七日六夜 北海道的自駕魷 第七日 --- 昭和新山 + 有珠山

唔知係咪受大學上莊(搞學會)o既影響,

小弟計劃行程, 都總會留幾手,

例如落雨的話點行程、

呢個景點閂左門可以去邊、

早左到的話可以去多邊啲地方等。

小弟見琴日父親好似對地殼運動o既產物幾有興趣,

於是今日決定早少少起身, 0900出發,

下午上機前帶屋企人去多一個景點,

反正小弟熟識呢區。

所以由登別去機場前, 稍為兜一兜路,

到洞爺湖嗰邊o既昭和新山同有珠山參觀。

行駛一條九曲十三彎o既山路 --- 道道2号線,

(冇打多字, 第一個"道"係指北海道, 第二個"道"指車道)

經過o既係一個叫オロフレ山,

而途中山拗o既地方, 有一個展望台,

今日天朗氣清, 視野廣闊,

於是就落車睇下~

 
啲雲好靚。

半個鐘車就已經到達昭和新山。

又係啦, 呢個景點小弟以前已經黎過介紹過,
呢度唔多講, 有興趣知道下圖呢舊蕃薯o既資料的話,
可以參考小弟之前o既blog
北海道 (有珠山+登別地獄谷)

乘座吊車上有珠山, 途中可以望到昭和新山。

有珠山上, 見到有珠峰。

由有珠山望向洞爺湖。

由有珠山望向昭和新山。

有珠山上吊車站旁展望台。

全景



由吊車站向山入面行,
可以見到下圖o既火山口。
兩年前黎嗰時, 火山口冇水,
今次落左幾日雨, 小弟其實好有興趣,
想睇下有冇形成火山口湖。

可惜要行去火山口,
雖要先落呢一條長命樓梯,
有見兩親腳力欠奉,
加上要行到火山口來回, 時間唔太夠,
結果都係放棄左。

所以有時真係,
有啲地方唔趁有心有力時去,
年紀大左, 想行都行唔到......




渣車去機場o既途中, 有一段小插曲,
就係小弟差啲俾日本警察捉超速。

係日本, 尤其是係北海道渣過車o既朋友可能都會知,
日本o既車速上限出奇地低。
市入面上限40km/h都理解,
但好多時啲冇乜車o既郊區直路, 上限竟然係60km/h,
甚少見到70km/h或以上(收費道路除外)。
而啲路多數都係雙線雙程,
結果就只好過對面線爬頭......

渣車去機場途中o既郊區,
小弟同前面o既開斗白色輕型貨車(下面簡稱"開斗"),
被幾架唔生性o既慢車頂住行得40km/h,
難得可以爬頭, 暢通無阻,
估唔到架開斗幾狼, 一味加速。

小弟見有人帶頭, 梗係跟架開斗佢啦。
開開下就去到120km/h......

突然發現後面有一架白色房車想爬小弟頭,
但對面線有一架車駛緊埋黎, 加上小弟都成120km/h,
所以架房車根本唔夠時間同速度爬頭,
再係咁佢房車會撞對頭車,
於是小弟就減速俾房車爬頭。

就係房車爬小弟頭嗰下,
小弟先發現, 白色房車車頂係有紅藍燈的......
背上立刻一陣冷汗。

好采o既係槍打出頭鳥,
警車冇理小弟, 直接追架開斗......
小弟就猶有餘悸咁, 睇住架開斗被警車截停抄牌......

今次真係見識到傳說中o既ネズミ捕り(直譯「捉老鼠」)。
警車會停係一啲特定o既路肩, 但因為郊區草木多,
嗰啲路肩多數都係從後睇唔到停車。
當你超速駛過時, 佢發現你超速,
就會即刻由路肩駛出追截,
是為「捉老鼠」--- ネズミ捕り (NEZUMI-TORI)



當然, 大家唔超速就唔會有事,
安全駕駛~

就咁, 小弟同屋企人七日六夜,
瘋狂1100公里北海道自駕魷就完成左。


到達機場, 小弟o既家人先打道回港,
而小弟因為有宅活動 (ASL 2014), 所以仲要飛東京留幾日,
順便仲遊覽左栃木県世界文化遺產o既日光東照宮添。
將會係下一篇章介紹。