櫻花 (清水寺+八坂庚申堂+円山公園+蹴上INCLINE+岡崎疏水+平安神宮+哲學之道+銀閣寺)

琴晚都係三點左右瞓啦,
然後又係晨早流流六點鐘爬左起身。
搭地下鐵到東梅田轉JR到京都駅。
轉乘100號巴士0820左右就到清水五条。

因為幾個月前先黎過一次,
所以好快就搵到路行上清水寺。

上次黎正值隆冬,
樹木都光秃秃,
清水時係靚.
但總係欠缺啲野。

今次黎到,
完全係煥然一新,
果然寺廟雖好,
都要有櫻花扶持~

不過問題係,
點解會有咁多人=.=
上次都係八點幾左右黎到,
但鬼影都冇隻。
今次同一時間黎,
但就爆多人......
鴨仔團呀、學生呀咁......

因為今次主要係黎賞櫻,
所以冇櫻花o既景冇乜點影。
想仔細啲睇清水寺的話,
請睇番小弟16/1/2012嗰篇BLOG。
(http://japsleevefish.blogspot.hk/2012/01/blog-post_16.html)

清水寺o既入場券係會隨季節改design的,
唔知小弟有冇機會儲齊一set呢。
(一年後o既review: 欠夏天嗰張orz)

小清水舞台都仲係修葺緊,
所以只有由小清水舞台影過去清水舞台o既相,
不過已經足夠啦。

因為只係賞櫻,
加上今日行程緊密,
所以今次只係係清水寺
逗留左大半個鐘就離開。

跟住o既行程同上次差唔多,
都係沿清水道走,
北轉入產寧坂、二年坂,
然後經寧寧之道向円山公園進發。

因為已經係第二次黎,
所以已經認得路,
好快就搵到要行o既路。
不過進入円山公園之前,
先兜一兜八坂庚申堂同埋八坂塔。

庚申堂係咩,
小弟唔再係度講喇,
有興趣請參閱28/1/2012嗰篇BLOG啦。

有睇開小弟BLOG o既,
都應該認得呢三隻馬騮。
唔知o既請參考28/1 o既BLOG
(http://japsleevefish.blogspot.hk/2012/01/blog-post_28.html)

上次去奈良嗰個庚申堂因為太早,
小賣部未開, 買唔到「身代猿」,
今次難得有機會,
買番個身代猿護身符先。

小賣部負責人係一個都六七十歲o既婆婆,
不過仲好精神......精神過頭......
對話一開始左,
就係咁講係咁講,
將有關日本人信仰o既野講俾我知。
平時的話小弟都冇所謂,
但今日行程緊密呢......
不過都聽婆婆講左成十五分鐘......

然後係八坂塔啦。
唔知點解搵唔到入口......
不過本身對八坂塔o既興趣不大,
所以影過相就算了。

寧寧之道,
上次行平平無奇,
但今次櫻花滿開,
當堂唔同晒。

然後就係円山公園喇。
日本o既公園,
多數都係賞櫻勝地架喇,
不過円山公園出名在係公園中心o既呢一棵。
可惜第一代已經死左,
遺體好似係八坂神社,
而呢一棵係二代目。

當然,
成個公園唔係淨係得佢一棵o既。

遊覽完円山公園,
係咁依經過知恩院,
今次唔入去喇,
直接步行過去蹴上INCLINE。

途中經過一段路,
櫻花唔係話好特別,
不過咁啱風向啱啱好,
花瓣迎面吹埋黎,
都幾過隱。

大家見唔到啲花瓣兜兜口兜面吹埋黎?

行行重行行,
終於行到去蹴上INCLINE喇,
不過未正式行入去之前,
已經見到好多櫻花。
一來啲櫻花都開左一段時間,
二來今日比較大風,
所以有幸見到所謂o既「櫻吹雪」!!!!!

咩係蹴上INCLINE?
蹴上係一個地方名,
至於INCLINE, 就係指一段傾斜o既鐵路。
鐵路係明治年間建成o既,
目的係要黎運送船隻。
詳情小弟睇完個介紹都唔係好明。

總之而家剩低兩條鐵路俾大家漫遊就OK啦。
不過真係一個好好o既景點。
可惜因為呢個景點冇乜野好睇,
加上係季節限定,
旅遊書並冇記載,
小弟都係咁啱係網上見到呢個景點順路先行埋過黎。

上圖呢位仁兄,
一直坐係度,
等一有機會(例如係啲人散梗啲冇咁阻o既時候)就影相。
真係好有耐性,
不過小弟都係佢後面僕左廿分鐘,
下兩張圖就係期間影o既其中兩張。

影相同釣魚一樣,
都係要好有耐性呢。

沿住運河行去平安神宮,
河堤兩岸都有好多櫻花。

大家有興趣的話仲可以坐船遊覽,
不過小弟冇咁o既時間。

經過上圖o既岡崎公園,
就到達平安神宮。

上圖o既並唔係櫻花,
睇真啲, 只係啲籤文特登整到粉紅色,
等大家縛上樹枝之後,
到好似櫻花樹咁。

櫻花配和服美女。

要進入平安神宮神苑要先交低買路錢600yen。
初初都猶豫左一陣睇唔睇好,
最後都係嗰句啦, 「一場黎到」。

不過真係好在俾錢入去睇。
唔係話真係非常壯觀,
個庭園本身都幾靚,
再加埋啲櫻花,
600yen都俾得過o既。

大家睇清楚啲,
圖中o既和服少女係鬼妹仔。

下四張圖,
個湖面好似鏡一樣,
倒映住岸上o既景物。

遊覽完平安神宮之後,
就進發向哲學之道喇。
不過進入哲學之道之前,
先到熊野若王子神社。

沿下圖o既路向左轉就係哲學之道o既南面入口,
而直行就係熊野若王子神社。

去若王子神社,
並唔係為左參拜,
而係食便當,
行左成日都未食過野,
可能神社都係睇中呢點,
所以提供飯盒便當出售。

便當唔係話好及引&好食,
不過就少弟所見,
同小弟一樣入黎求其食餐晏,
稍事休息o既人都唔少。

食完個便飯,
就直式進入哲學之道喇。

條路叫哲學之道,
係因為日本哲學家 西田幾多郎(1870-1945)
經常係呢條路散步。
於是唔知幾時開始啲人就叫呢條做哲學之道。

我們偉大o既祖國都有一條出名o既道,
叫「大學之道」, 係邊?
係一個叫「明明德」o既地方......

唔好意思, 爛GAG一個XP
但如果連呢個爛GAG都唔明的話,
閣下真係要惡補一下中文之得喇=.=!



睇完爛GAG睇櫻花啦~
正如圖中所見,
唔知點解會有咁那多人=.=
完全係意料之外,
本身應該係冇乜人行o既偏僻小徑,
竟然比乃路臣街仲要迫人=.=

當然, 途中不乏小賣店。
其中小弟幫襯左呢個燒竹筍o既街邊小吃。
食完之後繼續上路。

行左四十五分鐘就走完全程。
其實哲學之道沿路都有唔少小神社寺廟,
如果大家有心逐個睇的話,
都要花上兩三個鐘左右。
不過小弟今日主要係睇櫻花啦。

哲學之道北面o既入口係銀閣寺。

大家聽金閣寺就聽得多喇,
因為金金聲, 所以比較出名,
同埋金閣寺都真係有少少金燦燦o既感覺,
所以銀閣寺就有咁出名喇。

銀閣寺原名叫慈照寺,
係室町幕府第八代將軍足利義政所創立,
講到尾又係一個勞民傷財,
為滿足一己私慾o既別墅啦。

一入去,
道路兩旁圍有椿(TSUBAKI), 即山茶花。

少少題外話。
日本人探病等,
係一定唔會送山茶花的。
因為山茶花凋謝o既時後好特別,
係成朵花連花萼, 完整咁掉下,
日本人覺就得好似人頭落地咁,
是為唔好意頭。

不過無視呢一點,
山茶花都幾靚o既。

銀閣寺入場券,
盛惠600yen。

唔好以為啲寺廟地上o既青苔係求其有得佢生,
就上圖所見, 係有專人打理!!!
而且非常之細心,
逐粒逐粒唔知係道挑啲乜。

同金閣寺、平等院o既觀音堂上頂一樣,
都係有鳳凰o既裝飾。

走o既時候係銀閣寺前o既手信店,
買左個和菓小食。
呢間野印象中好似都有啲名氣。

唔係話唔好食o既,
一般咁啦,
 冇乜特別,
都係得個甜字。

同日本普遍和菓子一樣,
都係紅豆飴+栗子咁啦。

時間已經係下午兩點半,
今日o既行程亦都好順利咁走完。
仲諗住時間尚早,
番到大阪仲可以瞓番一陣先番工。
但唔知做乜事,
淨係由銀閣寺搭巴士番京都JR駅,
都搭左成個幾鐘......
行都行到去喇真係......

結果番到宿舍放低啲野之後,
就要即刻出發番工=.=
超眼瞓......

下圖係今日小弟所步行o既路線,
綠色括住o既係主要境點名,
藍色段落係哲學之道。
留意左下角o既scale bar,
係以500m為單位=.=
小弟應該都行左十公里以上......
「公益金~百萬行~♪」