日光世遺一條魷 --- 日光東照宮

唔係好關本篇o既事,

但今日呢個行程,

係承接住之前北海道的自駕魷,

有興趣o既朋友可以去昅下。

Anyway, 26號由北海道飛東京,

因為到達時已經好夜,

所以小弟係成日幫襯o既上野COMIC BUSTER網吧過左一晚,

然後今朝直接坐JR, 經宇都宮轉車,

利用日光線去到總站日光。

果然同世界文化遺產扯上關係o既野都唔同啲,
車站個設計同一般唔同,
連車箱都油上同平時唔同o既顏色。

,

日光駅外觀。
因為估車站都有少少年代,
所以有啲古色古香。

由日光駅行到東照宮都要30分鐘,
其實有巴士搭的, 不過小弟有的是時間,
所以慢慢行過去。



成日話日光東照宮,
其實唔係淨係得東照宮的。
東照宮圍住附近, 仲有幾個有歷史o既建築。
如果好似小弟咁行過去番照宮方向的話,
首先會見到o既, 應該係日光山輪王寺。

以小弟o既性格, 應係將主角放最後的,
不過今日天氣唔多好, 有少少雨,
所以趁唔係太大雨, 先去左東照宮先。

東照宮因為都幾大,
所以都分左幾區,
大家只要買以上o既套票,
就可以一票通行。

循例都要紹下日光東照宮。

簡單講, 日光東照宮其實係拜祭徳川家康o既神社。
你話德川家康唔係日本戰國時代o既人黎架咩, 點解會變左神架?
打個比喻, 同中國人拜關公差唔多啦,
日本人將徳川家康神格化(即係升呢), 邊左做「東照大権現」,
所以當神咁拜。

話就話日光東照宮係德川家康o既靈堂,
但實際上佢條屍係葬左係靜岡縣o既久能山東照宮。
事源係咁o既, 德川家康都幾信陰陽道 (類似中國o既道教+風水學啦)
佢留遺言, 話死後要先葬係久能山,
過一排, 再係日光起一個小堂, 將佢o既靈請過去,
將佢當神咁拜, 咁佢就會鎮守日本和平咁話......

而小堂變成今日咁o既大規模,
就係佢個孫德川家光o既指示,
於第21年神忌(類似啲催吉避凶o既意念)將日光東照宮搞大佢。

另外, 除左歷史困素之外,
東照宮用左好多動物o既雕像作為象徵思義,
亦都係東照宮出名o既原因,
陣間一一介紹。

先係正門呢個石鳥居(上三圖)
係九州o既藩主由九州運石頭過黎起的。

五重塔(上兩圖), 係福井縣嗰頭o既一個藩主搵人起的。
除左同建築群內其他建築物一樣木雕精細, 花彩斑斕之外,
五重塔仲用左一個好特別o既設計(下兩圖)。

五重塔o既中軸, 罕有地係用上懸垂式。
條中軸並唔係插入地基, 而係由第四層吊住,
接觸唔到地基砥石的。

咁樣做, 一來可以防止個塔起好之後,
因為自身重量令木造建築變矮, 而令中軸突出,
另一方面, 為五重塔提供極高o既抗地震能力。
而東京o既SKY TREE, 其實都應用左呢種抗震技術。






下三圖係表門

表門係東照宮最早起o既門,
左右各放左個仁王像(類似門神咁o既野啦)
由上圖可以見到表門o既裝飾,
以小弟睇過咁多古蹟o既經驗,
上圖啲油漆應該係原底嗰啲, 冇翻新過。





過左表門就會見到下圖形成L字型o既三神庫,
主要係放祭祀用o既衣服、馬匹用具等。

當然, 三神庫啲裝飾都係美輪美奐啦,
而其中上神庫屋簷上畫左兩隻象唔似象o既野(上兩圖),
叫「想像の象」, 咁係因為以前日本人冇見過象......
咁點解要畫上去......





 三神庫斜對面,
就係東照宮最為人所知o既建築---神厩舎・三猿,
亦即係養住神馬o既馬厩。
神馬? 神馬是神馬?
神馬即係祭祀o既時候拎出黎行下企下嗰啲馬。

其實神厩舎出名o既唔係佢本身,
而係外圍十二個木雕(上圖)。
其中最出名o既係其中一格---三猿(下圖)

會見到三隻馬騮, 左至右分別掩住耳, 掩住口, 同掩住眼,
意思係非禮勿聽, 非禮勿言, 非禮勿看。
咁點解會有一個咁儒家思維o既木雕架呢,
其實神厩舎外圍共十二格o既木雕,
係寓意人o既一生, 即刻去片。

一) 母猴左手齊眉, 放眼遠望,
望o既係身邊小猴o既未來。
而母猴眺望o既方向, 正好有結左果o既枇杷及紅色彩雲,
寓意母親希望小孩o既未來會係豐盛多彩。


二) 頭先介紹過o既「非禮勿聽, 非禮勿言, 非禮勿看」,
寓意小孩要向好方面學習、正直不柯地長大成人。

三) 有一隻仲未企起身o既小猴, 好似好寂寞o既表情,
寓意要能夠承受寂寞, 並可以自立。

四) 兩隻爬緊樹o既年青猴子, 兩隻都向上望,
旁邊並配有一片藍色o既雲朵。
寓意要努力向上, 並要有「青雲之志」(日文「青」指「藍色」)

五) 右邊隻猴子係樹枝上向前望,
但左邊兩隻係岩石上, 其中一隻鬱鬱不歡,
似乎係由樹上跌左落黎, 而另一隻撫摸其背, 安忍並鼓勵。
寓意人生難免有不如意事, 要互相扶持安慰。
下圖可以見到鬱鬱不歡嗰個樣。

六) 呢個啲人都係估估下。
右邊隻猴子好認真咁撓埋手向前凝望,
而左邊隻猴子似乎考慮緊啲野, 要做決斷。
啲人話右邊隻猴子決定要成家立室, 但左邊隻猴子就仲未有咁o既打算。

七) 右邊係玫瑰, 左邊有藍色巨浪,
右邊猴子頭上有赤霞, 兩猴互相凝望,
寓意兩人互相守望相助的話, 就唔怕人生o既風浪。

八) 互相合力, 渡過人生困難o既猴子, 成家立室,
並懷有新o既小生命, 就係上圖大肚o既母猴。
然後番番去第一格o既木雕, 即係母猴眺望小猴o未來, 周圓復始。



因為咁, 日光東照宮o既護身符,
對於保佑生產、小孩健康等, 特別受到追捧。
當然, 最出名始終都係「非禮勿聽, 非禮勿言, 非禮勿看」嗰三隻,
小弟亦都買左個三猿o既匙扣,
送俾一個剛生小朋友o既友人, 希望佢個小朋友能夠正直地成長。

至於點解會係馬騮......
因為日本人相信馬騮係守護馬匹o既動物,
所以好似時日本o既馬厩都有同馬騮有關o既野。
唔知關唔關西遊記孫悟空做過弼馬溫o既事......

神社唔少得洗手洗口o既地方,
日光東照宮o既御水舎

上下圖, 廻り燈籠
好似係向洋人訂造的

陽明門, 修複中, 但乃然展示一啲畫雕(下圖)

唐門 (上一圖, 下9圖)
好明顯門簷o既形狀好似中國式o既建築。

木造o既唐門, 大部份油上白色油漆,
配以金色o既鑲邊, 但又保留部份木色浮雕,
撞色撞得幾靚, 真係好靚。

而唐門兩邊o既圍牆則以黑色低色為主。

神輿舎
放左春秋二祭時用o既神輿(下圖)。

頭先買o既套票, 要係呢度再剪票,
進入下圖奧宮外面o既東廻廊,
睇o既就係東照宮另一動物雕像。

東照宮另一出名o既動物雕像,
受陽光沐浴o既牡丹花之中有一隻瞓緊o既貓,
而貓木雕背面有兩隻雀鳥嬉戲緊。

東照宮外以都有唔少神社以貓為雕,
但瞓緊o既貓雕, 全日本得東照宮先有。

成個木雕有兩個象徵意義:
一, 隻貓雖然瞓緊, 但前腳都係作撲出狀,
話隻貓其實話就瞓緊, 其實都係守護緊川家康個靈。

二, 老一輩應該都讀過《貓捕雀》,
而貓o既背面有雀鳥嬉戲,
即係話天下太平, 貓同雀都和平相處咁話。

穿過廻廊, 行一段山林間o既石路之後,
就會到達奧宮。

都好鬼多級樓梯......

唐銅鳥居

下三圖就係奥宮o既墓所,
不過之前都提過, 遺體唔係呢度。

六百年樹齡o既大杉

佛家o既概念, 好多時神社寺院都係以山號名命,
而二荒山神社就係原本祭祀日光二荒山,
因為東照宮帶挈, 所以都變得富麗堂煌。
亦因為東照宮名氣太大關系,
二荒山神社都係登錄係世界文化遺產日光東照宮名下......

世遺之一o既鳥居

似乎二荒山神社出名保祐結緣。

都係嗰句啦,
兩碌木生埋一齊,
日本人就會當係夫婦檥咁拜......

再行過啲, 上圖中文字識睇啦,
家康個孫, 家光個靈堂。

另外俾錢買飛

呢邊就清靜好多喇,
建築都冇咁奢華。

環境幽靜

因為一路都落住微雨o既關係,
唔多唔少都影響左參觀o既心情,
所以有啲走馬看花咁,
睇完就走。下圖係東照宮建築群外o既橋。

其實本身打算下午去行山的, 行o既係戦場ヶ原,
而聽日本身打算去那須o既動物農莊,
不過都因為落雨關係打消左念頭,
兩日都屈係宇都宮o既旅館HEA,
不過對呀宅黎講, HEA兩日唔係咩難事......

過埋呢兩日, 接住係動漫演唱會Animelo Summer Live (ASL) o既行程,
留番另一篇章再講。