今日o既行程, 一下子由犬山,
渣130幾公里黎到白川鄉。
嗯......小弟已經係第三次黎白川鄉......
相信九成o既日本人都未必黎過呢個地方三次......
Anyway, 就算係第三次黎, 都有新觀點o既。
白川郷呢個地方,
位於日本中部比較中間、亦都係比較山區o既地方,
但點解會有咁多香港人冇黎過都聽過個名,
就全靠無記o既電視劇《最美麗的第七天》,
曾經係度取景, 成為香港人認識呢個世界文化遺產o既契機。
如果大家係渣車黎泊係第一停車場,
又或者係搭交通工具黎的話,
一黎到白川郷就會見到上、下圖o既「出会いの橋」,
行過左條橋, 就開始係白川郷主要建築群。
白川郷, 其實只係日本北陸地區內o既一條小村,
被列為世界文化遺產, 最主要係因為村內o既建築特色。
下圖所見, 村內o既屋都有好高好斜o既屋頂,
因為斜到好似兩隻手掌合什咁, 所以叫合掌屋。
有咁o既建築風格, 係因為北陸地區, 尤其是白川郷一帶,
到左冬天, 溫度極低, 風雪又大得離晒譜,
厚厚o既蘆葦草係為左可以保暖,
另外為免積雪壓毁屋頂, 所以全部屋簷o既斜度都好直。
仲有, 因為冬天都係吹同一面風,
為左減低風阻, 所以村內所有合掌屋都係向同一個方向而建,
所以就令到整體景色更加特別。
之前第一次黎白川郷, 係同屋企人跟團黎, 所以冇時間,
第二次係帶同事一家人黎, 因為要照顧小朋友, 所以冇時間,
今次終於可以慢慢參觀白川郷o既建築喇。
神田家, 係白川郷其中一個對外開放o既「示範單位」,
俾100yen就可以慢慢參觀。
下圖開始係神田家合掌屋o既屋簷閣樓,
因為合掌屋屋頂太斜太高o既關係,
就連屋簷閣樓都可以有兩三層係入面。
呢一層主要放左啲農家/打獵用品。
可以見到上圖啲展品放成一個矩形, 中間圍住左個方框,
咁係因為中間嗰個方框其實係通窿o既格子,
頭先合掌屋正中間o既爐火燒出黎o既煙會透過格子傳上黎。
有咁o既設計, 係因為可以令到閣樓都溫暖之餘,
啲煙仲可以驅蟲, 防止用具以及屋簷o既蘆葦草有蟲害。
但壞處係, 一來成個閣樓都係煙味,
小弟們件衫都好以燒完BBQ咁;
二來, 係因成個地板都係煤屎, 所以呢層開始提供有拖鞋俾大家。
同樣地, 都有煙攻上黎呢一層。
下圖就係由呢一層o既屋簷望出去o既景色。
下三圖都係屋簷內框o既結構,
真係冇用鐵釘, 全部都係用繩綁或者係入榫。
橫木係合掌屋屋身o既框架,
而上面有繩紥住o既係屋簷o既其中一個支撐腳。
可以見到, 刨尖左o既屋簷支撐腳,
只係就咁篤住屋身橫木o既一個凹位。
好似好牙煙咁, 其實係為左令到當屋簷受風吹雪壓時,
有空間同彈性去卸走力量。
下圖係另一個對外開放o既「示範單位」---長瀬家,
係白川郷最大級o既合掌屋,
不過今日休息。
上圖呢間, 係白川郷主街一間賣コロッケo既店。
コロッケ(音Korokke)台譯可樂餅, 其實即係炸薯餅。
不過呢間o既炸薯餅, 係加左飛騨牛o既牛肉碎,
配上適量o既鹽花, 非常可口。
今次係小弟第三次黎白川郷, 亦都係小弟第三次食呢間舖o既飛騨牛コロッケ。
大家睇POSTCARD或者映片介紹,
一定會見過上圖o既呢張白川郷全景。
其實係由一個小山崗上面影番落去白川郷。
除左可以渣車上黎之外,
係白川郷主街亦都有接駁巴士載大家上黎,
詳情可以參考上一次o既BLOG。
六日五夜 日本中部帶人魷 第五日 --- 高山 + 白川鄉 + 岐阜長良川鵜飼
小弟會將呢個全景作為白川郷o既尾聲,
因為可以飽覽成個白川郷之後, 大家走都走得安落啲。
下一站就係去番白川郷東面o既主要城鎮, 高山。
上圖係JR高山駅,
而下圖係高山o既主要河流---宮川。
高山有名o既宮川朝市就位於河o既一邊進行,
亦都係小弟們聽朝o既行程。
趁啲舖仲未收工, 到高山市三町行下高山o既傳統建築群。
事關除左可以見到一堆傳統o既民居之外,
呢條街亦都係手信店、雜貨店o既集中地,
大家要買手信都係黎呢度。
去啲後街先叫少番啲人。
明明講左今晚係食燒牛,
但友人仍然係忍唔住由上圖o既小店買左一串燒飛騨和牛。
上圖呢一堆人唔似人o既公仔,
叫飛騨寶寶, 係飛騨高山一帶o既吉祥物。
而下圖係一間店門口o既蝦毛吉米cross over飛騨寶寶。
大家都見到上文出現過幾次飛騨呢個字。
飛騨, 大家唔好讀「飛彈」, 其實驒, 粵音係「駝」。
飛騨係高山附近o既一個地方,
而日本其中一個出名o既和牛品種就係用飛騨黎名命。
黎到高山一帶, 又點可以唔食飛騨牛呢。
而小弟認為, 最能將牛發揮得最好o既食法, 一定係就・咁・燒！
今次黎到市內一間出名o既店舖食燒飛騨和牛---味蔵天国,
位於JR高山駅南面唔夠100米。
地址: 岐阜県高山市花里4-308
見到上圖門口好似好多人等位?
對唔住, 入到去大堂仲多人, 仲要不乏外國人。
事實上小弟上次帶同事黎嗰時都黎過呢間店,
不過當年太天真打算walk-in, 唔知呢間店一年365日都要排幾粒鐘......
有過上次o既教訓之後, 小弟今次先安排朋友係酒店休息,
小弟自己一個人黎攞位。
因為太多客, 同埋太多外國客,
所以攞位係自動波走埋去填form的(下圖)。
時間係1800, 小弟以為都比正常dinner時間早左啲架喇,
大家見到打左影o既第22欄就係小弟。
嗯...得22組, 睇落左唔係好多人啫。
對唔住, 呢張係第3頁紙......
即使時間係1800, 但成間店已經一早滿晒,
仲要不斷有人埋單......
到底啲人係幾點開始食......
到可以坐落枱拎餐牌, 已經係1930左右......
唔理喇, 落單係咁趙喇喂。
就係上圖右手邊嗰條, 價值6080yen(未完稅) o既ロースカット。
琴日入口即化o既係鰻魚, 而今日就係牛。
不過有團友嫌呢楷野太過膩。
小弟們兩男3女, 一共食左3萬yen,
每人為起先400蚊, 其實都抵食。
抵食過係香港食先。
老老實實, 呢間野啲牛o既質素唔差,
但論性價比, 小弟上次同同事去嗰間小店仲正,
可惜實在搵唔番係邊間店, 可惜......
小小o既趣事。
上圖中間o既飲品, 出現石灰......
而下圖就係小弟點o既石灰。
應該係生石灰XD
你杯石灰 ... 係咩味呢?
回覆刪除酸酸甜甜的XD
刪除