道"。
而"箱根旧街道"o既起點, 就係下圖o既甘酒茶屋。

頭先講過箱根o既山路非常難行,
所以亦都造就左好多俾旅人休息o既小店。
而甘酒茶屋, 當年開到成個箱根都係,
生意非常興隆。

不過除住開闢新o既道路同現代化,
而家只剩下呢一家, 主要係滿足遊客o既期望。

有睇過日本動漫或時代劇o既人,
都應該對下圖呢種紅色凳有印象。

本身小弟都唔諗住幫襯的,
不過連續活動超過8小時, 實在有少少攰,
同埋頭先都講過, 真係好Q凍......
於是入去坐一陣。

店內意外地闊躺。

叫得甘酒茶屋, 梗係出名甘酒啦,
於是小弟就叫左個甘酒同いそべ。

上圖杯黃色野就係甘酒,
而嗰兩餅野就係いそべ(紫菜包白年糕然後稍為烤一下)

甘酒話就話酒, 其實冇乜酒精成份,
只係將米飯稍為發酵糖化而成,
小弟身旁o既小蘿莉都係度飲緊。
日本人過新年都會飲甘酒, 小弟都飲過,
多數都係水鬼尿咁, 不過呢間野真係真材實料,
杰撻撻, 甜到hihi。

好有懷舊特色(上圖),
一個土爐, 大家脆坐係前面,
一邊取暖, 一邊食下飲下。
呢個火爐真係好重要,
小弟本身真係凍到手腳冰冷的......
真係唔可以睇小山區o既氣溫......

土爐上面有鍋水,
應該主要係要黎加濕的。

除左脆坐係土爐前,
仲可以選擇坐他他咪。

「箱根の山は天下の険函谷関も物ならず」
真譯為: 箱根o既山, 天下最險要, 函谷關都冇乜比。
.........
寫呢句野條友有冇去過函谷關架.......
........
雖然小弟都冇去過.......

取完暖, 出發探索箱根旧街道。
之前落完雨, 山嵐繚繞, 幾有氣氛,
小弟覺得比起晴空萬里仲要有情調~