即食麵記念館+寶塚歌舞劇團+手塚治虫紀念館

琴晚總算收番足一月份o既人工,
(=.=拖左成個月咁濟)
經濟上鬆動好多,
再加上成個月足不出戶都唔係辦法,
所以今日近近地係附近行下。

話就話近近地,
其實已經離開左大阪府,
去到東北面o既兵庫縣......
距離上我諗就好似由赤柱番深圳咁上下啦。

右下角打星o既就係小弟住o既地方,
左上兩個圈住o既市名就係小弟今日去o既地方,
留意左下角把尺o既單位係似5KM計算......

九點起身,
搭地鐵到東梅田(310yen),
再轉阪急到池田(260yen)。

因為梅田係總站,
所以一個超大o既月台,
排左好幾架火車。
可能歐洲等外國唔少呢種月台,
但呢種情況小弟咁大個人都係第一次見,
覺得幾特別,
所以就影低落黎。

第一站係池田市池田駅附近o既Instant Noodle Museum,

係由月清負責的。
下圖o既像,
就係即食麵始創人。

不過小弟好多年前睇過一個港台節目,
訪問過香港一間老麵廠,
好似話係日本有即食麵之前,
該麵廠已經有類似產品。
不過熟是熟非,
小弟就冇深究喇。

一入正門o既右手邊就會見到上圖o既展品:
一舊有史前動物及手機等o既化石上有一個杯麵,
喻意海枯石爛都要食即食麵......

免費入場,
轉右進入展場,
會見到一條好震撼o既隧道,
貼住隧道排隊,
就係自製杯麵o既地方。

自製杯麵之前,
小弟先睇一睇啲展品。

原來杯麵個底留有空間,
唔係為左減料,
而係為左加熱水之後,
下面o既麵都可以焗得熟。

自己排隊整杯麵之前,
先睇下人地點樣整。

先係用300yen買個杯。
拎住個杯去坐低慢慢畫公仔,
然後再番黎排隊加料。

將個杯交俾工作人員,
佢地就會調轉個杯吸住個麵餅。

客人攪動手掣,
個杯就會由機器頂部順時針轉左落下面,
同時個麵餅會被壓入杯入面。

揀一種湯底,
同埋四種材料。
然後工作人員就會放個杯放入左邊部機封頂,
再包上收縮膠,
放入右邊紅色熱風機,
then製作完成。

話就話自製杯麵,
但除左係個杯上面畫公仔之外,
冇乜客人出場o既地方=.=

不過仍然有好多人排隊一試,
小弟亦都唔例外,
一場黎到丫嘛。

不過條龍長到呢。

話就話今日係星期一,
不過可能因為仲係春假,
所以爆多人=.=

排隊o既時候,
咪影下月清啲杯麵囉。
有幾多杯麵閣下係見過架呢。

高達杯麵!?

出前一J系列

排排下,
有工作人員話因為太多人,
為左分流,
會帶我地到二樓整,
過程差唔多一樣。

咁人地咁講,
咪照跟住行囉。
走上二樓整杯麵。

小弟唔方便俾大家睇畫左啲咩上個杯度,
因為有小弟個名。
簡單黎講,
小弟用類似小篆o既字體,
好似圖章咁畫左自己個名上去。
真係想睇o既就msn HI小弟啦。

湯底暕左香港冇見過o既蕃茄味,
材料揀左蛋、蟹柳、蝦、腸仔片。

工作人員會派一個膠袋,
杯麵完成之後放入膠袋揼氣,
個袋就會發脹保護個杯麵。

其實成個整杯麵o既過程唔洗十五分鐘,
不過咁啱,
係小弟前面有一班小學雞鴨仔團,
由於其人數眾多,
加上小朋友比較多蒔實,
結果用左成粒鐘先完成,
當中有五十分鐘係排隊=.=

出番正門o既手信櫃位,
買左啲手信俾表弟妹們咁啦。
(大家都係小學生或以下, 一Q搞掂晒)
好彩唔洗買埋老豆嗰邊,
如果唔係真係破產(八兄弟妹=.=)

再搭180yen到寶塚駅。
了解日本文化o既朋友應該已經聯想到寶塚歌舞劇團。
無錯,寶塚就係寶塚歌舞劇團o既所在地。

寶塚歌舞劇團係日本一個歷史悠久o既歌劇團,
不過特別之處在於演員只限未婚女性。
一直以黎, 寶塚歌舞劇團都孕育左唔少女演員、藝人、聲優等。

出左車站沿住河畔o既一條花の道行400米左右就到寶塚歌舞劇團劇場。

因為都未正式春天,
所以都冇乜花開啦,
不過沿路環境優雅,
有啲歐陸風情。

上圖就係寶塚歌舞劇團o既大本營。
其實冇乜野好貝睇,
係門外影番幾張相就走人。

當然唔會為左係門口影兩張相就搭180yen黎寶塚市啦。
仲有一個景點(?),
就係下圖o既手塚治虫紀念館。

牆外o既裝飾。

門口有一大隻火之鳥睇水。

門前幾條柱都有人物o既銅片頭像。

一入正門,
地下o既馬賽克已經好吸引,
不過影出黎效果欠佳,
再加上張地毯.....

先係正門自動販賣機購票,
成人700yen。

其實小弟對於手塚治虫o既作品唔太認識,
話晒小弟開始睇日本動漫,
都已經係大學o既事......
頂多都係睇過《小飛俠阿童牧》、《三眼小子》同《怪醫秦博士》。
其中以《三眼小子》尤其深刻!
不過老一輩o既人黎到,
大概會感動流涕。

個三眼小子o既面具好似個佛像咁=.=

上圖o既手塚治虫作品年表,
大家又認得幾多!?

原來《三眼小子》係1974年o既事,
但點解小弟係小學o既時候會係閃電fax機節目內睇到???

阿童牧o既人設同分鏡。

二樓有一個手信店,
小弟都破左少少財,
不過值得o既。

手信店後面係一個漫畫角,
手塚治虫漫畫任睇。

地面之下仲有一層,
(即係under ground啦)
不過冇乜野好睇

只係有一個動畫製作體驗。
不過就小弟所見,
都係坐係個電腦前面跟指示click click下咁,
所以冇入去。

去番正門,
影番幾張就走人。

《リボンの騎士》(港譯:《藍寶石王子》)又有幾多人認識?

手塚治虫版星光大道......

三眼小子---寫樂

秦博士

《ジャングル大帝》(港譯《小白獅》),
呢個手印係咩一回事=.=

DSC_0314
阿童牧

DSC_0315
火之鳥......




今日鬆鬆地睇完呢三個景點,
都只不過係三點左右,
就踏上歸途喇。

其實拉麵紀念館,
如無特別執念,
唔去都唔會有咩損失,
不過帶有小朋友o既,
咪去畫下公仔咁囉,
順利o既話一個小時應該可以逛完成個館。

至於手塚治虫紀念館,
除非係fans,
如果唔係俾700yen入去唔太化算。

ANYWAY,
呢兩個都係叫「紀念館」而唔係「博物館」,
所以期望唔好太大。