行程黎到第五日,
琴日講到黎到高山市, 但已經好晏,
所以冇機會參觀, 只係食左餐燒肉做晚飯就瞓。
於是今日日間o既主要行程就係遊高山市。
拎左車, 等同事一家人食完早餐會合o既時候,
順便睇下酒店冇咩當地手信賣。
大家黎到飛騨高山一帶都會好經常見到,
叫飛驒寶寶, 係飛騨高山一帶o既吉祥物。
小弟母親好鐘意食日本梅、飲日本梅酒,
所以買左兩包番去。
好, 講番行程先,
第一店黎到高山祭屋台会館,
位於櫻山八幡宮境內。
高山市高山祭, 係春、秋各一次o既盛大祭典,
亦係日本中部有名o既節慶活動之一,
能夠係春、秋大祭黎到高山, 當然係最好喇,
但夾唔到時間的話, 就唯有好似小弟咁,
黎到高山祭屋台会館緬懷一下。
入面展示多架退役左o既神輿祭車,
好多都幾十年, 甚至上百年歷史。
館裏面有著住神社巫女服o既女士講解,
不過一來係全日文,
二來說明中有好多祭典禮儀、木工金工o既用語,
三來佢地用番當地方言口音黎介紹,
小弟實在只係聽得明四成......
下一站黎到宮川朝市。
本身諗住十點半前黎到,
但因為種種原因, 十一點半先黎到高山市中心o既宮川朝市。
講得朝市, 就當然係朝早先有啦,
好在呢個朝市, 開到1200先收檔。
雖然係咁, 1130黎到, 佢地都已經開始收檔。
老實講, 冇乜話好特別o既野賣,
多數都係啲新鮮蔬菜,
對於遊客黎講, 唔係話特別值得買o既野。
不過咁啱見到有一檔賣新鮮粟米,
於是買番碌黎食。
小弟覺得好理所當然o既野, 原來未必對個個人黎講都係!
小弟好細個就已經知粟米係點o既樣,
(可能因為幼稚園已經跟屋企人買餸)
但同事o既小朋友, 原來未見過仲包住綠色葉o既粟米,
個老闆娘唔揻開, 啲小朋友都唔知係咩。
令小弟諗起有段副刊報道, 話香港有啲小朋友一直以為芒果係一粒粒的......
當然呢個極端左......
其實新鮮粟米係真係好好食的,
不過香港應該冇乜機會食到......
固定舖位商店都有好多野買,
小弟就買左幾包醃菜番屋企餸飯食。
行完朝市, 再行下隔一兩條街o既高山市舊城區,
話舊城區, 但其實只係嗰兩條街幾個街口,
同埋好多建築都已經翻新過,
不過仲保留住以前o既樣式, 為遊客必到之地。
兩旁亦都有好多特色店舖,
手工藝、食物、酒等等, 應有盡手,
買手信的話呢度啱晒
但其實一啲都唔好食......
呢啲正正就係方左高山祭神輿祭車o既倉庫。
其實高山仲有好多野可以做可以玩的,
不過行程已經大幅落後,
小弟只好飛車到下一個景點,
就係由高山向西行50公里左右o既白川郷喇
※白川郷個「郷」字, 中文正體應該係「鄉」,
不過因為介紹緊日本地方, 小弟盡量都係用番日文字。
白川郷呢個地方,
位於日本中部比較中間、亦都係比較山區o既地方,
但點解會有咁多香港人冇黎過都聽過個名,
就全靠無記o既電視劇《最美麗的第七天》,
曾經係度取景, 成為香港人認識呢個世界文化遺產o既契機。
事實上小弟四年前, 已經同屋企人跟旅行團黎過白川郷,
(寫呢編文音時, 仲未補番當年o既遊記),
不過今次小弟一心係帶同事黎遊日本,
自己有冇黎過唔係重點, 最緊要同事一家玩得開心。
同埋小弟上次跟團, 都有少少趕,
今次可以自己慢慢睇過夠。
白川郷, 其實只係日本北陸地區內o既一條小村,
被列為世界文化遺產, 最主要係因為村內o既建築特色。
如上、下圖所見, 村內o既屋都有好高好斜o既屋頂,
因為斜到好似兩隻手掌合什咁, 所以叫合掌屋。
有咁o既建築特色, 係因為北陸地區, 尤其是白川郷一帶,
到左冬天, 溫度極低, 風雪又大得離晒譜,
厚厚o既蘆葦草係為左可以保暖,
而為免積雪壓毁屋頂, 所以全部屋簷o既斜度都好直。
另外, 因為冬天都係吹同一面風,
為左減低風阻, 所以村內所有合掌屋都係向同一個方向而建,
陣間有白川郷全景o既相片時, 大家可以留意一下。
同事o既小朋友要食啲野先,
所以小弟自行遊覽一下白川郷先。
兩邊主要都係遊客商店。
小弟因為係渣車, 加上第一停車場已滿,
所以泊左去第二停車場行番轉頭。
如果大家係泊第一停車場、跟團、又或者係搭公共交通工具的話,
應該會見到下兩圖o既環境, 然後經上三圖o既「出会いの橋」,
行入白川郷中心。
四年前, 小弟係上圖o既店入面,
買左一年飛騨牛コロッケ食, 好好食,
今次黎到, 特登再買多次黎食, 風味依舊!!
同事一家食完野, 係慢遊白川郷之前,
小弟先同佢地搭上圖o既shuttle bus到 荻町城跡展望台,
因為嗰度係飽覽整個白川郷最好o既位置,
黎得白川郷一定要係度影番張相。
荻町城跡展望台望番落白川郷,
頭先提過, 基本上所有屋都係向同一個方向的。
紫蘇, 就講緊紫蘇枼啦,
而もなか係和菓子其中一款o既名稱。
感覺就好似食緊草咁.......
不過帶番屋企, 呀媽又幾鐘意喎......
骨牌效應,
行程一個比一個落後,
本身打算五點左右番番落岐阜市內,
買左飯盒, 再欣賞今晚1900o既節目的,
點知淨係到岐阜市已經1845,
又搵唔到停車場泊車,
結果要求其非法泊車,
然後跑過去碼頭。
去碼頭做咩? 就係為左睇長良川鵜飼。
都係講句啦, 鵜飼, 小弟已經係京都宇治睇過,
今次純粹係介紹同事一家睇。
不過同小弟之前睇o既唔同,
今次係船上面食埋野。
不過最後因為行程趕唔切,
結果都係食便利店飯盒>﹏<
船伕用竹桿撐船出河中心。
之前宇治川鵜飼文章內介紹過咩係鵜飼,
對詳情有興趣o既朋友可以按連結慢慢睇,
不過小弟都簡番啲重點係度講。
鵜, 一種水鳥,
會將捉到o既魚暫時存放係喉嚨,
古代中國、日本人就睇中左呢點,
養鵜黎捉魚, 是為「鵜飼」。
不過因為鵜飼效率及唔上現代漁業,
所以都冇人係靠鵜捉魚為生,
慢慢邊成傳統民間手藝表演之一。
而家全日本只有13個地方做鵜飼o既表演,
示範點用鵜黎捉魚。
用鵜o既捉魚方法,
就係將未食飽o既鵜,
用繩綁住佢頸o既底部,
令到鵜捉到魚, 都唔可以吞落肚,
只可以留係喉嚨,
然後鵜飼師就會拉佢番上水,
用手唧番鵜喉嚨o既魚出黎。
一條捉魚o既船最少兩個人,
主要嗰個鵜飼師會拎住啲繩, 控制住啲鵜,
而另一個人會用硬物敲隻船黎嚇啲魚,
啲魚一驚, 就會搵地方聚埋一齊,
而多數就係聚係船頭個火把下面,
於是鵜就可以更有效率咁捉魚,
呢個亦都係火把o既工用。
一發覺有鵜已經捉到魚,
鵜飼師就會係手上一堆繩入面,
搵番嗰條出黎, 然後秤隻鵜上水,
係佢喉嚨唧番條魚出黎。
以小弟o既經驗,
唧出黎o既魚, 係表演後都係俾番鵜食的。
長良川鵜飼, 以人同船o既數目計,
比京都宇治川o既都要大,
不過老實講, 小弟覺得宇治川o既比較優勝。
最主要係因為船同表演者o既編排。
詳情唔講, 但宇治川o既鵜飼,
安排到令每隻船、兩邊o既乘客,
都有好足夠o既時間慢慢睇鵜飼表演,
而講解亦都比較清楚同詳細(日文ONLY)。
但長良川鵜飼, 客船行駛得比較混亂,
唔係每一隻船都有足夠o既空間及近距離欣賞,
而小弟隻船就係其中之一。
另外, 宇治川鵜飼, 有兩名女鵜飼師,
而長良川鵜飼係全男班。
好似話全日本都唔夠十個女鵜飼師。
唔係話一定要睇美女, 但呢個的確係一個gimmic。
本身小弟係想去犬山木曾川睇鵜飼,
因為嗰邊好似出名啲, 同埋又有女鵜飼師,
仲可以穴排埋船上食物,
但小弟想報名時已滿左額,
所以改為黎到岐阜長良川。
係咁踩長良川鵜飼,
但其實長良川鵜飼都唔係一無是處的。
(咁講好似好過份......對唔住)
作為壓軸, 長良川鵜飼, 以其多達五艘o既鵜飼船,
作一字排開, 似等速係河中滑航表演鵜飼,
的確係幾令人印象深刻的,
亦係岐阜市, 夏天o既有名景象之一。
有興趣o既朋友可以參考岐阜 (岐阜城+墨俣一夜城+大垣城)
頭先趕頭趕命跑過黎碼頭上船,
而家睇完表演, 都有時間慢慢搵影番碼頭附近o既環境。
因為同事一家唔係食得好夠飽,
所以係碼頭附近o既小販拉麵店食拉麵。
小弟黎咁多次日本, 都係第一次親臨呢種拉麵店。
冇得揀, 得一種, 亦都唔係話好好食,
但環境、風味搭夠。
就咁, 行程剩番最後聽日了~
沒有留言:
張貼留言